¹ Bo bainti bira autu Rasarusira, biba aiha barora. Biba Betanini haina bainti bano, biba Mariaka, Mataka batuka'i hainaba. ² Bi Mariaba Ihura ai'u mia bahabera nohairo a'u amitero nai kauhi nohairo unka mitoba, Tabae bira ata bakaba Rasarusiba aiha baroba. ³ Tara aura nakauka bikahanta Ihurai uba barake tiha, "Nora baubo, ani tabaneti, bi baintira are bo'ake antu'ari bariaraba robarama baraibo ti." ⁴ Ihuba bi ubara iriro biba tiharo, "Kiama bi robaraba bira aru utu kanarobe kiabe tiro, biba Kotira nora autuma amianarobe, mintiroma Kotira Ma'u bano nora autu baranarobe tiro." ⁵ Bate Ihuba Matara bata bira aura nakara bata, Rasarusira bata. ⁶ Ihuba Rasarusiba robara baraira iriro biba tara enta bata mini baura. ⁷ Bira nantiara biba nai kai'a bainti tibanimoro tiharo, "anirante Judai nabu buare tiro." ⁸ Bira kai'a bainti bira tibami tiha, Iata bainti baubo ti, Juda batanaka ai'a ori a'irekama tiabo ti, mintibama are mini bireba tiaro, nanabe ti?" ⁹ Ihuba bika tibanimiro tiharo, Tenabu 12- aua nabuma boha enta batauro tiro, mintiro bo bainti bano aatitairo nuba'i biharo, kiama biba arukunta barero ru'utu buanarobe nanare biba aatitaira'a aitu iharoma buanarobe. ¹⁰ Mintiro biba enta'ira niharo arukunta barero ru'utuma buanarobe, bira nanare atairaba kiama bira'ira baibo" ¹¹ Bihaikara nantiara, biba bika tibaniro tiharo, Tinabu'iraba Rasarusiba baitateroma baibo, mintima te a'ima bira oru baitaina'ihai a'ima himpi karabe tiro." ¹² Bira kai'a bainti tiha, "Nora babo ti, biba baitatero bariare tiro, a'ima bai tirio ti." ¹³ Ihuba Rasarusiba utubirara tumanta, bika iri tiha biba baitatero baiboma tibo ti. ¹⁴ Ihuba tiba o'ai'akero bika tibanimiro tiharo, "Rasarusiba utuma baibo tiro. ¹⁵ Te niara iri te uahauro, bi entara te ni hampata kia baunarara, iboma bate ne mara'urama utibarabe." Mintima tenabu bibinai buare. ¹⁶ Tomasiba bo autu Didimasira biba hinikia kai'a baintika tibanimiro tiharo, "Tenabu Ihura batake bii mini utuare ti." ¹⁷ Ihuba ani obrai'iro, biba irumanta tiha Rasarusiba utubiro 4-entanabuma matimati'ira baibo tubaro. ¹⁸ Betani batuka bano baireba tarau bohau kiromita Jerusaremi batuka aumanto baura. ¹⁹ Juda batanaka airutaha Mataka Mariaka hampata ani baiha bikahanta auha ko'e nimitareka bikahanta atabakarara. ²⁰ Mintibo Mataba irubo Ihuba anibaro, biba biro oru bira bitakero anubaro, Mariaba nabu'ira o'ubiro baura. ²¹ Ihuba Matara tibamiro tiharo, " Nora baubo tiro, are ma'a bariare tiaro, ti atabakaba kiama uti tirio tiro. ²² Iboma te tabauro are bo hikara Kotira irairo, biba ai amianarobe." ²³ Ihuba bira tibamiro tiharo, "Ai atabakaba a'ima himpua narobe tiro." ²⁴ Mataba bira tibamiro tiharo, "te tabauro biba ekara enta Norabano utubuaka a'i himpi kaina entara biba bata a'i himpua narobe tiro. ²⁵ Ihuba bira tibamiro tihaho, "Te tentama utubuaka a'i himpikeha mara'ura nimi baria baintika bauro tiro; Bainti tabae ti'a mara'ura ututero utubiraba, biba a'ima mara'ura baranarobe tiro. ²⁶ Tabae a'i mara'ura baiharo ti'a mara'ura utiraba kiama utuanarobe. Are bira'a mara'ura utirae, nane?" ²⁷ Biba tiharo, "Nora baubo te mara'urama uturo are Karaitiba, Kotira ma'u bano tabae ma batarai tubuanobe tiababe." ²⁸ Biba minti tubo biba Mariara iha iha buru tibamiro tiharo, "Iata bainti bano aniba aima araibo tiro. ²⁹ Mariaba bira iriro, totara biba himpiro Ihu binaini bura. ³⁰ Ihuba kia batukai anirai tiro, taie Mataba oru bira tabora mini baura. ³¹ Juda batanaka Mariara batake nabu'ira baiha, bira auha ko'e amiteha. Bika tabobaro biba totara himpiro baha'ai kantero bebaromanta, bika iri tiha biba matimati'a i'i ratareba bibo tibake