¹ Yamai ira Josué aroke intiasiparitasantë kara tosorintsi ikankëri: aroke intiasiparitasantanë karari aiti tojai kibatsi ora terai oneengani. ² Irari oka kibatsi aitirokerai, omakaro kibatsike irasi firisteosati aisati omakaro irashi jesoritaeki. ³ (Irooti shihokë aikero kara onamike Egipto kara isotakanpinti paba aisati kanta ikebatsiteke kananeosati; ira 5 tinkomitatsi kara jiristeokera ikebatsiteke Gaza, Asdod, Ascalón, Get aike Ecrón, kara ikebatsiteke irashi aveos). ⁴ Kara komategintekë kara aitiro ora ikebatsite kananeosati, aro Mehara okaragitetiro sidoniasati irooti Afec, otsipataro ikebatsite amoreos; ⁵ ora ikebatsite irashi giblitas, antagaisati irashi Líbano aisati kara ikeni paba, irooti Baal Gad osobi kara antsatosi Hermón irooti Lebo Hamat. ⁶ Aisati, antagaisati ira timaikatsi ikebatsiteke irashi Líbano irooti Misrefot Maim, ikonoigari antagaisati imatsigenga Sidón. Aro yaganëri kanta katingasatikë isoraroteeki irashi Israel. ⁷ Pobetsikasantaigema arota asintasantimaro kibatsi ora ibagai Israel ora akasantëra, kara igakina. Pomaketiri arosata kibatsi ora ibakai ira irirai imatsigengajeki aisati timatsi imatisgengajeki irashi Manasés. ⁸ Ira basini akanisati imatsigengajeki irashi Manasés, ora rubenitas aisati kaditas ipëri ora irashi Moisés kara isotokapinti kara nijake Jordán, ⁹ irooti Aroer, timatsi onamijakë angaare Arnón (aisati poeboro ora inatsi akanisati antsatosi irooti tokagarigë), Medeba kanta janta kerai ora Dibón; ¹⁰ antagaisati ora poeboro irashi Sehón, itingomi irashi amoreos, ira tingomibiritiri Hesbón, irooti kara ikebatsiteke ira amonitasati; ¹¹ Galaad, ikebatsiteke jesoritas aisati maacateos, antagaisati antsatosi tongakari Hermón, antagaisati Basán irroti Salca, ¹² antagaisati itingomi irashi Og kara Basán, aisati itingomi Astarot aisati Edrei (irirotake panibanitatsi refaitas) Moisés itsonkeri iriro. ¹³ Ora ipoeborote Israel teni otsonkema irianti jesoritas aisati maacateosati. Teni iritsongema irirojeki, Gesur aisati Maaca itimake kanta ipoeborotekë irasi Israel irooti yama itimake. ¹⁴ Irari ira imatsigengajeki Leví teni imeri ikebatsite irianti Moisés iriro ankentsi. Ora ipëri tosotintsi Israel, itakeneri ora yasintara aro ikankeri tosorintsi Moisés. ¹⁵ Moisés ipaikeri ora yasinka aisati imatsigengajeki Rubén, imonkarataigakari ira ikantasantaikëri iriro. ¹⁶ Ora ikepatsite irasi Aroer, kara onamigakë nija jitacha Arnón, ora poeboro inatsi aganineni otitsi kaninakiterokë antagaisati Medeba. ¹⁷ Rubén yakëro kibatsi jitacha Hesbón, antagaisati oka poeboroka inatsi kaninakiteri, Dibón, Bamot Baal, aisati Bet Baal Meón, ¹⁸ ira Jahaza, aike Cademot, aisati Mefaat, ¹⁹ aisati Quiriataim, aisati Sibma, aisati Zaret Sahar aisati kara otisitëmati kaninagitero. ²⁰ Rubén aisati ipëri ira Bet Peor, kara okarakitepë tongakari jitacha BetJesimot, ²¹ antagaisati oka poeboro jitacha meseta, aike antagaisati tingomitatsi kara Sehón, antagaisati inatsi amoreoske, antagaisati timaigatsi kara Hebón, Moisés yakaitakanakeri antagaisati imatsigengajeki inaikatsi Madián, Evi, Requem, Zur, Hur aisati Reba, aisati itingomi Sehón, timatsi kibatsikë. ²² Kara poeborokë irasi Israel aisati yogankari isapirite ira Balaam itomi Beor, ira ogometaro ora pasinipake, ikarataikeri ira ogankentsi. ²³ Ora ikebatsite imatisgengajeki Rubén kanta nijakë Jordán; aisati kara okarapë. Oka ikebatsite imatsigengajeki Rubén, ipaikëri paniropake ora intimantaikema. ²⁴ Iroro ipanakeri Moisés imatsigengajeki Gad, imonkarakero ikantasataikëri iriro: ²⁵ iroro ikebatsite irasi ira Jazer, antagaisati ipoeborotekë ira karasati aganisati ikebatsite irashi amonitasati, irooti Aroer, ira timatsi pomontya kara Rabá, ²⁶ kara Hesbón irooti Ramat Mizpa irooti Betonim, irooti Mahanaim irooti ikebatsite Debir. ²⁷ Kara otisitemati, Moisés ikankeri Bet Aram, Bet Nimra, Sucot aisati Zafón, ira panibani tingomitatsi Sehón, aisati tingomitasti Hesbón, aisati kara opaniaka ikebatsite Jordán, aisati ora ikebatsitekë irooti komate onamijapë Cineret, kanta jekakeronta Jordán. ²⁸ Irorotake ipaikëri imatsigengajeki Gad, imonkarakero ikantasantëri iriro kanta ipoeborotekë janta. ²⁹ Moisés ipaikëri ora yasinta aganisati imatsigengajeki ira Manasés. Iake irasintimaro akanisati imatsigengajeki Manasés, ikenka iromonkarakero ikantasantakëri. ³⁰ Kara ikebatsiteke irooti Mahanaim, antagaisati Basán, antagaisati Og itingomi Basán, antagaisati kara poeborokë irasi Jair, ora inentsi kanta Basán, 60 poeboro, ³¹ akanineni kara Galaad, aisati Astarot aisati Edrei (poeboro kara itingomi ika Og kara Basán). Aro iake irasintemaro ikantasanteri ira Maquir itomi Manasés (aganisati imatsigenga Maquir, ipëri paniropake ira imatsigenga). ³² Iroro oka yasinta ipaikëri Moisés ora ipëri iraeki igageri kara okaninaketi kara Moab, kanta keronta Jordán irooti Jericó. ³³ Moisés teni iromeri yasinta ira imatsigenga Leví. Ira itosorintsite Israel, irorotake ipëri irasitimaro, irasisonori ikantaikeri irojeki.