¹ “Ukapange ubulambo bwakocelapo ububani ku mbao sha cimuti ca akasia. ² Ubulambo bufwile ukuba ubwalingana monse monse mubutali na mubwipi kubiti umo, elyo ukufuma panshi ukufika pamulu bukalepe amakubiti yabili. Insengo sha ku bulambo shikabaswe ku cimuti cimo cine pakuti fikabe icintu cimofye. ³ Ukapangileko no mushingo wa golide ukushinguluka. Ukapangileko ne mikobelo ya golide ibili iyakusendelako. ⁴ Pesamba lya mushingo ku mbali shibili isha bulambo ishalolenkana, ukekasheko umukobelo umo umo umwakupisha ifimuti fyakupingilako ⁵ Ukabase ifimuti fyakupingilako ku muti wa akasia, ukalambatikeko na golide. ⁶ Ukabike ubo bulambo pa ntanshi ya cisalu cakucinga ukuli Mbokoshi ya Cipangano, pa ntanshi ya Nkupiko apakufutilwa ifyabubifi iyili pa mulu wa Mbokoshi ya Cipangano, apo tukalakumanina. ⁷ Inshiku shonse ulucelo Aroni afwile akaleoca pa bulambo ububani ubwanunka ubusaka, ilyo aisa mukuwamya ifisaniko. ⁸ Kabili afwile akaleoca ububani ubwanunka ubusaka na mu cungulo, ilyo abwela mukusanika ifisaniko. Kanshi ukoca ububani kukalebako lyonse pa cinso cakwa Yawe mu nkulo shenu shonse. ⁹ Tekwesha ukocelapo pali buno bulambo ububani ubwaleshiwa nangu ilambo lyakoca nangu umutuulo wa cabunga. Kabili tekwesha ukwitilapo mutuulo onse uwa fyakunwa. ¹⁰ Umuku umo cila mwaka Aroni akalefutila pa nsengo sha bulambo. Uku kufuta pa fyabubifi ukwa cila mwaka kufwile ukucitwa no mulopa wa mutuulo wakwelelwa pa fyabubifi ku nkulo shonse ishikakonkapo. Ubu bulambo bwamushilo nganshi kuli Yawe.” ¹¹ Elyo Yawe aebele Mose ati, ¹² “Ilyo ukalapenda abena Israeli pakwishiba impendwa yabo, cila muntu akapeele icifuta mulandu kuli Yawe icakulubwilapo umweo wakwe ilyo apendwa, epakuti bekaponenwa ne cinkunka ilyo ukalabapenda. ¹³ Umuntu onse uwapitila ku bapendelwe afwile ukupeela citika wa ndalama ya shekeli iyapimwa ukulingana ne cipimo ca mu cifulo camushilo. Shekeli imo yafina amagera amakumi yabili. Citika wa iyi ndalama, mutuulo wa kuli Yawe. ¹⁴ Uyo onse uwapitila ku bapendelwe uuli ne myaka amakumi yabili nangu ukucilapo, ali nokupeela umutuulo kuli Yawe. ¹⁵ Umukankala tali nakupeela ukucisha pa cipimo ca citika wa shekeli, elyo umupina nao tali nakupeela utunono utwabula ukufika pa cipimo, pakupeela umutuulo kuli Yawe uwakufutila imyeo yabo. ¹⁶ Ukapoke isho ndalama ku bena Israeli ishakufuta pa fyabubifi, no kuubomfya ku milimo ya mwi Tenti Lyakukumaninamo. Isho ndalama shikabe icakwibukisha abena Israeli pa cinso cakwa Yawe, eshakulubwilapo imyeo yabo.” ¹⁷ Elyo Yawe aebele Mose ati, ¹⁸ “Ukapange umusambilo wa mukuba elyo ne cakutekapo ica mukuba umwakusambila. Ukaciteke pakati ke Tenti Lyakukumaninamo no bulambo, ukabikemo na menshi. ¹⁹ Aroni na bana bakwe abaume