bika bira abatabare bura. ³² Mariaba Ihuba baira'a aniro biba bira biri tabero Ihura ai'u'ira hi'iriro tiharo, "Norabaubo are ma'a bariare tiaro, kiama ti atabakaba uti tirio tiro." ³³ Ihuba bira tabero i'i ratomanta Juda batanaka eka bira abata bare anuka bata i'i ratora, bira auha bano a'urihi taibaro biba bo'akero umpo'ura; ³⁴ biba tiharo, "Ne taie bira batabo tiro?" Bika bira tibami tiha, Nora baubo, are ani tabane ti." ³⁵ Ihuba i'i ratora. ³⁶ Juda batanaka tiha, "Tabate biba bo'akeroma Rasarusirara antu'aribo!" ³⁷ Mintimanta hinikiaka tiha, Ma bi baintiba abu impabi baintira a'i rampai kairabe, bira nantie ibo, nantiboe biba bi baintira kaibo kia utibo ti?" ³⁸ Ihuba anirantero auha'ihairo umpo'iro matimati'a bura. Bi matimatira, ori rakabuke mintiate bira enti nai ori nohai tintatora. ³⁹ Ihuba tiharo, "Mua ori enti a'ini barakate tiro. "Mintibo Mataba, Rasarusira aura nakaba, bainti utubira aura nakaba Ihura tibamiro tiharo, "Nora baubo, bira baata bano nterama bibo tiro, bira nanare biba utubimanta batabo 4-enta nabuma aitaraibo tiro." ⁴⁰ Ihuba bira tibamiro tiharo, "Te ai u'ai'akema tibamuro, are mara'ura utirera are Kotira korori tabenabe tiro." ⁴¹ Minti tumanta bika ori enti antua kabo Ihuba buru tabero tiharo, "Ti O-o, Te ariara ko'erabema turo are ti uba irianarara. ⁴² Te tabauro are ti uba iri bariarababe, mintima te bi ubara tuna bainti nahenti ti utute himpi bariakara bikara irima turo, bika anirante mara'ura uti tiha u'a are ti barakara tuburaukabe tiaterabe." ⁴³ Bira nantiara, biba naberai tibakero tiharo, "Rasarusio, bebarane tubaro!" ⁴⁴ Utubi baintiba utaba'a ai'u kau'u biri rumpe amitara batakero bebarora. Ihuba bika tibanimiro tiharo, "Utaba'a a'ini barekaibo buaire tiro. ⁴⁵ Airu Juda batanaka Mariara abatabare ani, nanahika Ihuba mintura tabe bika bira'a mara'ura utura. ⁴⁶ Minti bika'ihai hinikiaka bi buru nanahika Ihuba mintura Parisi bainti tibanimura. ⁴⁷ Pirisi iata bainti bata Parisi bata kansoli bata ani ruba'uabi uba tibake tiha, "Tenabu nantie irabe? Bi baintiba airu mirikorima minti baibo ti. ⁴⁸ Tenabu bira a'ira kairo baira, eka bira'a mara'ura utimanta Romu batanaka ani tinabu batuka bata kantari bata orai'ama kebarabe ti." ⁴⁹ Ibo bo bainti bano bika abutana baira, bira autu Kaiapasiba, biba bi ihira'i haina pirisi iata bainti bano, biba bika tibaniro tiharo, "Kiama ne bohika bata tababo tiro. ⁵⁰ Ne tabate, bo'abata ko'e'ama ianarobe bainti nahenti a'i baika utubika batuka baraibo, Kantari bano kiama orai ianarobe." ⁵¹ Kia biba nai irirahika ihairo bi ubara tiraube, kiabe. Biba bi ihira'i pirisi iata bainti baiharo poropeti uba Ihuba Juda bainti nahentiara utuaina ubara tibatora; ⁵² kia Juda batanakara'i turaube, kiabe. Ihuba Kotira baintiti eka batanai bariaka ruba'uakero bara bohai'a kareba tubirabe. ⁵³ Bi entara'a hiro biharo umanta, bika nana arae rantake Ihura arukareka ibaura. ⁵⁴ Mintubaro Ihuba kia Juda batanaka abutana nibaura, biba bira'a hiro bo kantri umina batana baura Eparemi batukabe tura'ira oru baura. Biba nai kai'a bainti hampata mini oru baura. ⁵⁵ Nora Pasoba Enta ani aumai umanta airu bainti nahenti eka Juda batanaka Jerusaremini ani ruba'umabi nai hi'ake baibaro Pasoba Enta obarai iaire tibake bika mini bura. ⁵⁶ Bainti nahenti Ihura rantabare ani, bika mono nabu'ira ori'ete bika nai abutana uba tiba biro aniro'iha tiha, "Ne nantiakee iriabo? Biba Nora Mono Enta anianoe o kiae anianobe ti?" ⁵⁷ Pirisi iata bainti bata Parisi bata kempuka uba bainti nahenti tibanimi tiha, ta baintibae o nahentibae are tabairo Ihuba taie bairera, biba bika tiba nimirama, bika bira uata barate ti.