¹ Tosorintsi ikankeriri josoe: "kero pitsoroki; kero poperataro. Pagaitanëri pomatsigenga pijate pomanatima. Pijate Haikë. pinetse, Naro paigëmiri pobagokë ira abatakagaigiri Haisati, ora itimomentojegi, ora itimantara aisati ora igebitsite. ² Nangantaigëmiro Hai aisati itingomiegi nibekeneri ira Jerikosati aike itingomiegi, yamaika aisati iraganero ora yogantagetara irirokerai ibakate irianti pasiegi. Pogineri pogashire kara otsitage pitimomentojegi". ³ Aro ikanaka Josoe itinanaga yagaiganakeri antagaisati isorarote antabagachari kara Haikë. yamaika Josoe ikoigë 30.000 imatsigenga, ira imatsigengajegi irintisanori sintsiri ira te intsorogë, yomisotogaigëri sotora kara tsitinirikë. ⁴ Iriro ikantaigëri: "pingemisantaigena irirojegi irogasitaigëroti irogashiire oka atimomento, kara otsitagë, kerotasha piataigi jaanta yaka pitimaigiri, karari obirogegi pobetsikaigëmani. ⁵ Naaro aige antagaisati ira nomatsigengajegi ira omisantinari, eiroegi aregitetaigëmari kara itimaigirori. Aroka iromarintagai irantabagai, asigaiganakema ajogaiganakeri irirojegi ibegaigëri kara jirai. ⁶ Irisigaigabëma atsitaegigë iroti kara ajogaiganakeri ajaigë janta kara itimirori. Yamika ingantaiganake: "irirojegi irisigaitanetikima ibegaigëri kara jirai". Eroegi aroge isigaitaiganaka. ⁷ Yamaika obirojegi pisatogaiganaje kara posimanaigagari aige pagaigabëro ora itimataigara. Ira pitasorinteite iromaigëmiro ora itimomento kara pobagokë. ⁸ Aroka pagaigëro ora itimantara, obotanëma ora otaringaga. Aaro ongankema oka aroka pingankero ora ikankimira kara inibaregë tosorintsi. Pinetsaige, naro agataigëmine. ⁹ Josoe igataigëri karari iririjegi iataigë kara yogiro irogashire, aro yosimanaigaga kara Beterikë aisati Haikë, kara ikiro paba Hai. Karairi ira Josoe isamë kara tsitinirikë kara itimomentokë. ¹⁰ Josoe itinamananaka kara koniamaniga inetsaigëri ira isoraroteegi kara aroge yobetsikaga, Josoe aisati ira antyasipariegi isiraerita. Irirojigi intaigëro itimomento Haisati. ¹¹ Antagaisati ira imatsigengajegi antabagachara ira itsibaitara itinaiganaka aige iaitaigë kara itimomentokë. Irirojegi yaretamataigagari kara itimomentokë yobetsikaigaba aro itimaigabë kara tonkëgite Hai. Yamaika aiti otininaja kara inaigabë iriri aisati Hai. ¹² Iriro yagaigë 5.000 matsigenga aige yogëri kara irogashiregë kara onamikë kara ikiro paba tisimagantsi kara Betel. Aisati Hai. ¹³ Yagaigëri antagaisati ira isoraroteegi, ira obatakagaigirira yogëeri kara komategite, kara itimaigirori, irirokerai ira tojaira isorarote yogëeri kara ikiro paba kara itimomentokë. Josoe inaigëroti tsitinirikë kara otininajagë. ¹⁴ Kara ineabëri itingomi Haisati, iriro aisati isoraroteegi itinaigëri koniamaniga aro yogagaiganaka intaigëri isiraeri, katingasati otininajagëra nija jororan. Iriro, teni iragotëmate kara yogëneri irogashire ora irantaiëmari kara otsitagë itimomento. ¹⁵ Josoe aige antagaisati isiraeriegi Yomantobitaigeri ijitakeri kara itsongaigëriniri aige isigaiganaka kara te ontimëmatengani. ¹⁶ Antagaisati inasëgaigatsira kara itimomentokë ikomëtaigëri kara irageamagetaigëri, yogeataiganakeri Josoe iaite janta kara tee ontimengani. ¹⁷ Teni pairo matsingenga inëmatanatsine Haikë aisati Beterikë antagaisati yogëmagetaigëri isiraeri. Ijogaiganakero ora itimomentojegi aige teni irisitanairo kara yogemagetaogëriri isiraeri. ¹⁸ Ira tosorintsi ikankeri Josoe: "pinetsakagiro ora posatamento ora popogotira kara Haikë. Nomëmirini Haisati kara pobagokë". Josoe itinakero ora irosatamento ora ipogotira inetsakakero kara itimomentokë. ¹⁹ Ira sorarojegi osimanakenchara kara inasëgaigiri kara pini irogashire, yogagaiganaka aige isotogaiganake kara ineakeri