¹ Nomba ilyo Solomoni apwile ukupepa, umulilo waponene ukufuma ku mulu, waisa oca ilambo lyakoca na malambo yonse, elyo no bucindami bwakwa Yawe bwaisula mwi Tempele lyonse. ² Bashimapepo bafilwa no kwingila mu ŋanda yakwa Yawe pa mulandu wakuti ubucindami bwakwa Yawe bwaisula mu ŋanda yakwa Yawe. ³ Ilyo abana bakwa Israeli bonse bamona uko umulilo ulefuma ku mulu elyo no bucindami bwakwa Yawe buli pa mulu we Tempele, bafukama apakubatilwa amabwe, bakontamika imitwe panshi, elyo bapepa kabili bapeela no kutotela kuli Yawe, balasosa abati,“Pantu ena musuma! Ukutemwa kwakwe kwamuyayaya.” ⁴ Elyo imfumu na bantu bonse batuula amalambo pa cinso cakwa Yawe. ⁵ Imfumu Solomoni yatuula ilambo ilya ŋombe amakana amakumi yabili na yabili elyo impaanga ne mbushi 120,000. Kanshi imfumu pamo na bantu bonse epakulubwila iŋanda kuli Yawe. ⁶ Bashimapepo bonse baya iminina pa ncende shabo, na bena Levi nabo bacita cimo cine, nabekata ifilimba fyakwa Yawe ifyo imfumu Davidi yapangile ifyakulisha pakulumbanya Yawe. Efyo babomfeshe ilyo Davidi apeela amatotelo no kusosa ukuti, “Ukutemwa kwakwe kwamuyayaya.” Ku lubali lumbi ukushali abena Levi, bashimapepo balalisha amapenga ninshi abena Israeli bonse nabeminina. ⁷ Kabili Solomoni alubwila kuli Lesa incende ya pakati iya lubansa iyali ku ntanshi ya ŋanda yakwa Yawe na palya epo atuulile amalambo yakoca elyo na mafuta ya mutuulo wakwampana. Neci acitile pa mulandu wakuti ubulambo bwa mukuba apangile bwalicepele ukubikapo amalambo yakoca, imituulo ya cabunga elyo ne fipande fya mafuta. ⁸ Kanshi Solomoni pali ilya nshita epakucita inshikunkulu iya nshiku cine lubali ninshi ulukuta ulukalamba ulwa bena Israeli lonse luli nankwe, abantu bafumine ku Lebo Hamati ukuya shinta ku kamana mainsa aka pa mupaka wa calo ca Egupto. ⁹ Pa bushiku bwalenga cine konse konse balongana bonse pamo, pantu pakulubwila kuli Lesa ubulambo basefeshe inshiku cine lubali elyo ne nshikunkulu nayo inshiku na shimbi cine lubali. ¹⁰ Pa bushiku bwalenga amakumi yabili na shitatu mu mweshi walenga cine lubali epo abweseshemo abantu ku mayanda yabo. Babwelelamo abasansamuka no kusekelela mu mitima yabo pa fintu fyonse ifisuma Yawe acitile Davidi na Solomoni elyo na bantu bakwe abena Israeli. ¹¹ Kanshi Solomoni efyo apwile ukukuula iŋanda yakwa Yawe elyo ne sano lyakwe, kabili afikilishapo no kucita fyonse ifyo alefwaya ukubomba mu ŋanda yakwa Yawe elyo na kwisano lyakwe. ¹² Elyo Yawe amonekela kuli ena mu nshita ya bushiku no kumweba ati, “Niŋumfwa ipepo lyobe kabili ninsala incende ino ukuba iyandi apakuntuulila amalambo. ¹³ Inshita shimo nakulaisala umulu icakuti ne mfula yakaana ukuloka, nangu naeba makanta ukwisa lya ifilyo fyenu, nangu natuma icikuko mu bantu bandi. ¹⁴ Lelo nga cakuti mwe bantu bandi, abetwa peshina lyandi mwaicefya, elyo mwapepa no kufwaya icinso candi, no kufuma ku fibi fyenu, elyo ndi nokumfwa ukufuma ku mulu no kwisa mubelela uluse no kuposha icalo cenu. ¹⁵ Nomba amenso yandi yakulaikala ayaisuka na matwi yandi yakulakutika ku mapepo ayakulapeelwa pali ino ncende. ¹⁶ Ninsala no kusangulula ino iŋanda pakuti ishina lyandi likabelelele pano inshita yonse. Amenso yandi no mutima wandi fyakulaba pano lyonsefye. ¹⁷ “Kabili iwe, nga cakuti wakulaenda pa cinso candi ngefyo wiso Davidi aendele, elyo no kucita fyonse ifyo ndekukonkomesha, no kubaka ifipope na mafunde yandi, ¹⁸ nkalenga icipuna cobe icabufumu ukubelelela, ngefyo napangile icipangano na wiso Dabidi ilyo nasosele ati, ‘Tawakafilwe ukukwata umwaume uwakuteeka pa bena Israeli.’ ¹⁹ Lelo nga cakuti wafutuka no kusuula ifipope na mafunde nkupeele, ukeme ukaye mukubombela imilungu imbi no kuipepa, ²⁰ lyena nkanukula Israeli ukufuma mu calo candi ici mbapeele, kabili nkakaana ne iŋanda ine iyi nsangulwile umwakuba ishina lyandi. Nkaikaana ikafume na pa cinso candi, ikashalafye lyashi ilyakulandapo abantu na bantu kabili icintu icakuseka abantu bonse. ²¹ Kabili nangu iŋanda ino ili iyapulama ifi, bonse abakalapitapo bakalapapafye nokulasosa abati, ‘Cinshi ico Yawe acitila icintu ca musango uyu kuli cino calo na ku ŋanda iyi?’ ²² Abantu bakalaasuka abati, ‘Ni pa mulandu wakusuula Yawe, Lesa wa fikolwe fyabo uwabafumishe mu Egupto, no kupilibukila ku milungu imbi ukulaipepa no kuitumika, eco aletela ifinkunka fyonse ifi pali bena.’