¹ Panuma ya ifi fintu ifisuma kabili ifyacishinka Hesekia acitile, Senakeribu imfumu ya bena Asiria yaishile sansa no kwingilila icalo ca bena Yuda. Ashingulwike imisumba ya malinga ukupekanya ukuyatoba pakuti engilemo. ² Ilyo Hesekia amona ukuti Senakeribu aisa mukufwaya ukulwisha abena Yerusalemu, ³ aumfwana na bacilolo bakwe na bashilika ba nkondo ifyakuti bacite pakwisala utumfukumfuku twa menshi utwa kunse ya musumba, nabo epakumwafwa. ⁴ Kanshi abantu abengi epakulongana, bacilika ne ntulo sha menshi shonse no mulonga uwapitile pakati ka calo. Balanda na mashiwi ayakuti, “Cinshi twalalekela imfumu ya bena Asiria ikwate amenshi?” ⁵ Elyo abombeshe na maka, alungisha incende shonse ishaonaike ku cibumba, akuulapo ne mpungu pamulu. Akuula ilinga na limbi kunse ya linankwe, akosha ne fibumbili ifyakwikasha ifikulwa fya musumba wakwa Davidi. Kabili apanga ne fyanso ifingi elyo ne nkwela. ⁶ Asonta abakalamba ba bashilika ukulatungulula abantu. Alonganika na bantu bonse pa cibansa cali pa mpongolo ya musumba no kubeba amashiwi ayacikoselesho ayakuti, ⁷ “Mube abakosa kabili abashipa. Mwikwata umwenso nangu ukuba abatompoka pa mulandu wa ficitile iyi mfumu ya bena Asiria na bashilika bakwe, pantu ifwe tuli na maka yakwa Lesa ayo ena takwete. ⁸ Ena akwetefye amaka ya ku maboko, lelo ifwe tuli na maka yakwa Yawe, Lesa wesu uuli nokutwafwa ukulwisha inkondo shonse.” Elyo abantu bonse bapuputulwa pa mulandu wa mashiwi yacikoselesho ayo imfumu ya bena Yuda Hesekia alandile. ⁹ Elyo Senakeribu imfumu ya bena Asiria na bashilika bakwe, ninshi bacili nabashinguluka umusumba wa Lakishi, atuma bacilolo bakwe ku Yerusalemu kuli Hesekia imfumu ya bena Yuda elyo na ku bantu bonse abaliko amashiwi ayakuti, ¹⁰ “Ifi efyo Senakeribu imfumu ya bena Asiria yasosa ifyakuti, ‘Ni ku maka nshi ushintilileko ayalengele wikalilile mu Yerusalemu ilyo ninkushinguluka’ ¹¹ Nga mwaumfwila Hesekia kufyo alemweba ati, ‘Yawe Lesa wesu aletupususha ukufuma ku maka ya mfumu ya bena Asiria,’ ninshi mulebepwafye, alelengafye mufwe ku cilaka na ku nsala. ¹² Bushe te Hesekia umo wine uyu uwafumishe incende shakwe mu tupili ishakupepelamo ne fibumbili fyakwe ifya malambo, aeba na bena Yuda na bena Yerusalemu ukuti, ‘Mufwile ukulabomfyafye ubulambo bumo mpo, epo muleocela amalambo?’ ¹³ “Bushe imwe tamwaishiba ifyo ine ne fikolwe fyandi twacita ku bantu aba mu fyalo fimbi? Bushe imilungu ya iyo mishobo yalikwetepo amaka ayakupokolola ifyalo fyabo kuli ine? ¹⁴ Mulungu nshi wa pa mishobo yonse iyo ifikolwe fyandi fyaonawile waeshako ukupususha abantu bakwe kuli ine? Nga kanshi uyo mulungu wenu kuti wamupususha shani ku minwe yandi? ¹⁵ Eico mwileka uyu Hesekia amubepe no kumulufyanya ifi fine alecita. Mwimusuminisha iyoo, pantu takwatala akuba umulungu wa mushobo uuli onse nangu