¹ Nomba ninshi umutebeto wakucilila taulafika Yesu alishibe ukutia inshita yakwe iyakufuma pa calo nokuya kuli wishi naifika. Mukutemwa abakwe abali pa calo, abatemenwe na kumpela. ² Nomba kasebanya ninshi nabikamo kale mumutima wakwa Yuda Isikalyoti mwana Simoni, ukushitisha Yesu. ³ Yesu-Alishibe ukuti wishi alipela fyonse muminwe yakwe kabili afumine kuli Lesa elyo alebwelela kuli Lesa. ⁴ Apwisha umulalilo aima afulako nensalu yakunse. Elyo abula ne taulo alipomba nakumubili wakwe. ⁵ Elyo atila na menshi mwi beseni ayamba nokusamba amakasa yabasambi noku yakumuna kwi taulo lilya apombele kumubili wakwe. ⁶ Aishile kuli Simoni Petelo, na Petelo atile kuli ena, "mwemfumu, bushe mwalasamba amakasa yandi?" ⁷ Yesu alyaswike amwebele ifi, "ifyo ndecita teti mufishibe nomba lelo mukafishiba kuntanshi." ⁸ Petelo alandile kuli ena, "Teti munsambe amakasa yandi." Yesu amwaswike ati. "ngateti inkusambe, ninshi taukwete icakaniko naine." ⁹ Simoni Petelo atile kuli ena, "mwemfumu, mwinsambafye amakasa, lelo namaboko no mutwe wandi." ¹⁰ Yesu atile kuli wene, "uwa owa nacipwa kanofye ukusamba ku molu, lelo alifye uwa pwililila ubusaka; iwe uli uwabusaka, lelo tebonse imwe." ¹¹ (Pantu yesu alishibe uuli nokumushitisha ecalengele atile, "tebonse imwe abali no busaka.") ¹² Eico ilyo Yesu abasambike amakasa kabili abula nefyakufwala fyakwe aikala panshi nakabili, alandile kulih bena ati, "Tamwishibe ifyo nacita kuli imwe ¹³ Imwe munjita 'kafundisha' na 'shikulu,' kabili mu landa ici shinka, pantu efyo naba. ¹⁴ Ngacakutila ine ne mfumu kaili kafundisha, ninsamfya amakasa yenu, mufwile naimwe mwa sambana amakasa yenu. ¹⁵ Pantu namupelako icilangililo pakuti naimwe mulecita ififine nacita kuli imwe. ¹⁶ Cine cine, nalanda kuli imwe, umusha tacila pali shikulu wakwe; nangula umutumwa tacila uumutumine. ¹⁷ Ngamwalishiba ifi fintu, mwalipalwa ngamulaficita. ¹⁸ Nshilelanda pali bonse; ninjishiba abo nasalile ici ca kulenga ukuti amalembo yafikilishiwe; uyo uwalya umukate wandi aimishe icitende pale ine.' ¹⁹ Ndemweba ici nomba ilyo tacilacitika pakuti ilyo cacitika mukasumine ati INE NINE. ²⁰ Cine cine, ndelanda kuli imwe, uyo onse uwapokelela uo natuma apokelela ine, kabili uwa pokelela ine apokelela uwatumine ine." ²¹ Ilyo Yesu apwisha ukulanda ifi, alicushiwa no mupashi. Alanda nokutila, "Cine, cine ndemweba nati umo pali imwe ali nokunshitisha." ²² Abasambi baloleshanya, tabeshibe uo alelandapo. ²³ Umo pabasambi bakwe uo Yesu atemwishe, uwaikele panshi aikele mupepi napali itebulo lyakwa Yesu. ²⁴ Simoni Petele acebwishe uyu musambi nokutila, "mwipushe uo alelandapo." ²⁵ Eico alishintilile ulubali lwakwa Yesu kabili alanda kuli ena ati, "mwemfumu, bushe nani?" ²⁶ Elyo Yesu ayasuka, "Ni umo nalapela akapondwa ka mukate ako ndetobela mu mbale." Ilyo atobela umukate, apele Yuda Iskalioti mwana Yuda. ²⁷ Ilyo bapwa umukate, Satana aingile muli wene elyo Yesu atile kuli wene, "ifyo ulecita, cita mukwangufyanya." ²⁸ Nomab pali bonse abaikele nankwe pe tebulo tabaishibe umo apilibwile pakulanda ifi kuli ena. ²⁹ Bambi batontikenye ati, pantu Yuda ewalesunga icipao candalama, Yesu atile kuli ena, "shita ifyo tulekabila pa matebeto, "nangu upeleko fimo kuba busu. ³⁰ Panuma Yakupokelela umukate, Yuda alifuminepo apopene nokuya. Cali ubushiku. ³¹ Ilyo Yuda aile, Yesu atile, "Nomba umwana wamuntu acindamikwa na Lesa acindamikilwa muli ena. ³² Nga Lesa akacindamiliwa muli ena, na Lesa nao akacindamika umwana muli ena, kabili akacindika ena apopene. ³³ Mwebana abanono, ndinaimwe pakashitafye akanono mukalamfwaya, ngefyo nalandile kuba Yuda, 'Uko ndeya, teti mwiseko.' Nomba nalanda ifi kuli imwe. ³⁴ Ndemupela ifunde ilipya ilyakuti muletemwana; ifyo namutemenwe, ifyo naimwe mutemwane. ³⁵ Pali ici bonse bakeshiba ati muli basambi bandi, ngacakuti mwatemwana." ³⁶ Simoni Petelo atile kuli wene, "Mwemfumu nikwisa muleya?" Yesu ayaswike ati, "uko ndeya teti munkonke, nomba lelo mukankonka panuma." ³⁷ Petelo atile kuli wene, "mwemfumu, cinshi teti imunkonkele nomba? Nkatula umweo wandi pali imwe. ³⁸ Yesu amwasuka, "kuti watula umweo obe pali ine? Cine, Cine, ndekweba mukolwe talile ilyo taulankana imiku itatu."