Ulwimbo lwakwa Davidi. ¹ We Yawe niwe ndekuutako mutuule, endesha ukwisa kuli ine! Umfwa kwishiwi lyandi ilyo ndekuuta kuli iwe. ² Uleka ipepo lyandi lise uko uli nge cushi ca bubani, no kwimya kwa maboko yandi kube nge lambo lya cungulo. ³ We Yawe, ulesunga akanwa kandi, ulelinda no lulimi lwandi. ⁴ Wileka umutima wandi ulelola ku fyabipa, nangu ukuiposa mu micitile iyabipa. Wileka ndebifya pamo na bantu abacita ifibi, nangu ukulya ku malila yabo. ⁵ Umuntu mololoke angumemo pakuncenjeshako, leka ankalipile, ekusuba amafuta ku mutwe wandi, na ine nshakaane. ⁶ Lelo ine ipepo lyandi kulwisha imicitile ya babifi inshita yonse. Bakateeka babo bakabafwinta mu mikonko, elyo ababifi bakasumina ukuti amashiwi yandi yali yacishinka. ⁷ Elyo bakasosa abati, “Nga filya shibulimi alepula umushili pakulima,efyo na mafupa yesu yasalangene pa kanwa ka calo ca bafwa.” ⁸ Lelo ine ni pali iwe we mfumu Yawe natonta amenso yandi, ni muli iwefye ine mfisama, wilekelesha umweo wandi. ⁹ Ulensunga ku fiteyo ifyo banteya, na ku fyakunjikatilako ifyo abantu ababi banteya. ¹⁰ Leka ababifi ebo bekatwe mu masumbu yabo abene, ilyo ine ndeipitilafye bwino bwino.