¹ Ilyo namfumu wa ku Sheba aumfwile ululumbi lwa pali Solomoni, aishile ku Yerusalemu kukwisa mwesha mu mepusho ayakosa nganshi. Afika no mulongo ukalamba uwa babomfi ne ngamila ishasendele ifya cena cisuma, golide uwingi nganshi elyo no tumabwe utwauma umutengo. Ilyo afika kuli Solomoni atendeka ukulanda nankwe pa fintu fyonse ifyali mu mano yakwe. ² Solomoni nao ayasukafye amepusho yakwe yonse. Tapali icamucushishe pakumulondolwela ³ Ilyo namfumu wa ku Sheba amwene amano yali muli Solomoni, pamo pene ne sano lintu akuulile, ⁴ icakulya icali petebulo lyakwe, ifyo bacilolo bakwe baikele, imitumikile ya babomfi elyo nefyo bafwele, bakatumika ba lukombo lwa mfumu mu fyakufwala fyabo elyo na malambo yakoca ayo apeele pa ŋanda yakwa Yawe, ena camupesha amano. ⁵ Elyo aeba imfumu Solomoni ati, “Akasebo naumfwile ilyo ncili mu calo candi pafyo wabomba elyo na pa mano yobe kanshi fyacine. ⁶ Lelo nshasumine ifyo balelanda mpakafye naisa imwena na menso yandi. Kabili mona ifyo balondolwele kuli ine tafyafikile na pali citika wa bwingi bwa mano yobe. Iwe walicila pa lulumbi naumfwile. ⁷ “Yangu ifyo bashuka abaume bobe! Yangu ifyo bashuka bacilolo bobe, abeminina pantanshi yobe cila nshita mukumfwa amano yobe. ⁸ Napaalwe na matotelo Yawe Lesa obe, uwasekela muli iwe elyo akubika na pa cipuna cakwe ukuba imfumu iyakulabombela Yawe Lesa obe. Elyo pa mulandu wafyo Lesa atemwa abena Israeli no bufwayo bwakwe ubwakubasunga pe, eco akubikile ukuba imfumu pali bena, pakubaputwila imilandu yabo bwino kabili mu bulungami.” ⁹ Elyo apeela imfumu amatalanta umwanda umo na makumi yabili 120 aya golide, ifya cena cisuma ifingi nganshi elyo no tumabwe utwauma umutengo. Takwatala akuba ifya cena cisuma ifingalingana nefyo namfumu wa ku Sheba apeele imfumu Solomoni. ¹⁰ Abantu bakwa Hiramu elyo na bantu bakwa Solomoni ebasendele golide ukufuma ku Ofiri. Kabili ebaletele ne milando ya cimuti ca aligumi elyo no tumabwe utwauma umutengo. ¹¹ Imfumu yabomfya imilando ya aligumi pakupanga amatabo ya ku ŋanda yakwa Yawe na ku ŋanda ye sano. Kabili afibomfya mukupangilako amaseese ne nsango ifya bakemba wa nyimbo. Kabili takwatalile akuba ifyaba ngefi mu calo ca bena Yuda. ¹² Imfumu Solomoni epakupeela namfumu wa ku Sheba fyonse ifyo afwaile kabili ifyo alombele. Kanshi ena epakumupeela ifintu ifingi ukucila na pafyo aletele. Elyo namfumu wa ku Sheba pamo na babomfi bakwe baima babwelelamo ku calo kumwabo. ¹³ Golide yonse iyo Solomoni alepoka cila mwaka yalefika amatalanta 666, ¹⁴ ukukanalundapo uwa mu misonko uwalesonka bakashitisha elyo na bamakwebo. Kabili imfumu shonse isha ku Arabia elyo na balashi ba mu calo balaleta golide na silifa kuli Solomoni. ¹⁵ Elyo imfumu Solomoni apanga inkwela imyanda ibili ishikalamba kuli golide uwakufula. Cila