¹ Yesu arifumineko no kuya ku nkende ya Yuda kwi shirya rya kimana wa Yodani, ne kintu bwingi nakabiri kyaishire kuri yee. Nakabiri arikubafunda ryonse, arikubasambarisha na kambi. ² Eryo aba Farise barishire pakuti ba mweshe batendeke ikwipusha, ''Bushe kyarisuminishiwa umurume ukureka umukashi wakwe?'' ³ Nao abaswike, ''Kindo Mose amikonkomeshe?'' ⁴ Barandire ati, ''Mose arisuminishe kuti umwaume kuti aremba inkarata yakurekana no kumutamfya.'' ⁵ ''Nipamurandu wa ku kosa kwa mitima Yenu,'' Yesu arandire kuri boo. ⁶ ''Rero ukufuma kububumbo, Resa abumbire umwaume no mwanakashi.' ⁷ 'Pari uyu murandu wine umwaume akasha wishi na nyina, no kuya aampana no mukashi wakwe, ⁸ nabo babiri bakaba umubiri umo. 'Eico abo tababiri, rero bari umubiri umo. ⁹ Emukutira ikyo Resa arandundanya, umuntu ekirekanya.'' ¹⁰ Iryo bari mu ng'anda, abakonshi bakwe ba ramwipusha pari uyu murandu. ¹¹ Nao arandire kuri bo ati, ''Onse uwareka umukashi wakwe no kupa umbi ninshi akita ubukende kuri uyo mwanakashi. ¹² No mwana kashi nga asha umurume wakwe aupwa ku mwaume umbi; ninshi akita ubukende.'' ¹³ Eryo batendekere umukumuretera bana banono ukuti abekate; Reor abakonshi bari bakenye. ¹⁴ Nomba iryo Yesu aishibe iki tatemenwe no kuranda ati, ''Suminisheni abana banono bese kuri nebo; basuminisheni, pantu ubufumu bwa kwa Resa bwa abo abakuba nga aba. ¹⁵ Nko mweba nati, onse uutapokerera ubufumu bwa kwa Resa ngo ngo mwana munono kishinka takengiremo.'' ¹⁶ Awe asendere abana mu maboko yakwe arabapara ninshi akobika amaboko yakwe pari boo. ¹⁷ Iryo atendeke uburendo bwakwe umwaume aishire akobutuka no kufukama kuri yee no ku mwipusha, ''Mwe kasambirisha musuma, ''Kindo mfwire ukukita pa kuti ni ngengira mu bufumu bwa muyayaya?'' ¹⁸ Yesu arandire, ''Nindo wankutira umusuma?'' Takwaba umusuma nangu kanofye Resa eka. ¹⁹ Warishiba amafunde: 'Wiraipaya, wirakita bukende, wiraiba, wiraba kambone wabufi, wirakengerera abanobe, urekindika wiso na noko.'' ²⁰ Umwaume arandire ati, ''Kasambirisha, ifi fyonse ndafikonka ukufuma fye ku bwaike bwandi.'' ²¹ Yesu arimuroreshe no kumutemwa. Arandire kuri yee ati, ''Ikintu kimo ikyo waburisha. Uringire ukushitisha fyonse ifyo wa kwata no kupera aba busu no kukwata ikipao mu muru. Eryo wise, no kunkonka.'' ²² Rero aya mashi yari muretere uburanda, kabiri arifuminepo ninshi naikatwa uburanda, pantu arikwete ifikwatwa ifingi. ²³ Yesu aroreshe konse konse nokuranda ku bakonshi ati, ''Kyaryafya kuba bafyuma ukwingira mubufumu bwa kwa Resa!'' ²⁴ Rero abakonshi bakwe baripapire pa mashiwi yakwe. Rero Yesu arandire kuri boo, ''Mwe bana kya kosa shani! Ukwingira mubufumu bwakwa Resa! ²⁵ Kyayangukapo ingamira ukupura murinso rya nshindano ukukira uwafyuma ukwingira mubufumu bwakwa Resa.'' ²⁶ Baripapire papakaramba baraeba abati, ''Eryo ni nani enga pusuka?'' ²⁷ Yesu abaroreshe, nokuranda ati, ''Ku bantu takiri ikya yanguka, rero tekuri Resa. Pantu fyonse fyariba ifya yanguka kuri Resa.'' ²⁸ Petero atendeke ukuranda kuri Yee ati, ''Roresha, twarisha fyonse no ku kukonka.'' ²⁹ Yesu arandire ati, ''Kine kine nkoranda kuri mwebo nati, takwaba nangu umo uwasha