Ulwimbo lwakwa Asafu. ¹ Umwine wa maka yonse Yawe Lesa alelanda mukubilikisha kwisonde lyonse, ukufuma ilyo akasuba katula mpaka uko kawila. ² Lesa alebengeshima ukufuma mu Sioni, umusumba uwawama nganshi. ³ Lesa wesu aleisa, kabili tatalale tondolo iyoo. Umulilo uukali naumutangilila, ne cimwela icamaka nacimushinguluka. ⁴ Aita bonse aba mu mulu na pano isonde, pakupingula abantu bakwe. ⁵ Aleti, “Nonganikileni abantu bandi bonse, abo napangene nabo icipangano ice lambo.” ⁶ Umulu uleimininako ubulungami bwakwe, ico ni Lesa eupingula.(Selah) ⁷ “Mwe bantu bandi umfweni ifyo ndelanda, mwe bena Israeli nine ndemushinina, ine ndi Lesa, Lesa wenu. ⁸ Nshilemwebaula pa mulandu wa mituulo yenu, nelyo pa mulandu wa malambo yakoca ayo muntuula lyonse. ⁹ Ala ine nshikabila bacilume ba ŋombe, abafuma mu matanga yenu, nelyo basawe abafuma pa mikuni yenu. ¹⁰ Pantu inama shampanga shonse shandi, pamo ne fitekwa amakana na makana ifyaba mu mpili nafyo fyandi. ¹¹ Ifyuni fyonse pamo ne fipeema fyonse nalifishiba, ne fikulika pa mushili, fyandi. ¹² “Nga cakuti insala yansuma tekuti mwebe, pantu isonde pamo na fyonse ifintu ifyabamo fyandi. ¹³ Bushe ine ndalya iminofu ya bacilume ba ŋombe, nelyo ukunwa umulopa wa mbushi? ¹⁴ Tuulila Lesa ilambo lyakumutotela, no kufikilisha ifilayo ifyo walaya Uwapulamo. ¹⁵ Kabili mulendilila mu nshita ya mafya, na ine nakulamupokolola pakuti na imwe mulencindika.” ¹⁶ Lelo ku babifi Lesa aletila, “Bushe cinshi mulelandila pa mulandu wa mafunde yandi, kabili cinshi mulelandila palwa candi? ¹⁷ Tamufwaya ukusalapulwa, nelyo ukukonka amashiwi yandi. ¹⁸ Imwe mutila nga cakuti mwamona umupupu, ninshi mwamusangula umunenu, kabili abacende ebo mwenda nabo. ¹⁹ Utunwa twenu tulandafye ifyabipa, kabili pakubepa ubufi tamumfwa na nsoni. ²⁰ Mwaikalilafye ukwamba bamunyinenwe, no kubabepesha imilandu pakuti basebane. ²¹ Pali fyonse ifyo mwacita naikele tondolo, na imwe mwatontonkenye ukuti ine naba nga imwe! Nomba ndemukalipila, kabili ndemwebelapo pa lwalala. ²² “Eico mwe balaba kuli Lesa cenjeleni epali namusantaula, no wakumupokololako tekuti kube nakalya. ²³ Umuntu uuntotela mukutuula ilambo lyakutasha alancindika, kabili uwenda mu nshila iyalungama, ndi nokumulanga ipusukilo lyakwa Lesa.”