¹ Poluba, Sailasiba, Timotiba ma bukara arantua Tesalonaika batanaka Kotira autu ata, tiri nabu Ora bata Ihu Karaitira autu ata bata. ² Kaibo ha'uru itara bata iha'a bikoka bata Kotirai hairo bata Ihu Karaitirai hairo bata tubiraba nii hampata bariaire. ³ Tenabu eka enta Norara ko'era be tiare nii tinabu ata bakaukara. Ma bira bo'abata ko'erabe, bira nanarae nee mara ura utuaba kekau bibo aii'a nii okara antu ariha bikoka borara borara nimiara bira pi'a bibo. ⁴ Minti manta tenabu wahauro tenabu boka tiba nimiha taukae Kotira nabu'i bariaka bo batanai ma battarai niarara. Tenabu nii okara iha abiha bariarara, aii'a nee mara ura utuara boka nii orai'a nimita manta. Aii'a nee aiha hika bata bararara bata. ⁵ Ma bibama Kotira abu abu ko numi'a naro. Nana haika bano obariai nara mintia kero baibo, nee homa Kotira kindomu ira ori ete babe, bira nanarae nee mara bareha bata kiabu mara ura ututara tutara. ⁶ Kotiba nai abu abu okarama numi anaro Biba mara bata aiha bira hika bata nimireba taukae nii mara bata aiha bira hika bata nimi bariaka, ⁷ aii'a mara bata aiha bata bi'ua naro bainti taukae nii bata mara baraka. Biba bihaikara mintiai nara Nora Ihuba nai ankero hampata nai aikaro ira tubiro baina. ⁸ Nora iha itainara batakero. Biba ora okara biakara nimiro bainti nahenti taukae kiabu Kotira tabaka aii'a taukae Kotira uba kiabu iri Ihura ko'e uba abatake buaka. ⁹ Bika Nora bano baina ahi niarai baiha bira aikaro ihai bata bira nora autu ihai bata, bika nora aiha bata ora hika airu enta bariainara ma bareba. ¹⁰ Biba bihaikara ma mintiro obaria naro bii entara Biba tubirama bainti nahenti bira nora autu amibara aii'a mara ura utuaka airu abu ato ma bareba. Bira nanarae, tenabu bauna aii'a tenabu uba nini tunara nee bira mara ura utuara. ¹¹ Bii okarara, eka enta tenabu niara nunamu tibauro. Tenabu mintiake nunamu turo tirinabu Nora Kotiba tinabu tabatero aii'a ko'e haika ni'ira baina iri nimitero nai arara ni'ira baira. Tenabu mintiake batama nunamu turo biba nii uri himpi baina bikokara ho'akero aii'a ko'e hika minti haro ho'a eka hika nee mara ura utuara bira aikaro batake biraini. ¹² Tenabu bihaikarara nunamu turo bira nanarae, niarara ma Nora Ihu Karaitiba nora autu maranaro. Tenabu mintia kebata ma nunamu turo naima nii nora autu nimiro nii tabero aii'a Kotika Ihu Karaitika ha'uru itara banoma nii hampata barianaro.