Kuli kembisha mukalamba. Masikili wakwa Davidi ne filimba fya nsale. ¹ Kutika kwipepo lyandi, we Lesa,wisuulako kufyo ine ndepapata. ² Uŋumfwe no kunjasuka, pantu nafifula ifilencusha mu mutima elyo nafinasha. ³ Ine amano nayapela palwa cintiinya ca balwani bandi, na pa mulandu wa mucushisha wa bantu babi, pantu ebandetela amacushi, kabili mu bukali balimpata. ⁴ Umutima wandi uleshikitika, no kufwa kulentiinya nganshi. ⁵ Ine ndetiina no kututuma ndetutuma, elyo no mwenso naunjikata ⁶ Eico ndetila, “Aciba cakuti nalikwata amapindo nge nkunda, nga kuti napupuka pakuti naya tuusha. ⁷ Ngakuti nafulumukila ukutali, ukwakuti naya ikalafye mu matololo. (Selah) ⁸ Ngakuti naendesha ukuya ukwakutuushisha, pakuti napusuka ukufuma ku cikuku ne mfula iya cimwela.” ⁹ Ubonaule, we Yawe, ufulunganye no lulimi lwabo, pantu ine ndemona ubulwi ne mpasase mu musumba ¹⁰ Akasuba no bushiku baleendaukafye pa mulu wa malinga, na mu musumba mulifye ubupondo ne ntulubundi. ¹¹ Ubonaushi bulifye mpanga yonse mu musumba, mu misebo yauko monse mulifye ukutiinya no bufi. ¹² Aciba cakuti mulwani eulencusha, kuti nashipikisha, nangu aciba cakuti ni umo uo twapusana nankwe euleisumbula pali ine, ¹³ lyena nga njile belamafye ukufuma kuli ena. Nomba niwe we muntu munandi, we mubile munandi, kabili cibusa wandi. ¹⁴ Twaleumfwana nobe, no kwangalila pamo, no kwendela pamo pakuya ku ŋanda yakwa Lesa. ¹⁵ Uleke imfwa ibapumikishe abalwani bandi no kubasenda, batelemukile abatuntulu mu calo ca bafwa, pantu ububifi nabusanga apakwikala pakati kabo. ¹⁶ Lelo ine ni kuli Lesa eko ndelilila, kabili ni Yawe euli nokumpususha. ¹⁷ Ndilishika no kuteta uko ali, ulucelo, akasuba ne cungulo, nao alomfwa ishiwi lyandi. ¹⁸ Akulapokolola umweo wandi mu mutende ukufuma ku bulwi ubo ndwisha, pantu abandwisha balifula. ¹⁹ Lesa uwaikala pa cipuna cabufumu umuyayaya, akalaumfwa no kubacimfya. Selah abantu abashifwaya ukupilibuka, pantu tababa na katiina kuli Lesa. ²⁰ Cibusa wandi emine bacibusa bakwe, afulungenye ne cipangano akwete nabo1Mu kanwa kakwe alande ifisuma nga mafuta, lelo mu mutima wakwe mwaisulamo ubulwi. ²¹ Amashiwi yakwe yatelela kwati mafuta, nomba yatwa ngo lupanga ulwasomonwa. ²² Tuula ifisendo fyobe kuli Yawe, nao akulakubaka, ena taleka umuntu umololoke ukuti bamucimfye iyoo. ²³ Nomba ababifi bena, we Lesa ukabaposa mu cilindi cakubonawilamo, abamisoka ne ncenjeshi bakafwa lintu tabalafika na pakati ka nshiku shabo, lelo ine, ndi nokucetekelafye muli iwe.