¹ Tekuli ifwe, we Yawe, ala tekuli ifwe, lelo ishina lyobe elyo licindikwe, pa mulandu wa citemwiko cobe icishipwa na bucishinka bobe. ² Nga cinshi ico imishobo ingalaipushisha aiti, “Bushe Lesa wabo aba kwi?” ³ Ala ifwe Lesa wesu aba mu mulu, alacita na fyonse ifyo atemenwe umwine. ⁴ Lelo bena utulubi twabo filubi ifya silifa ne fya golide, fintufye ifyapangwa na maboko ya bantu. ⁵ Utunwa twena fyalikwata lelo tafilanda nakalya, amenso nayo fyalikwata, lelo ukumona tafimona nakalya. ⁶ Amatwi nayo fyalikwata, lelo tafyumfwa nakalya, ne myona fyalikwata, lelo ukununsha tafinunsha nakalya. ⁷ Iminwe fyalikwata, lelo tafipampanta nakalya, na molu fyalikwata, lelo ukwenda tafyenda nakalya, nangufye iciunda ce shiwi lyafiko tacumfwika nakalya. ⁸ Bonse abafipanga nabo bakaba nga fyena, kabili efyo cikaba ku baficetekelamo. ⁹ Imwe mwe ba mu ŋanda yakwa Israeli, tetekeleni Yawe, pantu eumwafwako kabili e nkwela iyamucingililako. ¹⁰ Imwe mwe ba mu ŋanda yakwa Aroni, tetekeleni Yawe, pantu eumwafwako kabili e nkwela iyakumucingililako. ¹¹ Imwe mwe bamukwatila akatiina, tetekeleni Yawe, pantu eumwafwako kabili e nkwela iyakumucingililako. ¹² Yawe alatwibukisha, kabili ifwe akatupaala. Ena akapaala na ba mu ŋanda yakwa Israeli, akapaala na ba mu ŋanda yakwa Aroni. ¹³ Ena akapaala bonse abakwatila Yawe akatiina, abalanda na bakankala cimo cinefye. ¹⁴ Yawe engamupeelesha ubufyashi, bonse pamo pene imwe na bana benu. ¹⁵ Yawe engalamupaala imwe, uwabumba umulu ne sonde. ¹⁶ Yawe eka e mwine wa myulu, isonde lyena alipeela ku bantu. ¹⁷ Ala abafwa tabalumbanya Yawe iyoo, balilala baliya ku calo ukwatalala tondolo. ¹⁸ Lelo nifwe fwe batuntulu nifwe tulepaala Yawe na matotelo, ukutampa lelo, ukufika na ku muyayaya. Lumbanyeni Yawe!