1
Bihaikara nantiara, Ihuba Kariri Noruba namai hini banataraini bura, bo autu baireba Soluwara Taiberiasinibe tura.
2
Airu bainti nahenti bira abatora, bira nanare bika tabobaro Ihuba mirakoli mintiharo robara bara baintika a'i himpi kebaumanta.
3
Bika a'irakero Ihuba nai kai'a bainti hampata nora'a oru o'ubiro baura.
4
Juda batanaka Nora kara neha behaku nimito Entaba aumai'ubaro.
5
Ihuba tabomanta airu bainti nahenti bibinaini anubaro, Biba Piripira tibamiro tiharo, "tanto bantarai haie kara ko'amake ma bainti nahentika nimiai bika nebarabe?"
6
Ihuba Piripira aba'eharo bira irairama, biba teberoma nanahika nai mintuaina.
7
Piripiba bira uba anirante nai tibamiro tiharo, "Tenabu mone 200 a'uke barataira karaba kiama bohau bohau bainti nahenti nimiairo ho barianarobe."
8
Ihura kai'a bainti bobano, Enturuba, Saimoni Pitara atabakaba Ihura tibamiro tiharo,
9
"Ubara bainti bobano pareti 5-nabu batakero habuka tarau bataibo. Airu bainti nahentima bariabo bi karanabuba kiama tinabu ho kaha'ianarobe?"
10
Minti tubaro Ihuba tiharo, " Ne Tira bainti nahenti o'ubuate tiro." (Mini airu nukau bainainiara ti bainti nahenati bira'a o'ubi baura). Mintumanta bainti nahenti o'ubura, bika eka 5000, bainti nahenti baura.
11
Ihuba pareti bira barakero Kotirara ko'erabe tibakero bainti nahenti o'ubi bariaka nimura. Nantiara habuka bata barakero boha'ara kero nimura, mintumata bika airu kara batora.
12
Bika bi karara neke mpi'a bubaro, Ihuba nai kai'a bainti tibanimiro tiharo, "Ne eka kara neha kaira ruba'uate, auriro umina bariantorabe."
13
Ihura kai'a bainti 5-nabu'ahinara pareti neha kora 12-nabu uta mpi'akora. Bainti nahenti nama mpi'a bubaro hiniki karaba a'i baura.
14
Biba bi mirikorira mintumanta bainti haheinti tabe tiha, "U'aia'ake, bi poropetiba tabae ma batarai tubireba tiba ma biba ti."
15
Ihuba tabomanta bainti nahenti bira ani raba'uke kempu kai'ake uba tiha bira bara nai kinirai'a kareka iabaro, biba bika a'irakero aihaini'a barirero bura.
16
Eraimanta bira kai'a bainti noruba namai bainaini otububura.
17
Bika botu'ira oti o'ubi Kapeniami hini bantaraini bura. (Enti baubaro Ihuba kia bika ianaini obarai'i baumanta.)
18
Bi entara nora ubai anubaro, solwara namai bano uri himpura.
19
Ihura kai'a bainti puru'a'i 5-e o 6-kiromita bubaro, Ihuba namai abu'a aniro bika botu aumanto anumanta, bika oraha etora.
20
Ibo, Ihuba bika tiba nimiro tiharo, "Terema uro! Kia ne etate tiro."
21
Bira kai'a bainti nai botu'i bira bata barikareka ubaro, totara bi botuba bireka bunaini orurora.
22
Bi entara nantiara, bainti nahenti noruba namai hini bantarai a'i baura. Bika mini baiha tabomanta Ihura kai'a bainti'ai boha botu bira'ira bura, Ihuba kia bikara hampata bura, mintumanta bira kai'a bainti'ai bura.
23
(Mintumanta hinikia botuka Tiberisiani hai bi batukara Nora bano ko'erabe tibakero pareti nimumanta no-o batukara anura.)
24
Bainti nahenti irumanta tiha Ihura batake bira kai'a bainti butura minima bariabo t umanta, bika botu hinikira'i bata barire Kapeniamini Ihurara rantareka bura.
