¹ Davidi aimbile amashiwi ya muli ulu lwimbo kuli Yawe, ilyo Yawe amupokolwele ku balwani bakwe bonse na ku kuboko kwakwa Saulo. Davidi atile, ² “Yawe e cilibwe candi, ilinga lyandi kabili kapokolola wandi. ³ Lesa wandi e cilibwe candi, umo ine nguba, ni nkwela yandi kabili e lusengo lwe pusukilo lyandi. ⁴ Ena e maka yandi, icubo candi, kabili ipusukilo lyandi ukufuma ku bantu abalufyengo, abo mumpusushako ⁵ “Pantu amatamba ya mfwa yalinshingulwike, ne mikuku yabonaushi yalintiinishe. ⁶ Imyando ya ku calo ca bafwa yalimpombele. Elyo ne fiteyo fya mfwa fyali pa ntanshi yandi. ⁷ Mu kupelelwa kwandi nalilile kuli Yawe, kuli Lesa wandi eko nalilile. Ukufuma mwi Tempele emo aumfwilile ishiwi lyandi. Umusowa wandi waumfwika na mu matwi yakwe. ⁸ Isonde lyalitenkene no kusunkana, imifula ya myulu yasunkana. Fyalitenkene pantu alikalipe. ⁹ Mu myona yakwe mwafumine icushi. Mu kanwa kakwe mwafumine umulilo uoca, na kuli ena kwafuma umusolilo. ¹⁰ Afumine ku mulu no kwisa ikila pano panshi, imfifi ikulu nganshi yali panshi ya makasa yakwe. ¹² Kabili aninine na pali kerubi no kupupuka. Amonekele ninshi ali pa mapindo ya mwela. ¹¹ Alengele imfifi ukumushinguluka monse monse, na makumbi ayatikama kwati kutulumana kwa menshi. ¹³ Ukufuma mu lubuuto lwa pa ntanshi yakwe, amafito yayamba ukwaka umulilo. ¹⁴ Yawe abulukuta nge mfula mu mulu, ne shiwi lya Wapulamo lyaumfwika. ¹⁵ Aposa imifwi no kusalanganya abalwani, aponya ukubyata kwa nkuba no kubafulunganya. ¹⁶ Kabili panshi ya bemba palamoneka, elyo ne mifula ye sonde yashala pa mbilibili, pa mulandu wa kukalipa kwakwa Yawe, na ku maka ya kupema kwa mu myona yakwe. ¹⁷ “Elyo atambalike ukuboko kwakwe ukufuma mu mulu, anjikata no kunsenda. ¹⁸ Angabwile ukufuma mu menshi ayengi. Ampokolwele ku balwani bandi abamaka, ku bampata kabili abancila amaka nganshi. ¹⁹ Banjimine mu bushiku bwa cinkunka candi, lelo Yawe ali e shintililo lyandi. ²⁰ Amfumishemo no kumbika apapabuka, andubula no kundubula pa mulandu wakuti alintemwa ine. ²¹ “Yawe nancitila ukulingana no bulungami bwandi. Ukulingana na bukaele bwa maboko yandi, Yawe nanambula. ²² Pantu ine ndacita ififwaya Yawe, kabili nshabala nsangukila Lesa wandi. ²³ Nshafumako ku mafunde yakwe yonse ayaba ku ntanshi yandi, kabili ku fipope fyakwe nshatalukako. ²⁴ Kanshi ine ndi uwabula akalema ku cinso cakwa Yawe, naliitalusha ne mwine ku bubifi. ²⁵ Eico Yawe nanambula ukulingana no bulungami bwandi. Kabili ukulingana no bukaele ubo amona muli ine pa cinso cakwe. ²⁶ “Ku wacishinka, na iwe we mwine ulailanga uwacishinka. Kabili ku bakaele, na iwe we mwine ulailanga uwakaele. ²⁷ Kuli abo abapwililika, na iwe we mwine ulailanga ukuba uwapwililika. Lelo kuli abo abapondama, na iwe we mwine ulailanga uwacenjela. ²⁸ Iwe upususha abaicefya, lelo amenso yobe yalola pa bacilumba pakuti ubanashe. ²⁹ Mu cinefye ala niwe cisaniko candi, we Yawe. Kabili Lesa wandi ewalula imfifi yandi ukuba ulubuuto ³⁰ 30Ku maka yobe kuti nasansa impuka ya mulalo, kabili nga cakuti ndi na Lesa, kuti nawisha ilinga. ³¹ Lelo Lesa ena, inshila yakwe yalilungama, ne shiwi lyakwa Yawe lyacishinka. Ena ni nkwela kuli bonse abafisama muli ena. ³² “Nga Lesa umbi nani, uwingacila pali Yawe? Kabili uwakosa nge cilibwe nani, ukucila pali Lesa wesu? ³³ Ala ni Lesa eumpangasha amaka, kabili eulenga inshila yandi ukuwama. ³⁴ Eulenga makasa yandi ukuba nga makasa ya nsebula, eungafwa ukwiminina apasansama pa mpili. ³⁵ Alasambilisha ne minwe yandi ku bulwi, no kukosha amaboko yandi pakukana ubuta bwa mukuba ³⁶ Kabili walimpeela inkwela ye pusukilo. Elyo ukwafwilisha kobe kuli ine ekwalenga ukuti njishibikwe. ³⁷ Kabili walikusha inshila umwakupita intampulo shandi, na makasa yandi tayashetuka. ³⁸ Nakunkunike abalwani bandi no kubonaula, kabili nshapilibukile kunuma mpaka nabapwisha. ³⁹ Napwishishefye bonse umupwilapo, icakuti bafilwa ukwima, bawa na pa nkasa shandi. ⁴⁰ Pantu walimpangeshe amaka yakulwilako, walenga na balwani bandi ukukontama pa nkasa shandi. ⁴¹ Walengele na balwani bandi bamfutatile inuma shabo pakufulumuka, kabili abampata bena nabonaula. ⁴² Bafwaile uwakubafwa, lelo takwali nangu umo uwakubapususha. Balilile kuli Yawe, nao teti abasuke nakalya. ⁴³ Nalibonawile baba ngo lukungu lwa panshi. Kabili nabanyantaula no kubakandawila baba kwati matipa ya mu musebo. ⁴⁴ “Walimpuswishe ukufuma ku bantu bandi abansangukila. Wansungilile kwati nine mukalamba wa mishobo. ⁴⁵ Abantu abo nshaishiba, ebalemombela. Abenafyalo baisa mukumpakata. Ilyo lyonse baumfwa cimo kuli ine, banakila. ⁴⁶ Bena bonse baba abatompoka imitima, besa baletutuma ukufuma mu malinga yabo. ⁴⁷ “Nakalebalika kuli Yawe! Napaalwe na matotelo Icilibwe candi! Asumbulwe Lesa Icilibwe ce pusukilo lyandi! ⁴⁸ E Lesa uunandwilako, uulenga imishobo ukuba pa nkasa shandi. ⁴⁹ Kabili uumpususha ku balwani bandi. We Yawe nimwe unsumbula mu mulu ukucila abalwani bandi. Wandubula ukufuma ku balwani bandi abafimfulunganya. ⁵⁰ “Eico kanshi ine ndifye nokulalumbanya iwe we Yawe pakati ka mishobo ya benafyalo. Ine ndifye no kulakwimbila ishamalumbo ishe shina lyobe. ⁵¹ Ulalenga imfumu yobe ukucimfya, kabili ulalanga uluse ulushipwa ku wasubwa obe, kuli Davidi pamo na ku bufyashi bwakwe pe na pe.”