¹ Ira Isiraerita ikantaikëro ora te onganinate yakëro ora yogabeta aisati ora ikogi iritsonge: Akan, itomi Carimi, itomi Sabidi, itomi Sera imatsigengajegi jodasati, yogaikë ora yogabeta aisati ikogirami iritsonge, aike ira Tosorintsi ikisëro itimomentojeki isiraerisati. ² Josoe igataikë soraro pañacha Jeriko kara aike otimanamitiro Bet aven kara isatogi paba, Beterike iriro ikantaikeri: pijataike pinetsaikero kibatsi yamaika ira serarijeki yamaika ira soraro iataikë inetsaikiro hai. ³ Ira iragatane soraro yaretaigaba itsatimakitige Josoeke ikantaigaberi: kero pigaitasitari antagaisati soraro anterone Hai. pigateni 2,000 teka 3,000 soraro anterone Hai kero pintagasitari teni intojaike irirojeki. ⁴ Yamaika igakeni 3,000 soraro, karari yomisigëtikiri soraro Haisati. ⁵ Ira sorarojeki haisati yogëni 36 soraro kara yogeabateri iroti kara onamikë itimomentojeki, karari janta pinabeta aro yogasitagari antaigatsi otisitsaike. Yamaika ira timaigatsira pongotsike itsorogasantaiganakeni iranengamentoke ijoganero isintsire isigaiganaka. ⁶ Karakenta Josoe itisarakero igitsagare. Iriro aike antyasipariegi isiraerita itiakeri kibatsipane igitokë, yogitanaka kara igajonteke Tosorintsi iroti kara ochabinitaneri. ⁷ Karakenta Josoe ikanke. Ah Tosorintsi ¿pairo pinintakagobikeri timaigatsira iromontyema antatika Joriran? ¿pairo popimantabikina ibakokë amareojeki yamaika iritsongaikenani? aityonimeri ninaitaike antatinta Joriran. ⁸ ¡ Tosorintsi! ¿pairo nangake yamai, aroke itsonkengani isiraeriegi aroke yomisigaiteri oyerijeki? ⁹ Yamaika ira kananeosati aisati antagaisati timantaigaro kibatsi ingemataigabakena. Irirojeki irabanamitaigëna ira matsigengajeki timantaro kibatsi kero ikengataigainaro nobairo. Yamaika ¿pairo pingantobitanenaro pobairo obiroka?. ¹⁰ Ira Tosorintsi ikankeri Josoe ¡pintiaima! ¿pairo pogitabitiro poboro kibatsike? ¹¹ isiraerijeki ikankero kimigaro, irirojeki teni ingantinaro kaninaro ora nigatabegari ikositena ora nogabetara. Irirojeki ikositaikena aisati yosimanakero ora igimingare, yogero ora ikositankera itsibatankero yasintara. ¹² iroti yamaika, ira isiraerita kero iganatari oyeri. Aisati isigantanaka te irantiri ogeri, irintiti kogëro iritsongenganita. Paniro nangabintsaikemi obiro iroti pitsonkero ora natsonkerome naro iriro yosimanaikiroti. ¹³ ¡Pintinanema! pobetsikaikeri pomatsigengajeki pigantiri: pobetsikaikema, pingetetaike, obiati naramani. Ira itasorintsite isiraeri ikankeni: aiti pinabeta nogabetaga aisati ora natsonkerome karari aitiro pogaikiro obiro isiraeri te raninte irantiri oyeri iroti kara iragapitairi ora yosimanakera aro iritsogankimaro. ¹⁴ Naramani okëtagetamananake, iribokaigabeni antagaisati imatsigengajegi. Ira imatsigenjegi Tosorintsi ingoigërini itomijeki. Ira itomijeki, panironaga itomigeri ira antagetiro ora te ongomeite irisiagematima patiro katingasati. ¹⁵ Irabiseni iriro ikoigëra aisati irokeroti ora ikositankera; yamaika iritogëroti, iriro, antagaisati ibango aisati antagaisati ora yasintara, tenta iriatsatiri Tosorintsi aisati ikantaikëro kimingaro isiraerijeki. ¹⁶ yamaika Josoe itinamananaka koñamaniga aike yamapëri isiraeri aityoni, imatsigengajegi, ira imatsigenga Jadasati iriro ikoigëkeri. ¹⁷ Josoe yamapëri itomijeki Jodasati aityoni aisati itomigeki Sera, iriro ikoigëke aike yamepëri itomigeki sera panironake ira sabidi iriro ikoigeke. ¹⁸ Iriro yamapëri itomijegi Sabidi, panironake aisati Akan itomi karimi, itomi sabidi, itomi sera imatsigegajegi pañacha Jodake, iriro ikoigëke. ¹⁹ Yamaika Josoe ikankeri Akan "Notomi pigomantiri kaninasati Itasorentsite isiraeri, obiro pigomantiri ora pikankera. Pigomantinaro kaninasati.¿Pairo pinte? kero posimanapitinaro. ²⁰ Akan ikaneri: aisonori nakankeri kimingari itasorintsitei isiraeri. iroro nacankero: ²¹ kara naneakeo ora yogantaro kaninarosonori igitsagare Babirona 200 igitsogi kiregi aisati paniro koboriari kiregi karari kero ipesatani aganisati kiro aike, nanebetakari aike nageri ainta nogeri kara kibatsikë aganisati ora nasintara, aintasati iyitsogi kiregi osobi. ²² Josoe ikake irogotane, isigaiganaka kara yasintarakëra ora pini ora ikositankera. Kara inetserori iniakero. Ora osimanakenchara kara yasintarikëra kara osobi aintasati iyitso kiregi. ²³ Irirojegi yaganairo ora osimanakenchara aganisati irasintane, aike yaganeri Josoe aisati antagaisati timatsi isiraerike. irirojeki yogaikabakeri katingasati Tosorintsi. ²⁴ Yamaika Josoe aike antagaisati isiraerijeki aisati iriro, yagaiganakeri Akan itomi Sera, ira kireki, ora kitsagarentsi aisati koboriari kiregi. Ira itomijegi aisati irisintoegi, aisati ibakate, ira imorane, ira iroishate, ora yasintara antagaisati aike yasintabetara yagamero antagaisati kaninagiterike akori. ²⁵ yamaika Josoe ikanke: ¿pairo pamabokinaro kimingaro? ira Tosorintsi iramapëmini kimigaro obiro yamai antagaisati isiraerijeki ibashegaikëri aisati itagaikëri. ²⁶ Irirojeki intinaikëni otisi yobetsikangaro mopë antagaro pineti iroti yamaika. Yamaika ira tosorintsi teni ingisaima. Irirotake yogankaro obairo kara piniri, iroti yamaika ojita "kaninagiteri akori".