¹ Mana wata wage'em anona magufimi Sisiria, ben avi'i Koniliusi, bemi aruvim watayu dafikayim, Italiyu akupike . ² Bemi mono antafim bem, bey-ama'nampa maside anenefim Kotini feganti dukemi, nesu mone'i yimevem aneneyanto aki yiogi nampa magemageuram Koti'pa aguam mukewayi. ³ Wa'awami afau adeka 3 kiloki ira ewam bemi faka amonewami kaikagai mana Kotini ankero bepa yemi. Ankero bemi arama sasamemi, "Koniliasi'o"!. ⁴ Koniliasi ankeromi amonevem anom fegariure semi, " Anom waita'o, emi naiyeyanta gare,"? Ankero sasamemi mani siga, "Eni augam-muki nampa emo anene burukayimo yimewana antayanti Inarufa ofa'yanti urimi Koti wapim. ⁵ Mage mana'a wata siyikana anon-magu, Jopa mana wata avigano, ben avi'i Saimoni, ena avi'i Pita'mi. ⁶ Mana wata nampa'i bemi, ben avi'i Saimoni, bemi aneneyu'i sipisipi, meme arantaga uwarewayi, ben amai bu-nom anapa bam. ⁷ Benampa ase'eni ankero arem bimi, Koniliasi kam yogam wata nampa mana aruvim wata ben, yen yiwanapa beni yogari ewayi. ⁸ Koniliasi yiyimemi naye anenemo fawarimi, afo yiyikami Joppa bogo. ⁹ Ena wayawami 12 kiloki, akafam bewami adeka anon-magu bomi, Pita nanamuka untavemi augamukirantem. ¹⁰ Antirami, yunam narariuakevami, mana'a watayu'o yunami yukevewami, Pita mana kaimi, fakayanta amonemi. ¹¹ Amonami, Inaru ontami diyimi, mana yanta'i, anona yawarave magaga kumemi. ¹² Aupemi maside wai-wami nampa mana magaga yiranako nowayinampa, nunu age nowayi. ¹³ Naem mana aranti aremi, "Pitao, itave, arure nano. ¹⁴ Ugamifo Pita semi, " buve Anonao; nayeyare semi bu newau mana yanta'o savi ugemo faintana ugami. ¹⁵ Ugami, manawa mini aranti sem, "Naye yanta'o Kotimo manta awogu urem fawarurami, faintana ugene buseno. ¹⁶ Mini kamoreya'i fawaremi, mini yau inarufa yerarekem uremi. ¹⁷ Pitami mini kaimanoni anta yanti nesu intiri ewami, Koniliasi yiyikamo bom wata yu'i ontaga yerave itawuga. ¹⁸ Araremi yintaemo Saimoni, mana avi'i Pitami wanani yanti. ¹⁹ Pitami mini kainanti inteinte evami, Ayo aga ano sasamemi semi, amonano kamorea wata emi afakewane. ²⁰ Itave kume yenampa bono. Yenampa bira avesara buyi, naiyeyara semi siyikaunami yemo. ²¹ Afo Pitami mini watayu wapa kuntavemi semi, "manami veuno mini watamo afakewami. Yigemi nayeyara yege'ge?". ²² Yemi semi, "Mana aruvim watayuyi dafisinti ben avi'i Koniliasi, bemi atekam anta nampa Kotini feganti rukam, Juda wata-anasi awogu waya benanti sewayi mini watami Kotini ankero waya sasamidemi seyuya emi avigeya ben amapa bofanami em waya yu'i sinam mararanti, epake. ²³ Afo Pitami yibigem naupa benampa uma wage'emo. Ena wanuram itave yenampa bemi, mana'a afa'awa Joppa'ke benampa bemo. ²⁴ Ena wayawam yema fawaremo Sisaria, Koniliasi yibe'ewami, masidem be-afa'awa nampa beyi akun nampa ben adeka wayimi yararem duwantuem. ²⁵ Pitami mapim yema upegarante ewami bemi Koniliasimi yema amonaremi aifim agonyaumi dadarem Pitami anon-avi amem. ²⁶ Aka Pitami be ayaka fakare itaviakem, semi "Itavono! ekanaga ugauna watamupo" ²⁷ Pitami benampa aseve wami, naupa upevem amonami nesu