bakalesamba muli aya menshi ku maboko na ku makasa. ²⁰ Bakalesamba aya menshi ilyo lyonse balaingila mwi Tenti Lyakukumaninamo nelyo balapalamina ku bulambo kukubomba umulimo wakupeela umutuulo wakoca kuli Yawe, pakuti bekafwa. ²¹ Bakalesamba amaboko na makasa pakuti bekafwa. Ili likaba e funde lyakubelelela kuli Aroni na ba lupwa lwakwe ku nkulo shabo shonse ishikakonkapo.” ²² Kabili Yawe aebele Mose ati, ²³ “Ukabuule ifi ifyakwata akacena kasuma: muri wa menshi uwafina amakilo mutanda, kinamoni uwanunka ubusaka uwafina amakilo yatatu, na kane uwanunka ubusaka amakilo yatatu, ²⁴ elyo na kasia uwafina amakilo mutanda. Fyonse fikafine ukulingana ne cipimo ca mu cifulo camushilo. Elyo kabili na mafuta ya miolifa icipimo ca hini umo. ²⁵ Kuli ifyo ukapangeko amafuta yamushilo ayakusuba ayasakanishiwa ubusaka no muntu wacenjela ukusakanya ifyanunka ubusaka. Yakaba mafuta ayamushilo ayakusuba. ²⁶ Elyo mukaleyabomfya mukusuba Itenti Lyakukumaninamo, Imbokoshi ya Cipangano, ²⁷ itebulo ne fibombelo fyaliko fyonse, icakutekapo ifisaniko pamo pene ne fibombelo fyaciko, ²⁸ ubulambo bwakocelapo ububani, ubulambo bwakocelapo amalambo pamo pene ne fibombelo fyabuko fyonse, elyo na ku musambilo ne cakutekapo cauko. ²⁹ Ukafisangulule, nafyo fikaba ifyamushilo nganshi, na conse icafikumyako cikaba icamushilo. ³⁰ Ukasube Aroni na bana bakwe abaume amafuta no kubasangulula pakuti bakalemombela umulimo wa bushimapepo. ³¹ Ukebe abena Israeli auti, ‘Aya yakaba amafuta yandi ayamushilo ayakusuba mu nkulo shenu shonse ishikakonkapo ³² Tekwesha ukuyetila pa mubili wa muntu kabili tekwesha ukupanga amafuta ayapalako ayasakanishiwamo ne fintu fimo fine mu musango umo wine. Yena mafuta yamushilo, yakaleba ayamushilo na kuli imwe bene. ³³ Onse uyo uukapanga amafuta ayapala nga aya, noyo uukasuba umuntu uushili shimapepo, wakutamfyafye mu bantu bandi.’” ³⁴ Elyo Yawe aebele Mose ati, “Buula ifintu ifyanunka ubusaka, ifinyamuti fya sitakite, ifya onika, ifya galibanumu ne cinyamuti ca fulankinisenshi icanunka ubusaka, fyonse fikalingane ubwingi. ³⁵ Ifi efyo ukafisakanye. Ukapangemo ububani nga filya ficita umuntu uwacenjela ukusakanya ifyanunka ubusaka. Mu bubani ukabikemo umucele, bukabe ubwasangululwa kabili ubwamushilo. ³⁶ Ukabuulepo ububani bumo ukabupele ngo bunga, ukabubike na pa ntanshi ya Mbokoshi ya Cipangano mwi Tenti Lyakukumaninamo umo nkalakukumanya. Ubu bubani bukaba kuli imwe ubwamushilo nganshi. ³⁷ Tekwesha ukupanga ububani bwenu ubwapalako ubwasakanishiwamo ne fintu fimo fine mu musango umo wine. Bwena mukabucite ububani bwamushilo kuli Yawe. ³⁸ Onse uyo uukapanga ububani ubwapala nga bulya, pakuti aleumfwa ifyo bwanunkila ubusaka, wakutamfyafye mu bantu bandi.”