Kuli kembisha mukalamba. Mikitamu wakwa Davidi. Ku ciunda ca “Wionaula.” ¹ Bushe imwe bakateeka imipingwile yenu intu yalolamo? Bushe mulapingula abantu mu musango uwalungama? ² Nakalya imwe mu mitima yenu mutontonkanya palwa kucita ifyabipa, mucitila ulufyengo ku minwe yenu pesonde. ³ Abantu babi ububifi bwabo butendekela mwifumo, babepafye ubufi ukutula pa kufyalwa kwabo. ⁴ Bakwata ubusungu ngo bwa nsoka, baba kwati ni mpini iyakoma amatwi, ⁵ iyishumfwa ishiwi lya muntu uwacenjela ukwita, nangu engacenjela shani. ⁶ We Lesa, ukontaule ameno mu tunwa twabo, utobaule ne ncendwa sha ishi nkalamo, we Yawe. ⁷ Leka bapite nga menshi filya yakunkuluka, nga basumbula ubuta uleke imifwi ibe iyafupa. ⁸ Uleke babe nge nkola iyenguluka pakwenda, uleke babe nga kapopo akashimona kasuba. ⁹ Lintu inongo shenu tashilaumfwa icikabilila ca mulilo wa myunga, ibe ibishi nangu iyauma, ababifi bena bakasendwa nga kankungwe. ¹⁰ Abololoke bakatemwa nganshi pakumona uko ababifi balekandwa, bena bakalasamba amakasa mu mulopa wa babifi. ¹¹ Elyo abantu bakalasosa abati, “Ala cine cine abololoke bakalambulwa, cine cine Lesa eko aba uupingula isonde lyonse.”