¹ Elyo inko shonse isha bena Israeli shaishile kuli Davidi ku Hebuloni no kumweba ati, “Ifwe tuli munofu obe kabili umulopa obe. ² Mu nshita shapita, ilyo Saulo ali imfumu pali ifwe, iwe niwe waletungulula Israeli mu bulwi bwabo. Kabili Yawe atile kuli iwe, ‘Iwe uli nokucema abantu bandi abena Israeli, kabili ukaba kateeka wabo.’” ³ Elyo abakalamba ba bena Israeli bonse baishile kuli Dabidi ku Hebuloni, imfumu nayo epakucita icipangano nabo ku Hebuloni pa cinso cakwa Yawe. Elyo basuba Dabidi amafuta yakuba imfumu ya bena Israeli. ⁴ Dabidi ali ne myaka amakumi yatatu ilyo aishile pa bufumu, no kuteeka ateekelepo imyaka amakumi yane. ⁵ Mu Hebuloni ateekele icalo ca Yuda imyaka cine lubali na citika. Elyo mu Yerusalemu ateekele Israeli pamo na Yuda pa myaka amakumi yatatu na itatu. ⁶ Elyo imfumu Davidi na bantu baiko baile ku Yerusalemu kukulwisha abena Yebusi, abaleikala muli ici calo. Abena Yebusi baebele Dabidi ati, “Iwe muno tawaingilemo. Pantufye impofu nangu abalemana amolu ebalekutamfya.” Bena baletontonkanya ukuti, “Dabidi tekuti engilemo.” ⁷ Lelo Dabidi apokolwele ilinga lya Sioni, nomba uwitwa umusumba wakwa Dabidi. ⁸ Pali bulya bushiku, Davidi atile, “Uyo onse uuli nokucimfya abena Yebusi, afwile ukubomfya umufolo umupita amenshi pakufika kuli abo abalemana ne mpofu ababa abalwani bakwa Davidi.” E mulandu wine basosela abati, “Impofu na balemana tabali na kwingila kwisano lya mfumu.” ⁹ Awe Davidi epakuya ikala mukati ke linga nokulaita umusumba ukuti wakwa Davidi. Akuulamo umusumba ukushinguluka, ukufuma ku fibumbili ifyakwikasha ilinga ukufika na mukati. ¹⁰ Kabili amaka yakwa Dabidi yaleya yalecililakofye, pantu Yawe Lesa umwine wa fita aleba nankwe. ¹¹ Nomba Hiramu imfumu ya ku Turi yatumine inkombe kuli Dabidi, nabasenda imilando ya fimuti ifyalepesha ifya keda, bakabasa wa mbao elyo na bakasona wa mabwe mukukuulila Davidi isano. ¹² Dabidi aishiba ukuti Yawe namusuminisha ukuba imfumu pa bena Israeli kabili nasansabalika ubufumu bwakwe pa mulandu wa bantu bakwe abena Israeli. ¹³ Panuma, ilyo afumine mu Hebuloni no kwisa ku Yerusalemu, Davidi aupilepo na bambi bakashi basano, kabili alundapo na bakashi abo ashaupile mu bwinga. Kabili afyalilapo abana abaume na banakashi na bambi. ¹⁴ Aya e mashina ya bana abo afyele kulya: Shamua, Shobabu, Natani, Solomoni, ¹⁵ Ibihali, Elishua, Nefegi, Yafiya, ¹⁶ Elishama, Eliada elyo na Elifeleti ¹⁷ Ilyo Abafilisiti baumfwile ukuti nabasuba Davidi ukuba imfumu ya bena Israeli, baima na maka nganshi ukuya balemufwaya. Lelo Davidi ilyo aumfwa ukuti balemufwaya, aya ingila kwilinga. ¹⁸ Nomba Abafilisiti baisa no kusalanganina mwishika lya Refaimu. ¹⁹ Elyo Dabidi epakwipusha Yawe ati, “Bushe kuti naya no kulwisha Abafilisiti? Bushe ulebapeela mu maboko yandi?” Elyo Yawe amwasuka ati, “Kabiyefye pantu icine cine ndepeela Abafilisiti mu maboko yobe.” ²⁰ Kanshi Dabidi epakuya ku Baali Perasimu no kuya bacimfya kulya kwine. Asosa nokuti, “Ngefyo amenshi yapongoloka, Yawe napongolokela pa balwani bandi pa cinso candi.” Kanshi eco betila icifulo cilya ukuti Baali Perasimu. ²¹ Awe Abafilisiti basha no tulubi twabo kulya kwine, elyo Dabidi na bantu bakwe batusenda. ²² Kabili Abafilisiti babwekeshapo ukwisa tantama mwishika lya Refaimu. ²³ Kanshi Davidi epakwipusha Yawe, nao ayasuka ati, “Wibalungama pakunina pamulu, lelo ushinguluke ku numa yabo no kubasanshila ku ntanshi ya fimuti fya basamu. ²⁴ Eico bwangu bwangu nga waumfwa inshindo pa mulu wa fimuti fya basamu, wangufyanye pantu ninshi ni Yawe ewile pantanshi yobe kukulwisha ifita fya Bafilisiti.” ²⁵ Dabidi nao epakucita ifyo Yawe amukonkomeshe. Dabidi aipeye Abafilisiti inshila yonse ukufuma ku Gibeoni ukufikafye na ku Gesa.