¹ Pabisanaji tojai katagiteri, ira Tosorintsi aroge ipëri isiraeri omagoregantsi arogenta itsonke ogeri kara ishonkariri, ira Josoe aroge intyasiparige. ² Josoe ikomaigari antagaisati isiraeri, antagaisati antyasipari, ira itingomiegi soraro ikantaigëri: "aroge ñantyasiparitasantane". ³ Obirojeki pineaigëro antagaisati ora ikankero pitasorintsite antagaisati ikantabenkero timagantsipage ongonina tantagimara, irirotagenta pitasorintsite ira kisabirintaigëmira. ⁴ ¡Pinetsaige! naro pëmiro obirojegi ora pintimantaigëmara ora teraira agengani, obirojegi agaigairone irasi pomatsigengajegi, antagaisati nomaimiro kibatsi ora nitsonabegara, omarintema joriranke iroti angaregë Grande kara iki Paba. ⁵ Ira pitasorintsite iriokëmi Jotogera obirojegi iromisatogaigemini antaisati sotora iriro agëkimirone pigebitsitejegi, obirojegikerai agaigabajirone kibatsi, ara imaigagai Tosorintsi arogenta ikantaigaga. ⁶ Obirojegi pisintsitasantaige, arata pingabintsema aisati pingantemarora ora sangenatencha sangenarige irasi Hingomi Moiseshi, kero pishongiro pobagosonori aisati pomatepago. ⁷ Kero pikonointari timaigatsiri ira karataigëmi obirojegi aige pingomantagetiri ibairo pitasorintsitebage, pingantineri ora ikankimira, pobatigageretotabintimari aisati pogitabitimari pitasorintsiteegi. ⁸ Karari obirojegi pogitabintimari Tosorintsi sonori iroti pigeba yamaika pikemisantaigiriri. ⁹ Arogenta ipagëmiro obirojegi ira Tosorintsi kara, piganataigagaro okibe timagantsipage, karariobirogeji, teni patingobitaiganaje. iroti yamaika. ¹⁰ Iribokabetabema 1000 ogeri irantemini obirojegi pomisigaiteri, ira pitasorintsite, iriro pëgabentaigëmine, karari iriro, aroge ikantaigëmiro. ¹¹ Pingemisantasantaigeri, ora pinintasantaigemari Tosorintsi. ¹² Aroka pintsitataigeri aisati pogibentemarika ira inaigantsira yaka pitimaigirori iriro inaigatsinera pasi obiro. Aroka pijimentaigemari irirojegi, aisati obirojegi popatotagaigabakemari iriojegi, teka irirojegi obirojegi, ¹³ Yamaika pigotaigëni iriro pitasonrintsite kero yomisatogaigami kara pitimaigirori obirojegi. Korari irirojegi irinti patiro sibitsa aisati irogasitaigëmiro obirojegi, sibitsatsa pitsitagë aisati tochei pirogijegike iroti kara pingamaiganakeri kara pitimaigiriro kaninarige kibatsi ora ipaigëmira Tosorintsi. ¹⁴ Yamaikari nanitero antagaisati kibatsipage obirojegi pigotaige kara panengamentokë aisati ora isëre tera ongantineri kimingaro nibarintsipage ikantaigeroti kaniraro irasi Tosorintsi aroge ikantaigemiro obirojegi, antagaisati oka aregenchaga ironti pasiegi teni pairo amasitachanera. ¹⁵ Karari antagaisati irinibare Tosorintsi kara ikantaigemirori, aara ira Tosorintsi iromaigabemiro antagaisati ora te ongomeite iroti iriro kara iritsongerori ora kaninaro kibatsi ora ipaigemira Tosorintsi. ¹⁶ Ira kantemirone oka, aroka obirojegi kero pikanteneri ora ikantaigëmira Tosorintsi, ora ikantabekimiro iriro pogenerime. Oroka obirojegi pingemisantaige pasiniatibage Tosorintsi aisati pogibentaigëmari irirojegi, yamaika ingisema ira Tosorintsi ingisasantaigëmi obirojegi, aisati obirojegi pingamaigëni omanabagesata kara kaninarogë kibatsi ora ipabetemira iroro.