wata-anasi duwantuga. ²⁸ Mani siremi siyimemi, "Yigena'o intagami, Judayuyi agewayamano a'a'o sigami mana wayi adeka bu bena, bu amonano ena magufakenami. Ugami Koti sigatemi semi manawayi-nanti abi dare saviuge, faintana busenu. ²⁹ "Minugami yige wapa yirante nesu intiri bu-yeu yigemo saram. Minugai yigemi yinta'e naiyeyara sewaunafa waya dana yinafi. ³⁰ Koniliasi semi, kamore wa'awam yakagami managanaga inami, sesimapimi sugami mukeve waunami enaka 3 kiloki mi mana wata amonaunami beni unamwadogake saminagagam setugaka itavuga. ³¹ Beni mani semi, "Koniliasi" Koti eni augam mukinti intemi emi aneneyu ose budukayimo, yimewana, Koti mini anta uwarewanayanti intem . ³² Ugafo mana'a watayu yiyikana Joppa ora veya mana watayara intao, Saimoni, mana avi'i Pitami. Mana waita mapim bemino. Bemi aneneyu sipisipi arantaga uwarewam, ben avi'i Saimoni bunon anapa'i bemi. ³³ Minugai watayu ameure siyike'i oma avige yego. Avogure ame'emo yenayanti magemi seyuya Koti augaka, wayayu intara emo Anonamano amidukam. ³⁴ Naemi Pita avaunti ogademi manisem, "Fugaugane, Kotimi mana wayini ayapa-ina bube-bemi. ³⁵ Masidem akupim mana magaga wata-anasi iyemo Kotipim fegantose dukayi nampa, ateka anta uwaremo, mini watami Koti ayiakatem. ³⁶ Yigemi inte amone-uga wayamo Isiraeli wata-anasiga'i abogu bayami sima fawaruke, arafaru maragoyanti, Jisas Kraisi-pim, masidem wata-anasiyu Ano'na ³⁷ yigemana'o intaga naye-naye anona anenemo fawarugam masiden ayapa Judia magufim, Galilike agoyantuka, Jonimo mono-nomi feyikaram mini anepai fawaruivimi siyimemo; ³⁸ aneneyu fawaremose Nasaretike Jisasi-ka'i, naye ayipikena Kotimi, bemi wasawen nanta fe'akakani Ayo aga nampa ake nampa'i, Bemi bebem avogu anta ewam wata-anasi iye'manumose wanano'mano manta saviu'yika, nayeyara Koti benampa bam. ³⁹ Seyuya amoneya inteya uga siwau mani anene Jisasi uwantukami, Juda nomagafim ba Jerusalem magufimi. Bemo aromi keka yaga aruma i'duka. ⁴⁰ Ugamifo Kotimi manta itaruka fugintike kamore waya wami yakagami, yemi amona go yanti minuga. ⁴¹ made watayu amone yaobe, yemo amone intemose omi Koti feyapa uyarukam seyuya benampa yuna nampa nonampa nafauno fuginti kemo itaviyami. ⁴² Bemi wayayu'i simemi sima fawarogo wata-anasi'pim, sega, Kotimi bemi uyademi semi bemi wata-dayim waita'uvem fawam waita nampa, fubugam waita'yu dayimatemi. ⁴³ Maside wafakem mono yogam-wata benantanami siruka, ugami masideyu bepim amakuku evam, ben avipim kumi'i yiratem. ⁴⁴ Pitami mini waya sewapimi Ayo Aga'ano maside wata-anasiyu yinoka'i kukam iyemo, wayamo sewamo intayimi. ⁴⁵ Yemo yu'mo akefagam akupikem, yimakuku-oyi, Pita nampa yemi antu'afa'ruga, nayeyara, avogu'yanta'i, Ayo Aga-anoni, Gentiliyupim wayiduka. ⁴⁶ Nayeyarafi, yemo intami, Gentiliyu enon a'fike, Anona'mano anon-avi amem. Inaemi Pita'mi siyimem ⁴⁷ "Amaka iyewa a'ao sire mono-nom bumarateye, miniyu'i Ayo Aga'i mana'marari emo, seyuya ofa'ure"? ⁴⁸ Minugami, siyikemi, Jisas Kraisi avipimi mono-nom marago. Naemi bemi intaemo yenampa mana'a wayawam yenampa wanoyanti.