¹ Mai dana sinta ma afoka ein Apolosi Korini pavami, Poli mena ayo barufa doren kakan tauni Efesasi araven, mana'a disaipoli kayova mo ataruen. ² Poli beau ina'en, "iretima mumunan e'ona, ireti Kanta Aunan pemante fono?" emanten beu tiyaken, "ida ino, teti ida Kanta Aunan afova uge uno". ³ "Poli beu inaen, "Ireti intesa'e non mante fono?" Beu tiyaken, Jon baptisi maen tetin non petinten mino". ⁴ Poli evaren tiyaken, "Joni ma banta nasi non pe'antein ara bae'na Ayarafenu bakurino". Emanten banta kayo tiyan miyan mumunana ono bante iye tein tiyonpa eriyan, Tepuron tasa mumunan na ono. ⁵ Mai damu banta nasi mai bayama iniyaken, Emanten ino ano Tepuron avika non baren. ⁶ Inain, Poli ma beu anontama ayan kaiyan maen, Kanta aunan beu pima erim maen ara ara bare baya tiya maen inain ma afoka inein bayava tigami. ⁷ Emanten 12 keka ano non baremi. ⁸ Poli maen Juda gayoi mono namu mantan akona uwen mono baya banta nasi tiyami yaken Ayarafenui kingdomi van tarifara biyonta temi. ⁹ Juda kayoi ara ano akonai maen baya ida inen maen, namu baya ayarafenui baya bakurinan temino banta nasi a'ura. Ma 'a ugan Poli beu ampiran disaipol kayo avi aren oremi Tairanusi tigurufin mo Ayarafenui baya tinovan mo daini emino ena ena damu. ¹⁰ Bei kan oranara mai dorari emi, kanai en Esia bain nani banta beini baya ini 'an kamaen, mai Juda ma Griki kayo va. ¹¹ Ayarafenu kogan kakan kama dorari Poli na aupim ugami, ¹² tito davarave Poli ma pakaga'en barem maen aikayo amanina mokain maen ai'i kipa vin, namu spirit kayo maen karan are'ra en. ¹³ Mana'o kamu banta mai barufin ba maen banta kayofin namu spiriti dovare'e'iyan. Beu maen tepuron avika akona baren maen namu spiriti tiyan'ten, beu tiyaken, "Kakan tepuron avika Poli ma bei nama tiyain, tei akona va tia mai banta ampire orono." ¹⁴ Mai 7 ni banta iye ma'a avu aba bare'e'iyan nafi mai Juda a'ano banta aga fana, Bein avi Skiva. ¹⁵ Mana namu spirit beui baya everen tiyake, "Tei Tepuron afova'e, ma'e Polin afova uge uno, ireti iye fono?." ¹⁶ Namu spirit mai banta aupinke maen kaosen mai kamu banta fin oren, kaosen oferen maen beui akona arin eraven, maen beui ona kafa kafa'em maen ka ankamen, beu kakan uman barem maen mai namun ampiren oren. ¹⁷ Mino Juda va Griki kayo Efesasi ma baen kayo mai baya inemi. Beu kakanta peremi, emanten maen kakan Tepuron avi aman danian. ¹⁸ Kogon mumunan banta kayo erafu ben beui ume me tiya ama'en beui namu avu ava tiyan paman emi. ¹⁹ Kogon asafe uwaran banta kayo beui buku kayo baren me ira saremi banta nasi aura. Mai kakan moni 50,000 silva koin nira bain buku kayoi. ²⁰ Ma'a ugan Ayarafenui baya ano akona ba mino pimpa ore raen. ²¹ Poli ma Efesasi mino doran ma kipen maen, kanta Aunan ni akona ra Masedonia orin inin baren Masedonia oren Akai ore maen Jerusalemi o'unemi. Bei tiyaken, "Inain ma tei Jerusalem ba'mae Romi dere oronteu". ²² Poli maen kan doran banta Timoti ma Erastua ma Masedonia tiyatan oremi, mai banta kanan maen bein duan aya e'e iyami. Bei everen Esia mana'a damu baremi. ²³ Mai damu ma eren tarea ma bain, ida mana tito bayafi umanafi Efesas afoka en Tepuroni bakurin 'a' ida mukemi. ²⁴ Mana banta bamino, bein avi Dimitris, bei maen silivafo kapun goti ate misi uvaen maen kakan moni bare'e' iyami bei maen mana'a' kapun gotini pikisa kayoba uwaen sari iyami. ²⁵ Ma'a ugan bei mino banta ataruan iye kampun gotini pikisa uva'ena sari'e'e iyanafi, bei maen beu tiyami yaken," ireti afova uge ono teti kampun gotini pikisa uvae mae sari ure kogon moni bare'e iya." ²⁶ Ireti inire onano Efesas ana baino, mai mina Esia ankinafa ino Poli maen banta nasi a'u beren ena asa aviren oriyan, bei tiyaken, ida ena goti bamino banta ma ayampo ma uvaran. ²⁷ Teti ana ba mai pikisa mo ampire, moni barante rauno, kampun nani ni kakan mono namun Atemis ida beni akona bantin paradana andanten. Mai gotin avika Esia ba ma bararake banta nasi mono tiyan tiyain, umbaren eravinten. ²⁸ Beuma mai baya iniyaken maen, aran ita in maen kakanta ovaremi," Efesasi kayoi Atemisi mai kakan mino." ²⁹ Mino banta nasi mai kakan taunifin amino'en mino nanin banta tavaen mana kakan i'u'u namu o'en. Mai kam banta umpaken iye Masedonia ke Poli ma erigan nafi, mai Gaiusi nu Aristakusi nu'i. ³⁰ Poli maifi o'onovan kaka banta na auban orim maen, disaipoli kayo ano ayopaen ida maifin oi'nono. ³¹ Mana'a kakan banta kayo mai barufima dafikein Esia mai Poli ni arona kayo baken akona baya dan oren Poli nan idava mai i'i'u namu o'i no. ³² Mana'a banta nasi ovaren ena danasin tin ena banta nasi ovaren ena danasin ten, maifin beu kakan iniri emi, kogon mano ida beni ana afova in maifin umbaremi. ³³ Mana'a banta kayo Aleksendar tiyamen, mai banta kayo mai Judan banta ekam maen mino banta aura oremino ataru ugempin, ma'o ugan Aleksendar ayan dani en tiyan ama onovan Judan banta nasi ida beui mana ume ida bamino. ³⁴ Puraino beu afovai en mai Judan banta keka ino, mai banta nasi kakanta ovarem maen, "Efesasi kayo i Atemisi kakan mini." Pa ovaren baden oriyan kan aua oremi. ³⁵ Mai tauni a'anon banta ano sen maira pakano, bei beu tiyami yaken ireti Efesasi banta ono, mino banta nasi mino baru rake afova en Efesasi kayo i Atemisi goti nanini mono nam un mino, mai ofovai en kampun gotini pikisa ino inarufake eragen mino. ³⁶ Ireti pe afova ugen ono mai dana sinta ma'a ugan ireti idava amune mana namu avu ava beuka ono. ³⁷ Naivara mai banta kayo avire koka erefono, mi kana ida mono namun umoyani e'e iyamino, ida mikana mai goti nanin namu baya te'e iyan. ³⁸ Ma'a ugan Dimitris ma pikisa uwaran banta kayo i baya ma bantin maen, ma'a ugan ko ona inka dive mino ko inin banta kayo pe masi bamino, a'esen beui uman mana mana ano tiyan ama ino. ³⁹ Inkaifo ireti ma ena dana sinta rama baya tinte, kana ino oreva irei a'anon banta rasamo puntara no. ⁴⁰ Puraino tetimpin baya bamino ma atarufim ma banta kayo aran bari yama me ataru ugen, ida beni ana bain ataru banti mae ida baya sente uno kamani ma ina inti. ⁴¹ Bei pe tiren mino banta nasi mai ataru finke tiyanten, beu ma baru ampiren orera emi.