¹ Lumbanyeni Yawe! Ala caliwama ukulaimbila Lesa wesu inyimbo shakumulumbanya, cilasansamusha, no kulinga calilinga ukulamulumbanya! ² Yawe eukuula Yerusalemu, eukolonganya na bena Israeli abali muli bunkole. ³ Alaposha abafunshika imitima, alabakakila ne filonda fyabo. ⁴ Ewaishiba ne mpendwa ya ntanda, ewashinika shonse na mashina yashiko lumo lumo. ⁵ Imfumu yesu ikulu kabili yamaka nganshi, ukwishiba kwakwe takwakwata impela. ⁶ Yawe ewimya bonse abaicefya, lelo ababi bena alabaposa panshi. ⁷ Akwimbileni Yawe inyimbo shakutasha, akulishisheni Lesa wesu inyimbo pa maseese. ⁸ Eubunganika amakumbi mu mulu, eulokesha ne mfula pa calo, no kumesha icani mu mpili. ⁹ Eupeela iŋombe icakulya, kabili eulisha tumwankole icakulya ilyo twamulilila. ¹⁰ Amaka yakwa kabalwe tayamusekesha, kabili ena tacankilwa mu molu ya muntu. ¹¹ Lelo Yawe asansamukafye mu bamukwatila akatiina, ababika isubilo lyabo mu citemwiko cakwe icishipwa ¹² Uletasha Yawe, we Yerusalemu! Ulelumbanya Lesa obe iwe Sioni! ¹³ Pantu ewikasha imipilikisho ya mpongolo shobe, eupaala na bana bobe abekalamo. ¹⁴ Eulenga nokuti mu mipaka ya calo cobe muleba icibote, eukupeelesha ne ŋanu ishisuma. ¹⁵ Eupeela ne cipope cakwe pano isonde, ne shiwi lyakwe lilasalangana bwangu bwangu. ¹⁶ Eulokesha ubunga bwa mfula nga masako ya mpaanga, no kulenga umume ukusalangana nge mito. ¹⁷ Eulukusha na mabwe ya mfula nge nsakalabwe, takuli nangu umo uwingashipikisha kuli iyi mpepo. ¹⁸ Nga alandafye ishiwi, apopene fyasunguluka, atuma no mwela wakwe uwakaba, awe ninshi na menshi yalapita ¹⁹ Ewasokolola ishiwi lyakwe kuli Yakobo, no kwishibisha amafunde ne fipope fyakwe ku bena Israeli. ²⁰ Awe, tatala aucitilapo umushobo umbi ici, tabaishiba na mafunde yakwe nakalya. Akulumbanyeni Yawe!