¹ Ulwimbo lwakwa Asafu. Mukushinikisha, Lesa musuma ku bena Israeli, ku bantu ababa ne mitima iyakaele. ² Lelo ine nalifye mupepi no kuwa, amakasa yandi yapene ukushelemuka. ³ Ine nalekumbwa abafikansa, pakumona ukuti ababifi ebali abakankala ⁴ Bena tabakwata icibacusha, imibili yabo yabumi, kabili iyamaka. ⁵ Tabacula nga filya ficula abantu bambi nakalya, tabakwata ne fyakubasakamika, nga filya abantu bambi bakwatako. ⁶ Eico kanshi bena bafwala icilumba ngo bulungu bwa mu mukoshi, ne fyongofye bena e laya bafwala. ⁷ Mu mitima yabo iyabipisha emufuma ifyabubifi, ifyakutontonkanya fya mu mitima yabo ifibi tafyakwata impela. ⁸ Bena balatumfya abanabo no kusosa ifibi, baba ne filumba, ne mitima yakucusha abantu bambi. ⁹ Pa tunwa twabo balanda ifyakupontela umulu, kabili indimi shabo shilanda ifyakubepaika aba pano isonde. ¹⁰ Cilenga na bantu babo ukwalukila uko bali, no kwamba ukusumina ifyo balebeba. ¹¹ Bena basosa abati, “Bushe Lesa kuti aishiba shani?” “Bushe Lesa Mukulu kuti aba uwakwishiba?” ¹² Ifi efyaba abantu babifi, tabasakamana nelyo cimo, bena lyonse bakabilafye ukunonka. ¹³ Mu cine ine njicushafye pakusunga umutima wandi uwasanguluka, kabili naicushafye pakulasamba iminwe yandi mukwenda uwakaele ¹⁴ Ndi muntu uucula akasuba konse, kabili umuntu uusalapulwa cila kacelo. ¹⁵ Ntila nati, “Kanande ngomo balya balandila,” nga nalyalukile abana bobe. ¹⁶ Eico ine naeseshe na maka ukuti njishibe umo cilolele, nomba cali icayafya kuli ine. ¹⁷ Mpaka ilyo naingile mu cifulo camushilo icakwa Lesa, elyo naishiba bwino impela yabo. ¹⁸ Cine cine umwatelela emo wababika, niwe ubakunkisha pakuya mukuloba. ¹⁹ Yangu bapumikishiwa pakuloba, umwensofye wabo eubonaula. ²⁰ We Yawe ala bapwa, nge ciloto filya cipwa ilyo umuntu abuuka, efyo ukasuula na ku cimpashanya cabo. ²¹ Ilyo umutima wandi waiketwe ubulanda, no mupashi wandi walicushiwe nganshi, ²² nayalwike uwabula amano kabili uushaishiba, na pa cinso cobe nalifye nge nama ya mpanga. ²³ Lelo lyonsefye niwe tuba nobe, kabili lyonse niwe unjikatililako no kuboko kobe ukwa ku kulyo. ²⁴ Amano yobe eyantungulula, na pakulekelesha ukampokelela mu bucindami bobe. ²⁵ Nga ni nani umbi nakwata mu mulu ukucila pali iwe? Na pano isonde tapaba uo ningafwaya ukucila pali iwe. ²⁶ Umubili wandi no mutima wandi kuti fyatompoka, lelo we Lesa wandi niwe maka ya mutima wandi, kabili icakaniko candi ica pe na pe. ²⁷ Bonse abakukaana bali nokuloba, ulalofya bonse abakaana icishinka cobe. ²⁸ Lelo ine nalitemwa ukupalamina kuli Lesa, nalicita ukuti we Mfumu Yawe niwe ube icubo candi, pakuti cinenge no kulanda pa ficitwa fyobe fyonse.