inetsakakero irosatamento kara itimomentokë. Irirojegi isigaiganaka, ikaiganake kara itimaigirori yagaigëro aige yobotaigëro taringaro ora itimomento omanabagesata. ²⁰ Ira matsigengajegi Haisati ishongaiganaka aige inetsaigë kara itsitagë. Ineabëro ora ojenga kara pisotoengatane kara itimomentokë otinaengatanaga jonogagitekë teni kara ingenagitebataeri tesati kara iriagitebagekeri. Ira isoraroteegi isiraerita ira sigënchara kara te ontimengani ipigaigaba intaigabëri. ²¹ Ira Josoe aige antagaisati isiraeri ineaigëro ora irogashire igogë kara aroge pitaka ora itimomento kara otinajengatanaga ojenga piatategeri, irirojegi ipigaigaba aige yogaigabëri ira matsigengagegi Haisati. ²² Ira pasiniegi isorarote isiraeri, ira kanakentsira kara itimomentojegikë, isotogaiganake intaigabakeri. Ira matsigengajegi Haisati itsongaigëri isorarote isiraeri, ainta anteri kanta keronta aintasati antabëri keroka. Isiraeriegi intaigëri matsigengajegi Haisati; teni pairo kaniatamatajatsinera tesati pairi sigachanera. ²³ Teni irogiri ira itingomi Haisati yagaigëri kanianiro aige yamaigabëneri ira josoe. ²⁴ Kara itsonkeri isiraeri intaigëri aige yogaitaigëri antagaisati ira matsigengajegi Haisati, aityoni kibatsi ora tera ontimantëmatengani kara yogeabataigëriri, aige antagaisati, ira panibani iinë yogamagantaigagari irosatamento, antagaisati isiraeri ipigaiganaja Haikë. Irirojegi intantaigabakari katsebaro irosatamento. ²⁵ Antagaisati ira kamëntsira poro katagiteri, sërarijegi aisati tsinanejegi, ikaratini 12.000 antagaisati timantaro Hai. ²⁶ Josoe teni iragëtiro ibago, antagaro kara itinairo aisati kara ipogotiro irosatamento, iroti kara itsongasantëro antagaisati timagantsi Hai. ²⁷ Isiraeri paniro yagëri ira ibakatejegi aisati ora irogomentopage asi itimomento, imonkaragineri kara igagëri tosorintsi ira Josoe. ²⁸ Josoe itakero ora Hai ironti inanatsi somango. Teni pairo netsemataironera iroti yamaika. ²⁹ Yogisitikeri ira itingomi Haisati kara anchatokë iroti kara ochabinitaneri. Kara ikanake paba, Josoe igantëri iragëtiri kara yogisitikeri anchatokë ijogaigëntiri katingasati kara ositokorogë itimomento. Kara, yobëtsikaigëro mopë yosigantagaro otishi. Oka yobëtsikëga mopë otishi aiti iroti yamaika. ³⁰ Yamaika Josoe yobetsikëneri ora yamanakontari tosorintsi, ira itasorintsite isiraeri, kanta anchatosigë Ebal, ³¹ aisti ikankero ibekeneri moiseshi iromeraro tosorintsi kara igagëriri kara itimomentokë isiraeri, pibega kara osangenatari isangenaregë ipëgerira moiseshi: " irontisonori mopë, kero pairo obetsikantëmataro irobetsikamento koshoro". itinakeneri oka yogëneri otagaga tosorintsi, ipëri yogëneri kaninaro. ³² Kara, inaishegaigi ira timaigatsira isiraeri, iriro isangenagëro kara mopëgëra, yosigantagaro ora ipërira moiseshi. ³³ Antagaisati isiraeri, aisati antyasipari, abatakagagaigiri soraro aisati obetsikagobëntirira yatingaiganake antagaisati kara igajontegë tosorintsi yanabëra saseriroti aisati Levitaegi ira nataigabërora igajonte tosorintsi, ira pasinisati kibatsi aisati matsigëngajegi, aganisati atinganentsi kara anchatosigë Gerisin ira pasini aganisati yatingaiganake kara anchatosigë Ebal. Irirojegi ipimantaigëro itimomento isiraeri, aisati ikankero ibeka moiseshi iromeraro tosorintsi kara igagëri kara oparintagari. ³⁴ Kara pabisanaji antagaisati, josoe ireteneri antagaisati ora irinibare tosorintsi, aaro ingantakobentagai aisati ingisagai, aaro okanka kara osangenagari kara sangenarintsikë iragatane. ³⁵ Teni ine sangenari, antagaisati ora ikankera moiseshi, ira josoe teni iraretaigëneri kara yapatoita isiraeri, aisati tsinanejegi, aisati janegijegi, aisati pasinisatiegi konoitarira irirojegi.