¹ Dispela em ol man i bin kam long Devit long ples Siklak, taim em i stap longwe tru long Sol pikinini man bilong Kis. Ol i stap namel long ol soldia na helpim ol long pait. ² Ol i sanap wantaim bunara na ol i ken holim long tupela han, han sut na han kais, ol i ken tanim ston long katapel tromoi na sutim spia wantaim bunara. Dispela em ol lain Benjamin, ol wan lain bilong Sol. ³ Namba wan ofisa em Ahisa na bihain Joas, tupela pikinini man bilong Shema em ol man bilong Gibet. Jesil na Pelet, pikinini man bilong Asmavet. Na tu Beraka, Juhu em man bilong ples Anatot, ⁴ Ismaia em man bilong ples Gibion, wanpela soldia i stap namel long 30 (na long stia tok bilong 30), Jeremia, Jahasiel, Johanan, Josabat em man bilong Gederat, ⁵ Elusai, Jerimot, Bealia, Semaria, Sefatia em man bilong Harup, ⁶ ol man bilong Korat, em Elkana, Ishia, Asarel, Joesa, Jasobeam, ⁷ Joela na Sebadia, ol pikinini man bilong Jeroham long ples Gedo. ⁸ Sampela man bilong Gadit i joinim Devit long strongpela banis long ples nating. Em ol man bilong pait, ol man i bin lainim long pait, husat inap long holim hap plang na spia, pes bilong dispela ol man i strongpela olsem pes bilong ol laion. Ol i ran strong tru olsem ol wel dia bilong ol maunten. ⁹ Dispela em ol lida, Esa em namba wan, Obadia em namba tu, Eliap em namba tri, ¹⁰ Mismana em namba 4, Jeremia em namba 5, ¹¹ Atai em namba 6, Elliel em namba 7, ¹² Joana em namba 8, Elsabat em namba 9, ¹³ Jeremia em namba 10, Makbanai em namba 11. ¹⁴ Dispela ol pikinini man bilong Gat em ol lida bilong ami. Ol lain i nogat strong i lidim 100 man na ol lain i gat bikpela strong i lidim 1,000 man. ¹⁵ Ol i bin brukim wara Jodan long namba wan mun, taim wara i tait na winim mak bilong em na rausim olgeta manmeri husat i stap klostu long ol stretpela daun ples, em tupela ples wantaim i go olsem long hap san i kamap na hap san i go daun. ¹⁶ Sampela man bilong Benjamin na Juda i bin kam long strongpela banis bilong Devit. ¹⁷ Devit i bin i go aut long bungim ol na tokim ol olsem, "Sapos yupela i wanbel na kam long helpim mi, yupela bai joinim mi. Tasol sapos yupela i kam long mi long salim mi long ol birua bilong mi, bai God bilong ol tumbuna bilong yumi bai lukim yupela na rausim yupela, long wanem mi no bin mekim wanpela rong." ¹⁸ Olsem na Spirit bilong God i bin kam long Amasai, husat em i namba wan ofisa bilong 30-pela man. Amasai i tok, "Mipela i bilong yu, Devit. Mipela i stap long sait bilong yu pikinini bilong Jesi. Husat i helpim yu bai i stap gut, long wanem God bilong yu i helpim yu." Orait Devit i kisim ol na mekim ol i kamap komanda bilong lukautim ol man bilong em. ¹⁹ Sampela man bilong Manase i lusim Manase na joinim Devit taim em i bin kam wantaim ol Filistia long pait wantaim Sol. Tasol ol i no helpim ol Filistia, long wanem man i go pas long ol Filistia i toktok namel long ol yet na ol i bin rausim Devit i go. Ol i tok, "em bai i lusim mipela na i go bek long masta bilong em Sol na bagarapim laip bilong mipela." ²⁰ Taim em i kamap long Siklak, ol man bilong Manase husat ol i bin joinim em, Adna, Josabat, Jediael, Maikel, Josabat, Eliu na Siletai, em ol kepten i lukautim 1,000 man bilong Manase. ²¹ Ol i bin helpim Devit long pait wantaim ol man i save raun nating, em ol man bilong pait. Bihain ol i bin kamap komanda bilong ami. ²² Long olgeta dei, ol man i wok long kam long Devit na helpim em na ol i gat bikpela ami olsem, ami bilong God. ²³ Dispela em i namba bilong ol soldia i redi long pait, husat i bin kam long Devit long Hebron, long givim kindom bilong Sol i go long em, long wanem em i bihainim na karim tok bilong God Yawe. ²⁴ Long Juda husat i karim ol hap plang na spia em 6,800 man i redi long pait. ²⁵ Long ol lain bilong Simion i gat 7,100 man bilong pait. ²⁶ Long ol lain Livai i gat 4,600 man bilong pait. ²⁷ Jehoiada em i bin stap lida bilong tumbuna lain bilong Aron na 3,700 man i stap wantaim em. ²⁸ Sadok, em wanpela yangpela na strongpela man tru, em i stap wantaim 22-pela lida long famili bilong papa bilong em. ²⁹ Long Benjamin, lain bilong Sol, ol i gat 3,000 man. Planti bilong ol i bin stap wantaim Sol na bihainim em i kam inap long dispela taim. ³⁰ Long lain bilong Efraim i gat 20, 800 man bilong pait, ol man husat i gat nem insait long ol haus bilong papa bilong ol. ³¹ Long sampela hap lain bilong Manase ol i gat 18,000 man i gat nem i bin kam long Devit long mekim em i kamap king. ³² Long lain bilong Isaka, i gat 200 lida husat i gat klia tingting long taim na save long wanem Israel inap long mekim. Olgeta famili lain i stap aninit long tok stia bilong em. ³³ Long lain bilong Sebulun i gat 50,000 man i redi long pait, wantaim olgeta samting bilong pait na tu ol i redi long stap aninit long Devit na stap wanbel wantaim. ³⁴ Long Naptali i gat 1,000 ofisa na 37,000 man i gat hap plang na ol spia i stap wantaim ol. ³⁵ Long lain bilong Dan i gat 28,600 man i redi long pait. ³⁶ Na long lain bilong Asa i gat 40,000 man i redi long pait. ³⁷ Na long narapela sait bilong wara Joden, long lain bilong Ruben, Gadit na hap lain bilong Manase, i gat 120,000 man i stap redi wantaim olgeta samting bilong pait. ³⁸ Dispela olgeta soldia i redi long pait, ol i bin kam long Hebron wantaim strongpela tingting long makim Devit i kamap king bilong Israel. Olgeta narapela ol lain Israel tu i wanbel long makim Devit i kamap king. ³⁹ Ol i bin stap long dispela hap wantaim Devit inap long 3-pela dei, kaikai na dring ol samting ol lain bilong ol yet i bin salim i kam long ol. ⁴⁰ Antap long dispela, ol lain husat i bin i stap klostu long ol, i go olgeta olsem long Isaka, Sebulun na Naptali, ol i bin bringim bret i kam long donki, kamel, hos, bulmakau na flawa bilong kaikai ol i wokim long prut bilong diwai fik, frut ol i draim na pasim bilong kaikai, wain, wel, bulmakau na sipsip na ol Israel i amamas.