¹ Ipepo lyakwa Davidi. Unkutike we Lesa kabili unjasuke, ² pantu ine ndi mulanda kabili ndi mubusu. Ubake umweo wandi pantu naliipeelesha kuli iwe, umpusushe ne mubomfi obe, we Lesa wandi, pantu natetekela muli iwe ³ Umbeleleko uluse we Mfumu, pantu nkuuta kuli iwe akasuba konse. ⁴ Nsansamushako ine ne mubomfi obe we Mfumu, pantu ni kuli iwe eko ndosha umweo wandi. ⁵ Uli wamutembo, kabili ulabelela uluse we Mfumu, walikwatisha icitemwiko icishipwa kuli bonse abakuuta kuli iwe. ⁶ Kutika kwipepo lyandi we Yawe, ⁷ umfwa inkumbu mu kupapata kwandi. Pa bushiku nkacula nkalilila kuli iwe, pantu iwe ukanjasuka. ⁸ We Yawe ala takwaba Lesa umbi uwaba nga iwe, awe takwaba nangu umo uwingacita ifyo ucita. ⁹ Imishobo yonse iyo wabumba yakulaisa mukupepa pa cinso cobe we Mfumu, bakaleta ululumbi kwishina lyobe. ¹⁰ Pantu uli wabulamba, Lesa uucita ifipapwa, kabili wekafye niwe Lesa. ¹¹ We Yawe umfunde inshila yobe elyo nkalaenda mu cine cobe, uloshe umutima wandi kuli iwe, pakuti mbe na katiina kwishina lyobe. ¹² Ine nakulakulumbanya no mutima wandi onse we Mfumu Lesa wandi, no kulacindika ishina lyobe pe na pe. ¹³ Pantu ukutemwa kobe kuli ine kukalamba nganshi, ine walimpususha mu calo ca bafwa umwashika nganshi. ¹⁴ Nashinjimina inkakashi sha bantu we Lesa, ibumba lya bantu ababula uluse lilefwaya ubumi bwandi, bantu abashakucindika. ¹⁵ Lelo iwe we Mfumu uli Lesa waluse ne cikuku, uushifulwa bwangu, kabili uwafulamo icitemwiko icishipwa ne cishinka. ¹⁶ Walukile kuli ine no kumbelela uluse, unkoshe ne mubomfi obe ku maka yobe, mpusushako ne mwana wa mubomfi obe umwanakashi. ¹⁷ Nangilila icakumwenako ca busuma bobe we Yawe, uleke abalwani bandi bamoneko, ne nsoni shibekate, pantu niwefye ungafwa no kuntalalika.