ing'anda nangu bandume nangu bankashi nangu banyina nangu abana nangu impanga pamurandu wa nebo ne mbiransuma ³⁰ uutakapokerere imiku umwanda umo, pari ino nshita muri no isonde: amayanda bandume bankashi ba nyina abana elo ne nkende, no kupakaswa, na mukyaro ikireisa, umweo wamuyayaya. ³¹ Rero abengi abantanshi bakaba abanuma, na bakunuma bakaba abantanshi.'' ³² Bareya mu musebo warorere ku Yerusalemu, na Yesu areya pantanshi yabo. Abantu baripapire, na bonse barebakonka ku numa baryumfwire umwenso. Nakabiri Yesu asenda abe kumi na babiri pambari no kutendeka ukubeba ifiri no kumukitikira bwangu. ³³ Boneni, tukoya ku Yerusalemu, no mwana mwaume wa muntu arinokuperwa ku ntungurushi sha bashimapepo na bakaremba. Bakamupingwira ukufwa no kumupera ku bena fyaro. ³⁴ Bakamurengurura no kumusaka amate no kumuropora, no kumwipaya. Rero panuma ya nshjiku shitatu ari no kubushiwa.'' ³⁵ Yakobo na Yohani, abana baume bakwa Zebedi, baishire kuri yee nokutira ati, ''Mwekasambirisha, mutukitire kyonse ikyo twara muromba.'' ³⁶ Abebere ati, ''Kindo mukofwaya ukuti mikitire?'' ³⁷ Barandire ati, ''Tusuminisheni tukekare mu bukata bwenu, umo ku kuboko kwenu ukwa kukuryo na umbi kukuboko kwenu ukwa kuri kipiko.'' ³⁸ Rero Yesu abebere ati, ''Tamwishibe ikyo mukoromba. Bushe kuti mwana muru kombo uro naranwamo, nangu ukubatishiwa urubatisho uro nkobatishiwako?'' ³⁹ Barandire kuri yee ati, ''Turi abaiperesha ukunwa.'' Yesu arandire kuri boo ati, ''Urukombo uro nebo nkonwinako, na mwebo mukanwa, no rubatisho uro nkobatishiwako, na mwebo mukabatishiwako. ⁴⁰ Rero ukwikara ku kuryo kwandi nangu kurikipiko kwandi te nebo mpera, rero nyabo abo kyapekaniwirwa.'' ⁴¹ Iryo abakonshi ikumi baumfwire ifi, barifurerwe Yakobo na Yohani. ⁴² Yesu abetire bonse kuri yee no kubeba ati, ''Mwarishiba ukuti abatungwa uku intungurushi sha bena fyaro barabakimfya, na bakaramba babo bakosha urupaka pari boo. ⁴³ Rero takyakabere muri iinshira kuri mwebo. Onse uukofwaya ukukira ababiyo abe umusha wa babiyo, ⁴⁴ na onse uufwaya ukuba uwa ntanshi muri mwebo afwire ukuba umusha wa bonse. ⁴⁵ Pantu umwana mwaume wa muntu taishire pakuti baremubombera, rero mukubombera, nokupera umweo wakwe ukuba ipusukiro ku bengi.'' ⁴⁶ Baishire ku Yeriko. Iryo barefuma mu Yeriko pamo na bakonshi bakwe ne bumba irikaramba, umwana mwaume wakwa Timeyasi, Batimeyasi, impofu karomba, aikere pambari yanshira. ⁴⁷ Iryo aumfwire ukuti ni Yesu umwina Nazareti, atendeke ukupunda ati, ''Yesu, umwana mwaume wakwa Davidi, mbererni uruse. ⁴⁸ Bengi barimukaripire impofu, ukumweba ti ikara tondoro. Rero akiriremo no kutwaririra ukupunda ukukirisha ati, ''Yesu umwana mwaume wakwa Davidi, mbererni uruse!'' ⁴⁹ Yesu atarama no kumweba ukuti etwe. Bakutire impofu, abati, ''Kosa! Ima! arekukuta.'' ⁵⁰ Aposere ikya kufwara kwakwe pa mbari, no kwima bwangu bwangu no kuya kuri Yesu. ⁵¹ Yesu amwaswike na okuranda ati, ''Nkindo ukofwaya unkukitire nebo?'' Impofu ya aswike ati, ''Kafundisha, nkofwaya ukubona.'' ⁵² Awe Yesu arandire kuri yee ati, ''Kabiye. Ikiketekero kyobe kyakuposha.'' Apo pene aribwene na kabiri, no kumukonka munshira yakwe.