1
Ihuba biharo tabobaro, bo bainti abu impa biba baubara. Biba bira noba batatobaro abu impa biba baura.
2
Bira kai'a bainti bira ire tiha, "Iata bainti baubo ti, taba kumi mintia kaiboe ma biba mintia bibo, bira noka okae, o biba nai kumi mintia keroe biba abu impa bibo?"
3
Ihuba bira uba anirantero tibamiro tiharo, "Kia bira noka okae o bi baintiba nai kumi mintibo, mintiboma bi baintira'a Kotira kai'a bano a'ira'a obarai'a buaina baibo biba mintia birabe.
4
Tenabu bi baintira kai'a barare tabae atitaira'a ti atitaimanta tuburaba. Auriro entamabi'e kia tenabu kai'a bararorabe.
5
Te ma batarai bauna, Te batai haina obabe."
6
Ihuba bi ubara tikaira nantiara, biba bataa'a taara bihikero bataa horai'ama kero, biba horai'atai bataara bira abu'i batora.
7
Biba birara tiharo, "Are orubira Saloam huli namai'a otu tuntuane tiro (bi ubara tu'antake tiharo, "Atitane"). Mintibo bi baintiba oru tuntu kero aniba biba ko'ekero autu'ura.
8
Bira batake nibauka bata, hinikiaka baaka bira tabobaro bainti monuara nari bauba baimanta, bika tiha, "Ma bi baintiba o'ubi baiharo bainti monuara nari baiba biba ibo ti?"
9
Hinikiaka tiha, "Ma bibabe ti" hinikiaka tiha, "Kiabe ti, biba bira bo'aba bobanobe ti. Bika minti tibaubaro biba tiharo, "Terebe tiro."
10
Bika birara tiha, "Ai abu bano nantiakero antua bibae iaro ti?"
11
Biba bika anirantero tibanimiro tiharo, "Bi baintira Ihurabe tiaba, biba bataa tu'anta horai'a kero ti abu'ira batero ti tibatimiro tiharo, bira Siloam huri namai'a oru tuntuane tiro.' Biba minti tima te bi namaira'a tunturoma ti abu bano antua bima te aitu'uro."
12
Bika bira ire tiha, "Bibabo taie baibo ti? Bika minti tubaro biba tiharo, "Kiama te bira tabauro tiro."
13
Bika bi baintira tabae abu impa bura bitabare Parisi unaini bura.
14
Bira Sabati enta'a Ihuba bataa tu'anta horai'a kero bira abu antua komanta.
15
Parisi bira e'a anirante iramite nana ara'a mintia kaiboe bira abu bano antua bibo ti. Biba bika tibanimiro tiharo, "Biba bataa horai'a taira ti abu'ira bataima, te namai tuntukema te bate aitu'uro tiro."
16
Parisi bainti hinikiaka tiha, "Ma baintiba kia Kotirai hairo tubibaube ti, Bira nanare kiama biba Sabati lo abtaibo ti."Hinikiaka tiha, "Nantia keroe kumi bainti bano mantina mirikorira autuanarobe ti?" Mintumanta bika tu'abubi tarai'ama bura.
17
Mintumanta bika abu impabi baintira anirante e'a bata ire tiha, "Are bi baintirara nantie tinabe ti, bira nanare, biba ai abu rampai kaibabe?" Abu impabi baintiba tiharo, "Biba poropeti bo bano tiro."
18
Biba minti tumanta Juda batanaka kia bi baintira uba'ata mara'ura utura, tabae abu impabi baintira noka oka aromanta anubo abu impabi baintira abu antua kobo anirantero autu'ura.
19
Bika bira noka oka ire tiha, "Ma nihanta ma'ue ibo ti, mintire nehanta tiate ti, "Abu impabi baintira bira noba batatairabe?" Nantiboe bate biba anirante autu'ibo ti.
20
Bira noka oka tiha, "Tehanta tabebe ma bi baintira tihanta ma'ube bira noba batataibo abu impa birabe ti.
