¹ Seni Yoni, mam mac kim yicnonic ugauno beci mana afan avoguc sifactiva Gaiyusi avoguc sifactiva vapaci sarecumpe, fuga sirem benkimi sen tivacbac bemino. ² Avoguc sifactiva o, seni enani macden anecne gim avogukac be, ac bac iye maran, eyic ayo inta gim avoguc biric ono vani sugam mukecumpe. ³ Sifactiva unam ena anteckan avucavac kim bana vana mare sisimec indireci enani anon simoniecumpe. ⁴ Sena simoyegunai, ena anecneugana simoyegunai simoyiriga egaune, sen tigafandauc anteckan avucava kima baci. ⁵ Avoguc sifativa o, eni fuga sire ey araci amicde afacava unan yiyaye enafateno vaci yiyayanamino, ⁶ yeni avoguc avucavac uyinkana vani mam mackin enani siyimenone. Eni avoguc avucavac ure siyinkanani Kotin ayevan asaci benone, ⁷ nevaraino, yeni Iyenonic avic kimi benone, mapatena inimaintau pate mana anecne vac iye marenone. ⁸ Yigeunamac mini avucavac micnugan inimbaintauc uvanyinkanuna foni, yigeunamac bac fuga bayaic yogam bainta bantecumpe. ⁹ Seni afan sandaunami mam mac kinkena inimbaintau pac bimi, Diotrefesi, yenkac acnaric ugaranana ayeva bemi, yenamac iyen sivigemino. ¹⁰ Afo sena yeraeci, bena macden uvaragenin avucavaguc avogugic urec oneci, yenama gana manda bayauc sageninuc bac onantecumpe. Bena uvarenin avucavaguc amankagic iyen uankami, beni afacava unam yivicman den avogugic iyen uyinkemino. Beni yivigarana on inimbaintauc umocdu yinkaremi mam mac kinke siyinkamani mapaci demi. ¹¹ Avoguc sifactiva o, manda anda iyevac avakurono, avogugac avakurono. Iyefi avoguc anda uvarevanani i, beni Kotin indam bemino, afo manda anda uvarevanani, Kotinan iyen indigemino. ¹² Macden birivic an inimbaintauc Demetriasi nani avoguc bayauci siankenone, yeni benani senone, beni fuga baya gin avoguc bainta bemino. Yenamac baci benani secumpe, micnugemifo, eni indaganamino yenamac segunai fugan bayan secumpe. ¹³ Seni amucna anecneugan emi sandan amirani indecumpe, afo amankac yogin iyen sarantecumpe. ¹⁴ Afo seni acdekac en onarani indecumpe, en onana sen sonevanac a sirani siyimino. Iyenonic avacbac enamac bano. ¹⁵ Afacava unam baci avoguc bayankone siankenone. Seni mana mana afacavauc baci avoguc bayankone siyinkecumpe.