¹ Lumbanyeni Yawe! ine nakulatotela Yawe no mutima wandi onse mukulongana kwaba ololoka imitima, mu lukula mwine. ² Ificitwa fyakwa Yawe ifikulu nganshi, balafitontokanyapo bonse abafitenwa. ³ Fyonse ifyo ena acita awe fintu fyacindama kabili fyabulamba, kabili ubulungami bwakwe bwa pe nape. ⁴ Ena acita ifyakupapa ifyo ifikebukishiwa, Yawe alikwatisha icikuku no luse. ⁵ Ena upekanishisha icakulya bonse abamukwatila akatina kabili alebukisha icipangano umuyayaya. ⁶ Ena alilanga abantu bakwe ifyo amaka yakwe yaba, pakubapela ifyalo fya mishobo imbi. ⁷ Imilimo ya maboko yakwe yacishinka kabili yamulinganya, amafunde yakwe yonse ala yalinga ukucetekela. ⁸ Yakubelelela pe nape, pantu yapangilwe ayalungama kabili ayacishinka. ⁹ Ena apele ukulubuka ku bantu bakwe, alipangana nabo icipangano icakubelelela ishina lyakwe lyamushilo kabili elilenga na katina. ¹⁰ Ukukwatila Yawe akatina, entendekelo ya mano. Nabonse abakonka amafunde yakwe balikwata amano ayakumfwikisha bwino ifintu. Ena alelumbanishiwa umushinsanshiku.