21
Nantia keroe biba autu'ibo, kia tehanta bata tabauro tabae bira abu rampai kaira, kiama tenhanta tabauro. Nenta bira irake tabte, biba nai noru'ai baintibabe ni tibama nimianarobe ti.
22
Bira noka oka minti tura bira nanare, bika Juda batanakara etake. Bira nanare, Jada batanaka uba tatauke tiha, bo bainti bano tiba o'ai'ake tiharo Ihu Karaitirabe tina, bika bira mono nabu'ihai a'irama atita bebakebe ti.
23
Bi okarara baimanta bira noka oka minti tura, biba noru'ai bainti babe tura. Nenta bira ireha tabate ti tura."
24
Minti bika e'a bata, abu impabi baintira arake tibami tiha, "Kotira autu tuaherane ti. Tenabu tabauro, ma bi baintiba kumi bainti banobe."
25
Bi baintiba bika uba anirante tibanimiro tiharo, "Biba kumi bainti banoe o kiae, kiama te tabauro. Bohahika te tabauna, mintiroma baibo. Bo enta abu impabi bai, imanta bate autu'una."
26
Bika bira tibami tiha, "Biba ai nantiae kaibo? Biba nantiakeroe ai abu rampai kaibo?"
27
Biba tiharo, "Te ni tibanimurama kiama ne iriabo tiro. Bira nanahare ne e'a irireka tiabo? Ne bata bira kai'a bainti irekae, nane?"
28
Bika naberai tibake biraratiha, "Are bira kai'a bainti bano ti, tenabu Mosera kai'a baintibe ti.
29
Tenabu tabauro Moseba Koti kantiro uba tibaurabe, mintima ma baintira, kiama tenabu tabauro biba taihairo tubiae ibo."
30
Bi baintiba bika uba anirante tibanimiro tiharo, "Ne bo'ari ubarama tibariabo tiro. Ne kiama tababo biba taihai tubira iboma biba ti abu rampai kairabe.
31
Tenabu tabauro Kotiba kumi bainti uba iriharo iro bo bainti bano Kotira'a mono iharo, bira antu'a abataina, Kotiba bira bata irima amitanarobe."
32
Naruba bata baata bata obarai'ura ahiro aniharo, kia bo bainti bano bo bainti bira noba abu impa bubo batato baintira bata abu rampai kora.
33
Ibo bi baintiba kia Koti binaini aniare tiro, kiama biba bo haika bata minti tiri."
34
Bika bira uba anirante tibami tiha, "Are kumi'i obara'a bira are bate tinabu tiba timirabae iaro ti?" Bika mono nabu'ihai bira a'ira bara beba kora.
35
Ihuba irumanta bika bira mono nabu'iha barabeba kobaro. Biba bira rantakero bira tibamiro tiharo, "Are Bainti Baiinti'ae mara'ura utuaro?"
36
Tubaro, biba tiharo, "Nora baubo, Bainti Baiinti bano biba tabae ibo te bira'a mara'ura utirebe tiro."
37
Ihuba bira tibamiro tiharo, "Are bira tabaro bate ma bi baintibama ai kantiro uba tibaibo."
38
Bi baintiba tiharo, "Nora bainti baubo, te mara'urama uturo." Minti tibakero biba bira'a mara'ura utura.
39
Ihuba tiharo, "Te ma batarai tubuna te bainti nahenti rareha taukae kia aitu'uaka aitu'uatera te tuburo."
40
Parisi bainti hinikiaka bira batake baubaro biba bi ubara tumanta bika bira ireha tiha, "Tenabu bata abu impe bie bauro ti?"
41
Tubaro Ihuba bika tibanimiro tiharo, " Ne bata abu impebi bariare ti, kiama ne kumi mintia tirio tiro. Iboma ne bate tiha tenabu aitu'uro tibariara, ni kumi bano a'ima barianabe tiro."