25
Nantiara bika oru tabobaro noruba namai baira'a baumanta, bika birara tiha, "Iata bainti baubo, Are ta entare maa'a aniaro ti?"
26
Tubaro Ihuba bika uba anirantero tiba nimiro tiharo, "U'ai'akema turo, ne kiama mirikori te mintuna tababo, ne pareti nimura nara birarama ne ti rantabare aniabo tiro.
27
Kia ne kara orai'a buaina kai'a barate. Iboma ne kara nareka eka enta eka enta bariaina karara neha bariate. Minti karara bainti, bainti bano ni nimianarobe, bira nanare Kotiba bira Oba bi kai'ara nai bira amirabe."
28
Bika Ihura tibami tiha, "Tenabu nantiake-e Kotira kai'a bararabe?
29
Tubaro Ihuba bika uba anirante tiba nimiro tiharo,"Kotira kai'a mintiroma baibo, Kotiba ta baintira barakaibo tubira bira'a ne mara'ura utuate tiro ."
30
Bika bira tibami tiha, "Are mirikori mimti'e tenabu tabe ai'a mara'ura utuare? Are nanahikae mintinabe?
31
Tinabu kaiba'auka umina batana mana kara narabe. Kotira uba bano aratanu'i baintekero, Ti Oba narubai hairo pareti miro nate tirabe."'
32
Ihuba bika uba anirante tibanimiro tiharo, U'ai'akero, Moseba narubai hairo tubi pareti ni nimirabe, iboma ti Oba tabae u'a pareti narubai hairo tubira ni nimirabe.
33
Kotira pareti bano narubai hairo tubiro ma bataraini baria bainti nahentika mara'ura nimireba tubirabe."
34
Bika bira tibami tiha, "Nora baubo, are tinabu eka enta bi paretira timiane."
35
Tubaro Ihuba bika tiba nimiro tiharo, "te tentabe, te narubai haina paretibe, tabae tini aniraba kiama narara ianarobe, tabae ti'a mara'ura utiraba kiama bira aunta bano aharu'airo namai nareba inarobe.
36
Mintima, te ni tibanimuro, ne ti tabema kiama ne ti'a mara'ura utuabo
37
Eka bainti nahenti ti Oba ti timirauka, bika tini anibarabe tau baintikae tini anika, kiama te bika atitainabe.
38
Te narubai hai tuburaukabe, kia te tenta antu'a abatauro. Mintima te ti Oba tabae ti atitaimanta tubuna bira antu'ama abatarabe.
39
Ma bira ti Ora antu'abe tabae ti atitakero eka bainti nahenti timiro bika'a ra'ikiane tirobe, kiama te hinikia bainti nahentika bata a'ira karabe, te bika ekara enta a'ima uri himpikarabe
40
Ma ti Ora antu'abe, mintira eka bainti nahenti taukae Ma'u'a mara'ura utika, bika eka enta eka enta bai mara'urarama barebabe, te ekara enta bika a'ima uri himpikarabe.
41
Nantiara Juda batanaka iata bainti Ihuba tibakai ubara bika uba ra'iha bira nanare biba tiharo, "Te tenta bi paretika naruba tute tuburaukabe tura."
42
Biba minti tumanta Iata bainti bika tiha, "Bira bi Ihuba ti, bira Josepira ma'uanta banobe ti, tenabu bira noka oka tabaunabe ti. Nantiboe biba tiharo, 'Te narubai hai tuburaube tibo?
43
Ihuba bika uba anirante tiba nimiro tiharo, "Kia ne nenta abutana uba ra'uate tiro.
44
Kiama bo bainti bano tini ho anianarobe, iroma ti Oba ti atitairaba tiro homa tini anianarobe, minti'ema te bira a'ima ekara enta matimati ihai uri himpi karabe.
45
Poropeti mantiake uba araruatarabe, 'Kotiba eka bainti nahentima tiba kankoma nimianarobe.' Eka bainti nahenti taukae ti Ora uba irikama tini anibarabe tiro.
46
Kiama bo bainti bano ti Ora bata tabaibo, U'ai'ake kiabe. Iboma bainti tabae Kotirai aniraba, biba'ima ti Ora tabairabe.
