¹ Witalala tondolo we Lesa, wikutumanafye we Lesa, nangu wiikala shilili. ² Pantu mona abalwani bobe ifyo balulunkene, nefyo abakupata batongomwene imikoshi. ³ Balepangana ifyakucita abantu bobe mu bucenjeshi, balepangila abantu abo usunga baleti, ⁴ “Iseni tulofye umushobo wabo, pakuti ishina lya bwina Israeli kwikaba uwakulibukisha.” ⁵ Bapangana no mutima umo, nabapangana ukwisa kulwisha ⁶ E bena Edomu, na bena Ishimaeli, abena Moabu na bena Haga, ⁷ pamo pene na bena Gebali, abena Amoni, abena Amaleki, Abafilisiti na bena Turi. ⁸ Na bena Asria bene nabampana nabo, pakukosha uluko lwakwa Loti.(Selah) ⁹ Ubacite ifyo wacitile abena Midiani, ifyo wacitile kuli Sisera na Yabini pa mumana wa mukuku uwa Kishone. ¹⁰ Abalobele pa Eni Dori, abasangwike ifisoso fya pa mushili. ¹¹ Ucitile abakalamba babo ukuba nga Orebu na Seebu, ne ntungulushi shabo nga Seba na Salimuna. ¹² Abatile abati, “Natupoke icalo cakwa Lesa ica mulemfwe wakucemenamo cibe cesu.” ¹³ Ubolule nga kankungwe we Lesa wandi, babe nge misungu iyasendwa no mwela. ¹⁴ Filya umulilo oca umutengo, no lubingu pa mulu wa mpili, ¹⁵ efyo ubakunkunike kuli kankungwe, kabili ubapeshe ku cimwela. ¹⁶ Uleke insoni shibawe pa menso, pakuti bafwaye ishina lyobe we Yawe. ¹⁷ Uleke babe ne nsoni pe no mwenso uukalamba, bakafwe imfwa iya musebanya. ¹⁸ Uleke beshibe ukuti niwe weka uwitwa ishina lya Yawe, ukuti niwe Lesa Mukulu ponse pano pesonde.