nkwela afulilako golide uwafina amakilo yatatu na citika. ¹⁶ Kabili apanga inkwela ishinono imyanda itatu kuli golide uwakufula. Pali cila nkwela afulilapo golide uwafina kilo umo na citika. Imfumu epakuya bika ishi nkwela mu muputule wa mwisano uo baleita ukuti “Umutengo wa ku Lebanoni.” ¹⁷ Kabili imfumu yapanga icipuna ca lulumbi ku meno ya nsofu elyo yalambatikako golide wine wine. ¹⁸ Ici icipuna cakwete amatabo mutanda elyo cakwete ne cakunyantapo ica golide. Ku mbali shonse isha cipuna kwali ifyakutuushapo amaboko, ne nkalamo naiminina kuli cila lubali. ¹⁹ Inkalamo shimbi ikumi limo na shibili (12) shaiminina pa matabo yonse mutanda, pali cila mpela ye tabo paiminina imo. Kabili takwatalile akupangwa icipuna ngeci mu bufumu ubuli bonse. ²⁰ Ifipe fyonse ifyakunwenamo ifya mfumu Solomoni fyali ifya golide elyo ne fipe fyonse ifya mu ŋanda ye sano iyo baleita ukuti “Umutengo wa ku Lebanoni” fyali fya golide wine wine. Tamwali icapangilwe kuli silifa pantu silifa tayali iyacindama mu nshiku shakwa Solomoni. ²¹ Imfumu yakwete amato aya ku Tashishi ayengi umwalebomba abantu bakwa Hiramu. Umuku umo pa myaka itatu aya mato yalebwela nayasenda golide, silifa, ameno ya nsofu, bakolwe bakalamba elyo na bapikoko. ²² Imfumu Solomoni yacilile imfumu shonse isha pano isonde ubunonshi na mano. ²³ Kabili shonse imfumu sha pano isonde shalefwaisha ukumonana na Solomoni kukumfwako amano Lesa abikile mu mutima wakwe. ²⁴ Panuma ya cila mwaka, onse uwaisako aleleta icabupe. Bamo baleleta ifipe ifya silifa, golide, imingila, ifyanso fya bulwi, ifinyamuti ifyanunka ubusaka muri pamo na fimbi ifya cena cisuma, bakabalwe elyo ne mfalashi. ²⁵ Solomoni akwete utuyanda amakana yane utwakwikalamo bakabalwe na maceleta, elyo akwete bakabalwe amakana ikumi limo na babili abo abikile mu misumba ya maceleta elyo bambi ali nabo mu Yerusalemu. ²⁶ Kabili ewali kateeka pa shafumu shonse ukufuma ku mumana wa Yufurate ukufika ku calo ca Bafilisiti ukuya na ku mupaka wa bena Egupto. ²⁷ Imfumu yalengele ubwingi bwa silifa ukufula mu Yerusalemu kwati mabwe elyo ne fimuti ifyalepesha ifya keda ukufula kwati fimuti fya mwisamba lya mpili ifya mikunyu. ²⁸ Bakabalwe bakwa Solomoni babashitile ukufuma ku Egupto elyo no kufuma mu fyalo fimbi. ²⁹ Lelo pa milandu imbi iya pa bufumu bwakwa Solomoni ukufumafye pa kutendeka mpaka na ku mpela, bushe tafyalembwa mu mashiwi yakwa Natani kasesema, mu busesemo bwakwa Ahiya umwina Shiloni elyo na mu fimonwa fyakwa Ido uwamwene palwakwa Yeroboamu umwana wakwa Nebati? ³⁰ Solomoni aikele mu Yerusalemu no kuteeka icalo conse ica Israeli pa myaka amakumi yane. Ilyo afwile, bamushiikile ku ncende ukwalala ifikolwe fyakwe mu musumba wakwa Davidi wishi. ³¹ Elyo umwana wakwe umwaume Reoboamu ewamupyene pa bufumu.