47
U'ai'ake turo, bainti tabae mara'ura utiraba, biba eka enta eka enta bariaina mara'urara baranarobe.
48
Te tentama mara'ura nimibaria paretika bauro.
49
Iboma ni kaiba'auka umina batana mana kara namakema utima buabo.
50
Bi paretiba narubai hairo tubirabe, mintiboma bainti bano hinikina bira nero kiama utuanarobe.
51
Te tenata bi paretika mara'ura nimirera narubaini hai tuburaukabe. Mintiro bo bainti bano hinikira bi paretira nairaba, biba eka enta eka entama barianobe. Bi paretira nimiainara bira tenta baata bainti nahenti ma batarai hainauka nimiai mara'ura baraterabe.
52
Juda batanaka arara'iteha nai abutana uba i'oka ra'iha, tiha, 'nantia keroe ma baintiba nai baata tinabu timi'e narabe?"
53
Ihuba bika tibanimiro tiharo, "U'ai'ake turo, kia ne Bainti Ma'u baata bata nare bata narekibera, kiama ne eka ente eka enta bai mara'urara barebarabe tiro.
54
Tabae ti baata bata nare bata nairaba biba eka enta eka enta bariaina mara'urarama baranarobe, te bira ekara enta a'ima uri himpi karabe.
55
Ti baata u'a karabe ti nare u'a namai nenarabe.
56
Bainti tabae ti baata bata nare bata nairaba, biba ti'i bai'ema tere bira'i bairabe.
57
Ti Oba mara'ura baiba ti atitaimanta te bata ti Ora aikaro'ama mara'ura bauro, mintiboma bainti bano ti baata nairaba, biba bata ti aikaro'ama mara'ura barianarobe.
58
Bi paretiba narubai hai tubibabe, kia bi paretira tinabu kaiba'auka namakabo tai'a biraube. Bainti tabae bi paretira nairaba eka enta eka entama barianarobe."
59
Ihuba bi ubara bainti nahenti Kapeniamu batuka mono nabu'ira tibanimura.
60
Ihura kai'a bainti airutaha bira iri tiha, "Bi ubara tinabu tiba timira, tabae ko'ekero iribo?"
61
Bira nanare Ihuba tabomanta bira kai'a bainti bi ubara Ihuba tibako ubara uba ra'i baubaro biba bika tiba nimurabe, "Auri bi ubara turaba ni auha orai'a kantorabe, nane?
62
Nantira, ne tabaibaro Bainti Ma'u bano haru bairo tubina batukara tuburante orubira?
63
Aiho Bainti banoma mara'ura nimibaibo. Iboma kiama baata bano mara'ura nimianarobe. Eka uba te ni tibanimuna bira aihobe, biba ni mara'urama nimianarobe.
64
Mintima ne hinikiaka kiama mara'ura utuabo." Bira nanare,Ihuba haru tabakairabe bainti taukae bira'a kia mara'ura utuaka bata tabae bira bitakero nabuta nimiaina bata.
65
Mintiboma biba tiharo, ''Bihaikara baima te ni tibanimuro, kiama bo bainti bano tini nai antu'a'a anianarobe turo ti Oba tiroma biba tini anianarobe."
66
Bihaikara nantiara, bira kai'a bainti airutaha anirante bi kia bira batake nura.
67
Mintubaro Ihuba nai kai'a bainti 12-nabu irero tiharo, "Ne bata birekae iabo, nane?"
68
Saimoni Pitaba anirante bira tibamiro tiharo, Nora baubo, tenabu tabinaie birabe? Ai uba bano'aima eka enta eka enta bai mara'urara nimia narobe.
69
Tenabu mara'ura uti tabauro are Abu Abu Bainti Kotiba nariare ti bainti babe."
70
Ihuba nai kai'a bainti tibanimiro tiharo, "Te tenata ni 12-nabu kubai taurama ne bariabo, bo bano ni'i hairo ora aiho bano bira'i mpi'a biboma baibo."
71
Ihuba Judasirara tirabe, Saimoni Isikariotira ma'u, biba bira kai'a bainti 12-nabu ihainaba, tabae Ihura bitakero nabutaka nimiaina baintira