¹ Pali ilya inshita, imfumu Herodi yaumfwile ululumbi palwa kwa Yesu. ² Yala eba aba bomfi bakwe ati, "uyu e Yoani kabatisha eubukile ku bafwa. Eco akwatile aya amaka yakucita ifipeshamano." ³ Pantu Herodi aikete Yoani, amukaka, amuposa na mu cifungo, pamulandu wakwa Herodia, muka Filipo munyina. ⁴ Yoani alemweba ati, "Tefunde ukubula ena ukuba umukashi obe." ⁵ Herodi alefwaya no kumwipaya lelo aletina abantu, ico bena baleti ni kasesema. ⁶ Nomba cilya bushiku bwakucindika ukufyalwa kwakwa Herodi bwafika, umukashana mwana Herodia aisa mu lwalala alacinda. Awe asansamusha Herodi nganshi. ⁷ Mubwasuko, amulaile necilayo ukumupela conse eco alalomba. ⁸ Nao umukashana ico aya tunkwa nak nyina asosa ati, "Ndefwaya mumpele lino linefye, pa mbale, umutwe wakwa Yoani kabatisha." ⁹ Imfumu yalanguluka kumulandu wa mulapo na beni abo ili nabo, yakonkomesha ukuti bacitile umukashana ico alefwaya. ¹⁰ Awe baya putulako Yoani umutwe mu cifungo. ¹¹ Elyo bauleta pa mbalr bapeela no mukashana nao autwala nakuli nyina. ¹² Abasambi bakwa Yoani baisa, basensa icitumbi baya cishika. Panuma ya ifi, baya shimikako kuli Yesu. ¹³ Panuma Yesu aumfwa uyu mulandu, alifumineko, aya no bwato ku matololo ukwakuti ali eka. Nomba amabumba yashumfwa ifi, yaisa ukufuma mu misumba yakonka uko aleya pamakasa. ¹⁴ Yesu cilya afuma mu bwato, amona ibimba lya bantu ilikalamba. Swe abalanguluka alaposha na malwele yabo. ¹⁵ Cilya akasuba kaba kukuwa, abasambi baisa uko ali balamweba abati, "Kuno tuli no ku matololo, kabili na kasuba kawa, kanshi eba abantu baye, baye mu mishi nokuyaishitila ifyakulya." ¹⁶ Yesu nao abeba ati, "Abantu nangu tabele imwe nimwe bapeeleni icakulya." ¹⁷ Bamwasuka abati, "Ifwe kuno tukwetefye imikate isano ne sabili libili." ¹⁸ Yesu atile, "kanshi fileteni kuno." ¹⁹ Elyo akonkomesha ukuti, amabumba yekale pa fyani. Elyo abuula imikate isano ne sabi libili. Alosha amenso ku mulu, alatasha Lesa, elyo amokaula imikate apeela nabasambi bakwe, nabo balapeela abantu. ²⁰ Awe bonse balya nokwikuta baikuta. Elyo Abasambi balonganya ifipandwa fyasheleko baisusha imiseke ikumi limo na yabili. ²¹ Ne mpendwa ya baume abalileko yali cikanga amakana yasano, ukwabula ukupendelako abanakashi na baice. ²² Apopene Yesu acincishe abasambi ukuti bengile mu bwato batangile babuke kwishilya, elyo umwine ena ashala alesalanganya amabumba. ²³ Ilyo asalanganya amabuma, anina ulupili aya eka kukupepa. Cilya caba icungulo, ninshi Yesu ashelekofye eka. ²⁴ Ubwato bwena ninshi bwafika napakati ka bemba, buletumpaukafye ku mulandu wa matamba ico bapindilwe no mwela, ²⁵ Elyo lwa ku macaca Yesu alaisa uko bali aleenda pali bemba. ²⁶ Elyo abasambi bamona aleenda pali bemba batiina nganshi, balasosa abati, "cipuku" elyo balapunda ku mulandu wa mwenso. ²⁷ Yesu apopene abeba ati, "Tekeni imitima! Ala nine! mwitina." ²⁸ Petelo amwasuka ati, we mfumu nga niwe njeba njise uko uli ndeenda pa menshi." ²⁹ Yesu amweba ati, "Isa," Awe Petelo afuma mu bwato, alaya kuli Yesu aleenda pa menshi. ³⁰ Nomba ico icimwela cakosa atiina, atendeka uwibila, ely alakuta ati, "we Mfumu mpusushako!" ³¹ Apopene Yesu atambika ukuboko, amwikata, alamweba atim "we muntu wa cisumino cinono, cinshi watwishikila?" ³² Awe cilya Yesu na Petelo baingila mu bwato, ne cimwela caleka. ³³ Elyo abantu bali mu bwato balapepa Yesu abati, "Cine cine uli mwana wakwa Lesa." ³⁴ Elyo bayabwike kwishilya bafikile mu calo ca Genesaleti. ³⁵ Ilyo abantu bali muli iyi ncende bamwishiba nabo, baishibisha abantu aba mu mishi ya mumbali, Awe abantu balaleta abalwele bonse kuli ena. ³⁶ Balamupapata ukuti engaleka abalwele balekumyafye nangu ni ku nsekebele ya nsalu shakwe, awe na bonse abale kumyako balepola.