¹ Elyo Yawe alandile kuli Mose ati, “Fumeni pali ino ncende iwe pamo na bantu abo wafumishe mu calo ca Egupto. Kabiyeni ku calo ico nalaile no mulapo kuli Abrahamu, Isaki na Yakobo ukuti nkacipeela ku ba mu lupwa lwenu. ² Nkatuma malaika uwakumutangilila elyo nkatamfya abena Kenani, abena Amoli, abena Hiti, abena Perisi, abena Hifi elyo na bena Yebusi. ³ Kabiyeni ku calo icifumfumukamo umukaka no buci. Lelo ine nshaye na imwe, pantu muli bankosa mitwe epali namulofesha mu nshila.” ⁴ Ilyo abantu baumfwile aya mashiwi ayakali, bapumapo imisowa, kabili tapali nangu umo uwafwele nelyo cimo icakumuyemfya. ⁵ Yawe alandile kuli Mose ukweba abena Israeli ati, “Imwe muli bankosa mitwe, nga twaendele na imwe nangufye akashita akanono, ine kuti namulofya. Kanshi nomba fuuleni ifyakumuyemfya fyenu na ine ndepingula ifyakumucita.” ⁶ Kanshi abena Israeli epakufuula ifyakubayemfya fyabo pa lupili lwa Holebu, kabili tababalile abafifwala. ⁷ Nomba Mose alefumishe tenti kunse ya nkambi akatalamukila, eko alelimika. Aleita ili tenti “Itenti Lyakukumaninamo.” Uyo onse uulefwaya ukwipusha fimo kuli Yawe, eko aleya kuli ili Itenti Lyakukumaninamo ilyali kunse ya nkambi. ⁸ Ilyo lyonse Mose alefuma mwitenti, abantu bonse baleima baiminina pa minshi ya matenti yabo balelolesha Mose mpakafye aingila na mwitenti. ⁹ Ilyo Mose aingila mwitenti, intumba ye kumbi yaisa cinga na pa mwinshi we tenti ilyo Yawe alelanda na Mose. ¹⁰ Ilyo lyonse abantu bamona intumba ye kumbi yacinga pa mwinshi we tenti, baleiminina bonse cila umo pa mwinshi we tenti lyakwe no kupepa. ¹¹ Yawe alelanda na Mose, ninshi nabaloshanya amenso, nga filya umuntu alanda na cibusa wakwe. Ilyo Mose alebwelela ku nkambi, umulumendo Yoshua mwana Nuni kalume wakwe wena aleshala mwitenti. ¹² Mose aebele Yawe ati, “Ulenjeba auti, ‘Tungulula aba bantu,’ lelo tawanjeba uo ukatuma tukaye nankwe. Kabili naulanda ukuti walinjishiba ne shina elyo nokuti ine nalikusekesha. ¹³ Kanshi ine nga nalisanga ububile, nsambilisha imibeele yobe pakuti nkwishibe no kukusekesha. Wilaba nokuti uyu mushobo wa bantu bobe.” Yawe ayasuka ati, “Ukubapo kwandi kwakulaya nobe kabili nakulakupeela ukutuusha.” ¹⁴ Yawe ayasuka ati, “Ukubapo kwandi kwakulaya nobe kabili nakulakupeela ukutuusha.” ¹⁵ Elyo Mose amweba ati, “Nga cakuti ukubapo kobe takwakulaya na ifwe ninshi witufumya pano. ¹⁶ Bushe umuntu onse kuti aishiba shani ukuti ine nalikusekesha pamo na bantu bobe, kanofye nga cakuti twalaya na iwe? Ukubapo na ifwe kwena kukalalanga ukuti ine na bantu bobe twaliba abaibela ku bantu bambi bonse mpanga yonse pano isonde lyonse.” ¹⁷ Yawe nao aebele Mose ati, “Nkacita ico cine cintu iwe unombele ukucita, pantu iwe walinsekesha kabili nalikwishiba ne shina.” ¹⁸ Mose epakweba Yawe ati, “Napapata shi wingananga ubucindami bobe.” ¹⁹ Kabili Yawe amwasuka ati, “Nalaleka ubusuma bwandi bonse bupite pa cinso cobe, kabili ndebila ne shina lyandi pa cinso cobe ukuti nine Yawe. Ine mbelela uluse uo ndefwaya ukubelela uluse, nangulukila uo ndefwaya ukulangulukila.” ²⁰ Lelo Yawe amweba ati, “Teti iwe umone icinso candi, pantu takuli uwingamona ine no kuba umumi.” ²¹ Kabili Yawe atila, “Mona, pano ine ndi pali incende mupepi apo wingeminina pa cilibwe. ²² Ilyo ubucindami bwandi bwalaisa mukupita, ine ndeisa kubika mu lucengo lwa cilibwe, ndeisa kufimba no lupi lwandi mpaka mpitepo. ²³ Elyo ndeisa fumyapo ulupi lwandi, pakuti wise umonekofye inuma yandi. Lelo icinso candi cena tacifwile ukumonwa.”