¹ Panuma ya ifi, imfumu yaikele bwino mwisano lyaiko kabili Yawe amulengele ukutuusha ku balwani bakwe bonse aba mushingulwike. ² Elyo Davidi atile kuli Natani kasesema, “Nomba mona, ine njikele mwisano lya fimuti fya keda, ilyo Imbokoshi ya Cipangano iyakwa Lesa yena ilifye mukati ke tenti.” ³ Elyo Natani atile ku mfumu, “Conse ico uli naco mu mano kacitafye, pantu Yawe ali na iwe.” ⁴ Lelo bulya bwine bushiku, ishiwi lyakwa Yawe lyaisa kuli Natani, nokumweba ati, ⁵ “Kabiye kebe umubomfi wandi Davidi, utile, ‘Ifi efyasosa Yawe ati, bushe niwe uli nokunkuulila iŋanda iyakwikalamo? ⁶ Ine nshatala njikala mu ŋanda ukutula pa bushiku nafumishe abena Israeli mu Egupto ukushinta pa bushiku bwa lelo. Ine naikalilafye ukwendauka, ukufuma pali ici cifulo no kuya pa cifulo cimbi mwitenti nge cakwikalamo. ⁷ Monse umo nyendauka pamo na bena Israeli bonse, bushe nalitala nsosa kuli kateeka nangu umo uo nakonkomesha ukucema abantu bandi abena Israeli ukuti, bushe ico mushankuulila iŋanda ya fimuti fya keda cinshi?’” ⁸ “Eico nomba, eba umubomfi wandi Davidi utile, ifi efyasosa Yawe umwine wa fita ati, ‘Nakusendele ukufuma mu mpanga ya mulemfwe, na mukukonka umukuni wa mpaanga kukwisa ba kateeka pa bantu bandi abena Israeli. ⁹ Lyonse mbafye na iwe konse uko wapitila, kabili nalipwisha abalwani bonse pa cinso cobe. Nomba ndi nokulenga ishina lyobe ukuba ilyalulumbi, kwati mashina ya bantu abacindami aba mwisonde. ¹⁰ Kabili nkapekanya incende iya bantu bandi abena Israeli, iyakuti emo nkababike pakuti bakaikwatile icifulo cabo umo bashakalebasunkanya. Abantu imbifi tabakatale ababacusha nakabili, ngefyo balecita kukutendeka. ¹¹ Cili nokuba ukufumafye pa nshita nasontele abapingushi pakati ka bantu bandi abena Israeli. Kabili ndi nokulenga ukakwate ukutuusha ukufuma ku balwani bobe bonse. Kabili Yawe nasosa kuli iwe ati, Yawe umwine ali nokukukuulila iŋanda. ¹² Ilyo inshiku shobe shikapwa kabili waya lala ukwalala ne fikolwe fyobe, ine ndi nokubuula umwana obe ukuba impyani yobe. Na ine nkakosha ubufumu bwakwe. ¹³ Uyu wine euli nokukuula iŋanda iye shina lyandi, kabili ndi nokukosha icipuna ca bufumu bwakwe pe na pe. ¹⁴ Ine nkaba wishi, elyo na ena akaba umwana wandi. Ilyo lyonse acita icilubo, ine ndi nokumukanda ne nkonto ya bantu bandi, mukumupuma ne mpumo shipuma abantu. ¹⁵ Lelo icitemwiko candi cena tacakatale acifuma pali ena, pamo ngefyo nacifumishe pali Saulo, uo nafumishe pa cinso cobe. ¹⁶ Iŋanda yobe elyo no bufumu fili nokubelelela umuyayaya cinso candi. Icipuna cabufumu cobe cili nokukoshiwa pe na pe.’” ¹⁷ Awe Natani epakuya sosa amashiwi aya yonse kuli Davidi no kumulondolwela ubusokololo bonse. ¹⁸ Elyo imfumu Davidi yaingile mukati no kwikala ku cinso cakwa Yawe, yasosa aiti, “Bushe ine nine ani, we Mfumu Yawe, kabili ulupwa lwandi luli cintu nshi pakuti undete apalepa fino? ¹⁹ Kabili kwati ifi fyacepa mu kumona kobe we Mfumu Yawe, walanda na pa mulandu wa mikalile ya kuntanshi iya ŋanda ya mubomfi obe. Bushe iyi e mibeele ubombelamo ku muntu uuli onse, we Mfumu Yawe? ²⁰ “Bushe finshi fimbi ificilile apa Davidi engasosa kuli iwe? Pantu umubomfi obe walimwishiba, we Mfumu Yawe. ²¹ Pa mulandu we shiwi lyobe elyo ukulingana no bufwayo bobe, naucita icintu ici icikankala no kulenga cishibikwe na ku mubomfi obe. ²² “Kwena uli mukulu we Mfumu Yawe! Takuli umbi uwalingana na iwe. Kabili takuli Lesa umbi lelo kanofye iwe, pamo ngefyo twayumfwila fwe bene na matwi yesu. ²³ Kabili ni bani ababa nga bantu bobe abena Israeli pano isonde? Bushe kwaliba umushobo na umbi uo Lesa wabo aile lubula nga bantu abakwe umwine, no kucindamika ishina lyakwe? Bushe kwaliba bambi abo Lesa wabo alecitila ifipeshamano ifikulu elyo ne fyakutiinya mukutamfya imishobo pamo ne milungu yabo ku cinso ca bantu bobe, abo walubula ukufuma ku Egupto? ²⁴ Pantu naushimpa abantu bobe abena Israeli nga bantu bobefye pe na pe. Kabili niwe Yawe waisa ba Lesa wabo. ²⁵ “Nomba kabili, we Yawe Lesa, ubake pe na pe icilayo ico walaya palwa mubomfi obe pamo ne ŋanda yakwe. Ucite ukulingana no kulaya kobe, ²⁶ pakuti ishina lyobe licindamishe umuyayaya. Elyo abantu bakatila, ‘Yawe umwine wa fita ni Lesa wa bena Israeli!’ Kabili iŋanda ya mubomfi obe Davidi ili nokubelelela pa cinso cobe. ²⁷ “We Yawe umwine wa fita, Lesa wa bena Israeli, wasokolola ifi ku mubomfi obe mukutila, ‘Ine nkakukuulila iŋanda.’ Kanshi umubomfi obe nao nasanga ukushipa pakupepa kuli iwe ili ipepo. ²⁸ We Mfumu Yawe, iwe uli Lesa! Amashiwi yobe yacishinka. Kabili naulaya umubomfi obe ifintu ifisuma. ²⁹ Nomba ube uwasekela mukupaala iŋanda ya mubomfi obe, pakuti itwalilile pe na pe pa cinso cobe. Pantu niwe we Mfumu Yawe ulandile, elyo ne paalo lyobe pa ŋanda ya mubomfi obe ili nokuba iyapaalwa pe na pe.”