Ulwimbo lwakwa Davidi. ¹ We mutima wandi paala Yawe na matotelo, na fyonse ifya mu mweo wandi filumbanye ishina lyakwe ilyamushilo. ² We mutima wandi paala Yawe na matotelo, kabili wilalaba ifyo akukwatila icikuku. ³ Eukubelelako uluse kuli fyonse ubifya, eukuposha na ku malwele yobe yonse. ⁴ Eukubwesha ku milomo ya nindi, eukukwatila icikuku ne citemwiko. ⁵ Eukupeela ifintu ifisuma mu mikalile yobe, epakuti ubwaice bobe bupuputulwe ngo bwakwa kapumpe. ⁶ Yawe eucita umulinganya no mucetekanya kuli bonse abafyengwa. ⁷ Alangile inshila shakwe kuli Mose, ne micitile yakwe ku bena Israeli. ⁸ Yawe waluse kabili wacikuku, tafulwa bwangu kabili wa citemwiko icishipwa ⁹ Ena tebaula pe iyoo, ne cipyu cakwe tacibelelela nakalya. ¹⁰ Kabili pakutulimuna talinganya pamo ngefyo tumubifya, nangu ukulinganya pa fyabupulumushi fyesu. ¹¹ Nga filya fine umulu wasansama ukutaluka kwisonde, efyo ne citemwiko cakwe cakula pali abo abamukwatila akatiina. ¹² Nga filya fine akabanga katalukana na masamba, efyo nao atalusha ifibi fyesu kuli ifwe. ¹³ Nga filya fine shibo akwatila bamwane inkumbu, efyo na Yawe akwatila abo abamukwatila akatiina. ¹⁴ Pantu alishiba ifyo twabumbwa, alebukisha ukuti ifwe tuli lukungufye. ¹⁵ Pantu ubumi bwa muntu bwaba nge cani, abalula nge luba lya mu mpanga. ¹⁶ Ilyo umwela waisa pupapo, ninshi emyululukile, e miile, ne ncende lyaikelepo tayakalibukishe. ¹⁷ Lelo icitemwiko cakwa Yawe ico akwatila abamutiina cena camuyayaya, no bololoke bwakwe tabupwa umukonkanina inkulo shonse isha bana ba bantu. ¹⁸ Abo e bantu abasunga icipangano cakwe, kabili abebukisha ukukonka bwino bwino amafunde yakwe. ¹⁹ Yawe ewateeka mu mulu, kabili no bufumu bwakwe ebwateeka aba pano isonde bonse. ²⁰ Mulepaala Yawe na matotelo imwe mwe bamalaika bakwe, mwe mpalume shabulamba ishibeela ifyebo fyakwe, mwe bomfwa ifyo asosa! ²¹ Mulepaala Yawe na matotelo imwe mwe fita fyakwe fya mu mulu, imwe mwe babomfi bakwe abacita ifyo afwaya! ²² Mulepaala Yawe na matotelo imwe mwe fibumbwa fyakwe, mu ncende shonse umo ateeka. Ee, we mutima wandi paala Yawe na matotelo!