Ipepo lyakwa Mose umubomfi wakwa Lesa ¹ Apo inkulo shabelako we Yawe, ni muli iwe twaikalila. ² Ilyo impili tashilabumbwa, ne sonde lyonse talilabako, ukufumafye pe na pe niwefye Lesa. ³ Ulabwesesha abantu ku lukungu, walanda nokuti, “Bwelelenimo ku lukungu imwe mwe bana ba bantu.” ⁴ Pantu imyaka ikana limo mu menso yobe yabafye ngo bushiku bumo ubupitile, nga filya inshita yakulonda ipita mu bushiku. ⁵ Ulakululula abantu mu nda ya tulo twa mfwa, babafye ngo mulemfwe wa cani uulemena ulucelo, ⁶ uwakuti akacelo cilya wamena no kululumuka, icungulo ninshi wabonsa no kuma wauma. ⁷ Nefwe efyo ubukali bobe butucita, ne cipyu cobe cilatutiinya nganshi. ⁸ Kuli iwe ifibi fyesu fyaba pa lwalala, ne fyabubifi fya mu bumfisolo fyesu fyabafye pa mbilibili. ⁹ Inshita ya bumi bwesu ulaipifya pa mulandu wa cipyu cobe, ubumi bwesu bulukafye ngo kwisha icefu. ¹⁰ Inshita ya bumi bwesu ibafye imyaka amakumi cine lubali, abamaka ebafika ku myaka amakumi cine konse konse, lelo imyaka yonse apo yapela ituletelafye amasakamiko na macushi, no kupita bwangu, mpaka twafwa. ¹¹ Bushe nani engeshiba apapelela ubukali bwa cipyu cobe, nangu apapelela amaka yobe aya kutiinya kobe? ¹² Eico uletufundako pakuti twaishiba bwino ubwipi bwa nshiku shesu, no kulenga tulekwata imitima yamano. ¹³ We Yawe uleshikatalako. Bushe ici kuti capelela kwisa? Ulebelelako ababomfi bobe uluse. ¹⁴ Utulenge ukusekelela ukutemwa kobe ukushipwa cila lucelo,epakuti tuleanga no kulasansamuka inshiku shonse. ¹⁵ Uleke inshiku shesu ish akusansamukamo shilingane nesho twaculilemo, shilingane na pa bwingi bwa myaka iyo twaculilemo. ¹⁶ Leka ababomfi bobe bamone ifyo ulebabombela, na bana babo nabo bamone ifyo wacindama. ¹⁷ Uleke uluse lobe we Yawe lwise pali ifwe, upaale ne milimo ya minwe yesu, ee, cacine upaale imilimo ya minwe yesu.