¹ Ihuba bi ubara tibakero biba narubai burubi tabero tiharo, " Ti O-o bi entaba obarai'ama bibo. Nena Ma'u nora autu aminara, nina Ma'u bano ai nora autuma amiainarobe. ² Are eka aikaro bira amiaro eka bainti nahenti ra'iki taintekero, biba eka enta eka enta bai mara'urara eka bainti nahenti are bira amiarauka nimianarobe. ³ Bi mara'urara ko'ebiro eka enta eka enta bariaina mintiroma baibo, Bika aima tabebarabe, are'aima bahau bano u'a Kotiba bariaro, arema Ihu Karaitira barakaro tubibo. ⁴ Te ma batarai ai nora autu amuro, are kai'a barane tira ti timiana te ekama tai'a kauro. ⁵ Ti O-o, batebe, ti nora autu boha arakero bi autura ai'i bata ti'i bata haru kia ekahika bano obarai ubararo baintekero bariaire. ⁶ Te ma bainti nahentika ai autu numi'auro, are ti ma batarai timiarauka. Bika ai bainti nahentibe, are bika ti timiara bika ai uba tatauke uatakabe. ⁷ Bate bika tababo, ekahika are ti timiana, ai hairo tubira. ⁸ Uba are ti timiana, bira te bikama nimuro, bika bi ubara barema u'ai'akema mara'urama utuabo, bika tabebe te aikanti baura are ti atitara tubuna. ⁹ Te bikara nunabu tima bauro. Kia te ma batarai haina bainti nahentiarauma nunabu tibauro, mintima are ti timiara bainti nahentika bikarama te ninabu tibauro, bika bira ai bainti nahentibe. ¹⁰ Ekahika tunara, bira arianabe, ekahika ariana, bira tunabe, mintima te bika'ahima nora autu barebauro. ¹¹ Kiama te ma batarai bukai'ake bairabe, iboma bi bainti nahentika batai bai'ema tema ariananai urirabe. Ti O-o are Taku'irababe, nena autu'a bika ra'ikiane, bi autura are ti timianabe bika baireka boha antu bo'ara tehanta boha baunateke bariate. ¹² Te bikara hampata baiha, te are timiana autura kempuka'a bika ra'iki taunabe, te bika ra'iki tauro kiama bo bano bata kaka'ibo. Iboma bainti Baiinti banoma orai'a buanarobe, biba'i kaka'iroma Kotira uba aratanu'i bairaba u'ai ianarobe. ¹³ Te bate ariananaima anuro, minti te bi ubara batainiara tuna bira nanare, ti uahara hikabano bika'i mpi'a buanarobe. ¹⁴ Te ai uba bika nimuro, batai haina bainti nahenti bika nabutai'ama ibabariabo, bira nanare bika kia ma batarai hainakaube, te bata, kia te ma batarai hainakaube. ¹⁵ Kia te ai ireha bika ma batarai haira a'ini barakane turo, mintima te ai'a nunabu tiha bika ra'ikira orai'i baintika kia bika orai'a nimitate turo. ¹⁶ Kia bika ma batarai hainakaube, te bata, kia ma batarai hainakaube. ¹⁷ Bika nena u'a uba nohaira nena bainti nahenti bo'ara taku'u kane, bira nanare, eka uba ai uba bira u'a ubabe. ¹⁸ Boha'arakera are ti ma batarai atitaramanta tubuna, boha'ara kema te bika atitaura batai haina bainti nahenti hampata oru bariabo. ¹⁹ Bika kaha ianerabe, te tenta mara'ura ai ekara amuna bika abu abu'abi ai bainti nahenti bariaterabe. ²⁰ Kia te ma bi bainti nahenti kara'iauma nunabu tibauro. Kiabe, bika buru timanta bainti nahenti ti uba iri ti'a mara'ura utirara birarama te nunabu tibauro. ²¹ Bika boha bainti bo'ara bariaterabe, ti Oba ti'a baimanta, te bira'a bauna. Te mintiakema nunabu turo, bika tinabu'ima baibarabe, bainti nahenti bataihai mara'ura uti tiha are ti atitaramanta tuburaukabe tiaterabe. ²² Are ti nora autu timiana, te bikama nimuro, bi bainti nahentika boha antu bo'ara bariaterabe, tehanta bohai'abi baunatebi. ²³ Te bika'ira baura, are ti'ira bariana, bika bata boha antu bariaterabe. Bi arara'ama bainti nahenti bataihai tabebarabe are ti atitara tubuna, are ti antu'arina tekera bikara bata antu'aruane. ²⁴ Ti O-o, ma bika are ti timiaraukabe, te birarama antu'aruro, bika bata ti batake te bariaina batukara bariaterabe, baiha bika are bi aikarora ti timina tabaterabe. Bira nanare, ekahika bano ma batarai kia obarai'uba are ti antu'anabe. ²⁵ Ti Oba abu abu'abi bariarabe, batai haina bainti nahenti kia ai tabababe, mintima tema ai tabauro bika tabebe are ti atitara tubuna. ²⁶ Te ai autu a'ira'ama bikaini obarai'a kauro, te bo'abata mintiaima bika bokara antu'ari barabe are tiriara antu'arina teke, te bikara hampata bata bairabe."