¹ Bihaikara nantiara, Ihuba nai kai'a bainti solwara namai Taiberisini nai bika numi'ora. Bi arara'a biba bika nai numi'ora. ² Saimoni Pitaba Tomasira bo autu Didimasira bata Natanierira Kana Karirini hainaba bata tara orainti Sebedi ma'u tanta bata Ihura kai'a bainti tara'anta bata. ³ Saimoni Pitaba bika tibanimiro tiharo, " Te habukarama birabe tiro." Bika bira tibami tiha, "Tebabu bata ai batakema anirabe ti." Bika botu bo'ira oru barire, bi entara'ira kia bo habuka bata barora. ⁴ Atite baubaro, Ihuba namai aubahini himpi baumanta bira kai'a bainti kia bibauma baibo ti. ⁵ Ihuba bika tibanimiro tiharo, "Ubaara baintibe, ne bohika nera bate-e bariabo tiro?" Bika bira tibami tiha, "Kiabe ti." ⁶ Biba bika tiba nimiro tiharo, "Ne nenta umpeni botu baira ka'u tanarai a'uate tiro, a'uke ne habuka hinikina bararate tiro." Mintumanta bika biba tunaini umpeni a'uke bika kia ho'aka umpeni barabari kora. ⁷ Mintubo bi kai'a baintira Ihuba bo'akero antu'ari bauba Pitara tibamiro tiharo, "Ma Nora banoe baibo tiro." Saimoni Pitaba irubaro ma Nora banobe tibo, biba nai saketi bara rumpa barero (Bira nanare biba saketi a'ini barakero baurama) biba kompurero soruara'ira otu raba'u bira. ⁸ Hinikia kai'a baintika botu'ira baiha, umpeni rarau'i botu'ira uri baubo umpeni'ira habuka bano mpi'a bura. Bika kia namai niarai baura, bika 100 mita mintiaka aumai'abi baura. ⁹ Bika namai aumanto otubi, tabobaro ihabano ite baubaro habuka bano iteharo bira'a baubaro, pareti bano bata baubaro. ¹⁰ Ihuba bika tibanimiro tiharo, "Bira habuka bate ne barataira, hinikira bare aniate." ¹¹ Saimoni Pitaba barirero umpeni'ira noranora habuka mpi'abira rarau bari kora, eka 153 habuka, ibo kia umpeni bano raperura. ¹² Ihuba bika tibanimiro tiharo, "Kara ani barate tiro." Mintumanta kai'a bainti bika eteha kia borubano bata ireha, "are tababe ti?" bika tabe tiha, biba Nora banoti. ¹³ Ihuba ani pareti batakero habuka barakero bika nimura. ¹⁴ Ihuba utiro uri himpura nantiara tara enta boha enta nai kai'a bainti nai anirantero numi'ora. ¹⁵ Bika kara namake iabo, Ihuba Saimoni Pitara tibamiro tiharo, "Saimonio, Jonira ma'u baubo, are tiriara bo'akerae antu'aruaro tubaro?" Pitaba bira tibamiro tiharo, "Eo, Nora baubo, are tabaro te ariara antu'aruna." Ihuba bira tibamiro tiharo, "Are ti sipisipi nati kara nimiane tiro." ¹⁶ Ihuba e'a bata anirantero bira irero, "Saimonio, Jonira ma'u baubo, Are tiriara antu'ae aruaro?" Pitaba bira tibamiro tiharo, "Eo, Nora baubo, are tabaro te ariara antu'aruna, "Ti sipisipima ra'ikiane tiro." ¹⁷ Ihuba taratata bohatata irero, "Saimonio, Jonira ma'u baubo, are tiriara antu'ae aruaro?" Minti tubo Pitara auha bano marai'ura, bira nanare Ihuba taratata bohatata bira irobaro, "Are ti antu'ae aruaro?" Pitaba Ihura tibamiro tiharo, "Nora baubo arema ekahika tabataro tiro, are tabaro te ariara antu'aruna."Ihuba Pitara tibamiro tiharo, "Ti sipisipi karama nimiane tiro. ¹⁸ U'ai'akema ai tibamuro, are ubara baiha, are nena utaba'a aututera are nena antu'a'ama nuaro. Iboma are noru'arai'a biro, are nena kau'u tutu kairo bo bainti banoma ai utaba'a barakero a'u mitero kia bireba inanaima ai bitakero buanarobe." ¹⁹ Ihuba bi ubara tira Pitara'a nana utirahika bano bira'a obarai'iro Kotira nora autu amiaina birara turama. Biba bi ubara tibakero nantiara Pitara tibamiro tiharo, "Ti abatane tiro." ²⁰ Pitaba tu'anatabi tabobaro kai'a bainti Ihuba bo'akero antu'ari bauba bika abatora, kara nebaubaro biba Ihura aumanto baiteharo, tiharo, "Nora baubo, tabae ai bitakero nabutaka kau'u'ira batanarobe?" ²¹ Pitaba bira tabero Ihura tibamiro tiharo, Nora baubo, bi baintiba nantie ianarobe?" ²² Ihuba bira tibamiro tiharo, te birara tiha a'i bai'e te orurante tubuainabe tiaina, bira ariana hikarae baibo nane? Are ti abatane" ²³ Bi ubaba bika atabakauka ato'ira hi'irumanta bika tiha, bi kai'a baintiba kiae utuanarobe ti. Iboma Ihuba Pitara tibamura kia biba birara utuairera tiraube. Iboma biba tiharo, "Te birara tiha a'i bai'e te orurante tubuaina tuna, bira ariana hikarae baibo, nane?" ²⁴ Bi kai'a baintiba tabae bihaikarara tibakero. Biba bihaikarara ararua tora, tenabu tabauro bira uba bano u'a baura. ²⁵ Ihuba airutaha bohika bata minturama, te eka bohau bohau hika ararua tareturo kiama batuka bi aratanura bataina baitiri.