Kuli kembisha mukalamba. Ulwimbo lwakwa Davidi. ¹ Calilinga abantu balekulumbanya mu Sioni, we Lesa, emo balefikilisha na fyonse ifyo bakulaya. ² Pantu ulomfwa amapepo, abantu bonse bakulaisa kuli iwe. ³ Ilyo ifibi fyatwanshishe walitubelele uluse pali bumpulamafunde bwesu bonse. ⁴ Balishuka abo wasala no kubapalamika kuli iwe, pakuti babe abakwikala mwisano lyobe. Twakulaipakisha ifintu fyonse ifisuma ifya mu ŋanda yobe, mukati ke Tempele lyobe ilyamushilo. ⁵ Ulatwasuka mu bulungami ukupitila mu fisungusho, we Lesa we pusukilo lyesu, Abantu bonse aba pano pesonde, na bonse ababa kwishilya lya bemba, batetekela muli iwe. ⁶ Niwe waimike impili ku maka yobe, pantu waliipangasha na maka yobe ayakalamba. ⁷ Niwe utalalika icilulumo ca bemba, no kushulumuka kwa mabimbi, ne congo conse ica mishobo. ⁸ Icakuti aba pano isonde abekala ukutali baikatwa umwensopa mulandu wa bukulu bwa fintu ucita, pantu ukufuma ukwatula akasuba ukufika uko akasuba kawila, ifyo ucita filenga abantu ukwaula utupundu. ⁹ Niwe upempula icalo no kuciletela imfula, ulenga ukuti cileba icikankala mu misango yonse. Imimana yakwa Lesa yalisula amenshi pakuti abantu balekwatisha iŋanu, pantu efyo wafipekanya. ¹⁰ Amabala ayalimwa niwe uyaletela imfula iyingi, no kulenga ifilimwa filetapililwa. Niwe unasha umushili ku mfula ya bufumi, no kulenga ifilimwa fyonse filekula. ¹¹ Ifisabo filafuma ukulingana nefyo upeela cila mwaka, nomo upitile monse mufumfumuka ifintu ifingi. ¹² Umulemfwe ulafulisha mu matololo, ne mpili shilasekelela. ¹³ Umwakucemena monse mwisula impaanga, na mwishika mukumana ifisabo fyeka fyeka, abantu nabo epakusansamuka no kwaula utupundu.