¹ Nomba pakupwa kwe Sabata ikyunguro kasuba ubwakukya ubushiku bwantansi ubwa murungu, Mariya Magadara na Mariya umbi baishire mu kumona akaburi. ² Boneni, kwariko ikinkukuma ikikuru, pantu maraika wa kwa Shikuru arefuma mu muru, ukwisa no kukunkurusha iribwe, no kwikarapo. ³ Ukumoneka kwakwe kwamoneke kwati ninkuba, ne kyakufwara kyakwe ikyabuta nge mfura. ⁴ Bamaronda bari tekene ku mwenso no kuba nga bantu bafwa. ⁵ Bamaraika bamonekere abanakashi no kuranda kuri bo, "Mwisakamana imwe, pantu ningishiba ukuti merefwaya Yesu, uwatanikwe. ⁶ Tari kuno, rero nabuka, ngefyo arandire. Iseni mubone inkende aparere Shikuru. ⁷ Kabiyeni mwendeshe no kweba abakonshi bakwe, 'Nabuka ku bafwa. Boneni, namitangirira ku Gariri. Eko mukamubona.' Boneni, nimyeba kare." ⁸ Abanakashi bwangu bwangu bafuma ku kaburi ku mwenso ne nsansa ishikaramba, no kubutuka urubiro mukweba abakonshi bakwe. ⁹ Boneni, Yesu aribakumenye no kuranda,"Mwaporeni!" abanakashi baishire, no kwikata ku makasa yakwe no kupepa. ¹⁰ Eryo Yesu arandire kuri bo, "Mwisakamana. Kabiyeni mwebe bamunina bekare mu Gariri. Bakamona nebo." ¹¹ Nomba iryo abanakashi bareya, boneni, bamo bamaronda barire mu musumba no kweba bashimapepo bakaramba fyonse ifintu ifyakitike. ¹² Iryo bashimapepo bakumene na bakaramba no kuranshanya umurandu wabo, bapere impiya ku bashirika ikipendo ikikuru ¹³ no kubeba,"Karandeni kuri bambi, abakonshi ba kwa Yesu baishire ubushiku no kwisa senda umubiri wakwe ifwe ninshi naturara.' ¹⁴ Nga kyakuti bafisha umurandu kuri kateka, tukamunakirisha no kuposa imwe ku numa." ¹⁵ Awe abashirika basendere impiya sno kukita ifyo babebere. Nentumi iyi yasarangene mu baYuda monse no kufika irero. ¹⁶ Rero abakonshi ikumi rimo na rimo baire ku Gariri, ku rupiri Yesu abarangire. ¹⁷ Iryo ba mumwene, barimupepere, rero bamo baritwishika. ¹⁸ Yesu aishire kuri bo no kubeba no kuranda, amaka yonse yaperwa kuri ine aya mu muru na pe sonde. ¹⁹ Eikyo kabiyeni no kupanga abakonshi mu kyaro kyonse. Mukarebabatisha mwishina rya kwa Taata, Umwana na muri Mupashi wa Mushiro. ²⁰ Mukabafunde ukukonka ifintu fyonse ifyo namikonkomesha. Boneni, nkaraba nenu ryonse, mpaka nakumpera ya kyaro."