Ulwimbo lwakwa Davidi. ¹ We Yawe, nakulakulumbanya no mutima wandi onse, pa cinso ca milungu, nkakulumbanya. ² Ndekontamika icinso ukulosha kwi Tempele lyobe ilyamushilo, no kulumbanya ishina lyobe, pa mulandu wa citemwiko cobe icishipwa ne cishinka cobe. Pantu walicindamika ishina lyobe ne shiwi lyobe ukucila pali fyonse. ³ Ilyo ine nakuutile mutuule, iwe walingaswike, walinkoseleshe no kundumika wandumika. ⁴ We Yawe uleke ishamfumu sha pano isonde shilekulumbanya shonse, ilyo shaumfwa amashiwi ayafuma ku kanwa kobe. ⁵ Uleke shileimba pa mulandu wa nshila shakwa Yawe, pantu ululumbi lwakwa Yawe lukalamba nganshi. ⁶ Nangu Yawe aba ku mulu ukutali, ena alasakamana abalanda, lelo abacilumba, ena abeshibilafye ukutali. ⁷ Nangu ine nyenda mukati ka mafya, niwefye unsunga umumi. Niwe ucilima abalwani bandi abamfulilwa, ku maka ya kuboko kobe ukwa ku kulyo, no kumpokololako no bulamba bobe. ⁸ Ee, Yawe akafikilisha ubufwayo bwakwe pali ine, icitemwiko cobe, we Yawe, ala ca pe na pe. Wileka kubomba imilimo iya maboko yobe.