¹ Lesa asosele yonse aya amashiwi: ² "nine Yawe Lesa obe, uwakufumishe mu calo ca Egupti, ukufuma mu ng'anda ya busha. ³ Tamufwile ukukwata tu Lesa tumbi pa cinso candi. ⁴ Tamufwile ukuipangila icabaswa nangula icimpasho cacili conse icaba pamulu wa myulu, nangu ico icaba panshi ye sonde, nangu ico icaba panshi ya menshi. ⁵ Tamufwile ukufukama kuli fyena nangu ukufishinshimuna, pantu ine, Yawe Lesa wenu, ndi Lesa wakalumwa. Indakanda ububifi bwa fikolwe fyenu ukupitila mukuleta ukukanda pa babufyashi bwenu, kunkulo ya butatu na kunkulo ya cine kuli abo abampata. ⁶ Lelo ndalanga ukutemwa ukwafikapo ku bamakana abo abantemwa na ukusunga ifipope fyandi. ⁷ Taufwile ukusenda ishina lyakwa Yawe Lesa obe, apafye, pantu nshakalekelele onse uukabika ishina lyandi apafye. ⁸ Ibukisha ubushiku bwe Sabata, ukulishisha kuli ine. ⁹ Mufwile ukubomba kabili nokubomba imilimo yobe yonse pa nshiku mutanda. ¹⁰ Lelo ubushiku bwakulenga cine lubali li Sabata lya kwa Yawe Lesa obe. Pali bwena taufwile ukubomba umulimo uuli onse, iwe, nangu umwana obe umwaume, nangu umwana obe umwanakashi, nangu umubomfi obe umwaume, nangu umubomfi obe umwanakashi, nangu icitekwa cobe, nangu umwina fyalo uuli mukati ka mpongolo shobe. ¹¹ Pantu mu nshiku mutanda Yawe apangile imyulu ne sonde, bemma na fyonse ifyabamo no kutusha pa bushiku bwalenga cine lubali. Eico Yawe apalile ubushiku bwe Sabata nokubushisha. ¹² Cindika wiso na noko, pakutila wingekala inshiku ishingi mu calo ico Yawe Lesa obe alepala kuli Iwe. ¹³ Taufwile ukwipaya uuli onse. ¹⁴ Taufwile ukucita ubucende. ¹⁵ Taufwile ukwibila uuli onse. ¹⁶ Taufwile ukupela ubunte bwa bufi pa mwina mupalamano obe. ¹⁷ Taufwile ukukumbwa ing'anda yamwina mupalamano obe; Taufwile ukukumbwa umukashi wa mwina mupalamano, umubomfi wakwe umwaume, umubomfi wakwe umwanakashi, ing'ombe yakwe, punda yakwe nangu conse ica mubiyo." ¹⁸ Bonse abantu abamwene icibulukuto na inkuba, na ukumfwa ishiwi lye penga na ukumona icushi icalefuma pa lupili. Ilyo abantu bacimwene, batutwine na ukwiminina akatalamukila. ¹⁹ Basosele kuli Mose, "sosa kuli ifwe, kabili twalaumfwa; lelo wileka Lesa asose kuli ifwe, pantu kuti twafwa." ²⁰ Mose asosele ku bantu, "mwitina, pantu Lesa naisa mukumyesha pakutila ukucindama kwakwe kwingaba muli imwe, na pakutila mwibembuka." ²¹ Eico abantu baiminine akatalamukila na Mose aile kwi kumbi lyatikama ukwali Lesa ²² Yawe asosele kuli Mose, "ifi efyo ufwile ukweba abena Israeli: 'imwe mwebene na mumona ukutila nalanda naimwe ukufuma ku mulu. ²³ Tamufwile ukuipangila mwebene tulesa tumbi pali ine, tulesa twa silfere nangu tulesa twa golide. ²⁴ Tamufwile ukumpangila icipailo ce loba, kabili mufwile mwapelapo ilambo lya fyabupe fyakoca, ifyabupe fye senge, impanga yobe ne ngombe yobe. Mu ncende yonse umo na lenga ishina lyandi ukucindikwa, nkesa kuli iwe na ukukupala. ²⁵ Nga mwampangila icipalo ca mabwe, tamufwile ukucikula na mabwe yaputulwa pantu nga mwabomfya ifyela pali cena, mukacikowesha. ²⁶ Tamufwile ukunina pa matabo pa cipailo candi, pakutila ubwamba bobe bwiba pabwelu."'