ubufumu uwalubulapo abantu bakwe ukufuma kuli ine nangu ku fikolwe fyandi. Nga kanshi umulungu wenu kuti wamupokolola ukufuma mu kuboko kwandi?” ¹⁶ Bacilolo bakwa Senakeribu batwalililafye ukulanda amashiwi yakususha Yawe Lesa pamo pene no mubomfi wakwe Hesekia. ¹⁷ Imfumu ya ku Asiria yabikapo amakalata ayakutuka Yawe, Lesa wa bena Israeli, yalanda na mashiwi aiti, “Califye nga filya fine cali ku milungu ya bantu ba mu fyalo fimbi iyafililwe ukulubula abantu baiko ukufuma kuli ine, efyo no mulungu wakwa Hesekia ulefilwa ukulubula abantu bauko ukufuma kuli ine.” ¹⁸ Bacilolo bakwa Senakeribu babilikisha ku bantu ba mu Yerusalemu abali pa cibumba mu lulimi lwa bena Yuda pakubafulunganya no kubatiinya, pakuti babapoke umusumba. ¹⁹ Balalanda pali Lesa wa bena Yerusalemu mu musango umo wine balelandilamo pa milungu ya mishobo ya mu fyalo fimbi iyapangilwe ne minwe ya bantu. ²⁰ Elyo imfumu Hesekia na kasesema Esaya mwana Amosi balomba no kulilila kuli Lesa wa mu mulu mwipepo pali ifi fine. ²¹ Yawe epakutuma malaika aisa onaula abashilika bonse pamo na bakalamba ba fita fya nkondo elyo na bacilolo mu nkambi ya mfumu ya bena Asiria. Kanshi epakubwelelamo ku calo cakwe ne nsoni nganshi. Elyo cilyafye ayaingila mwitempele lya mulungu wakwe, bamo pa bana bakwe bamwingilila bamukomaula ku lupanga. ²² 2anshi efyo Yawe apokolwele Hesekia pamo na bantu ba mu Yerusalemu ukufuma kuli Senakeribu imfumu ya bena Asiria elyo ukufumafye na ku bantu bambi bonse. ²³ Lesa abapeela ne cibote ukufuma ku mbali shonse. Abantu abengi bayamba ukuleta imituulo yakwa Yawe ku Yerusalemu elyo ne fyabupe ifikankala kuli Hesekia imfumu ya bena Yuda. Ukufuma pali ilya nshita Hesekia aikele uwacindikwa nganshi ku mishobo yonse. ²⁴ Mu nshiku shine shilya, Hesekia alwala ubulwele ubwafwaile ukumwipaya, asukile apapata na kuli Yawe. Yawe alyumfwile ipepo lyakwe amuposha amucitila ne cipeshamano. ²⁵ Lelo umutima wakwa Hesekia waingililwa ne cilumba, afilwa no kutotela uluse lwakwa Yawe, icalengele ukuti Yawe amufulilwe, afulilwe abena Yuda no kufulilwa Yerusalemu. ²⁶ Elyo Hesekia epakulapila pa cilumba cali mu mutima wakwe, pamo pene na bantu abali mu Yerusalemu, no bukali bwakwa Yawe bwakaana ukubeshila mu nshiku shakwa Hesekia. ²⁷ Mu nshiku shine shilya, Hesekia alwala ubulwele ubwafwaile ukumwipaya, asukile apapata na kuli Yawe. Yawe alyumfwile ipepo lyakwe amuposha amucitila ne cipeshamano. ²⁹ Lelo umutima wakwa Hesekia waingililwa ne cilumba, afilwa no kutotela uluse lwakwa Yawe, icalengele ukuti Yawe amufulilwe, afulilwe abena Yuda no kufulilwa Yerusalemu. ²⁸ Elyo Hesekia epakulapila pa cilumba cali mu mutima wakwe, pamo pene na bantu abali mu Yerusalemu, no bukali bwakwa Yawe bwakaana ukubeshila mu nshiku shakwa Hesekia. ³⁰ Ni mfumu Hesekia uwacilike umumana wa Gihoni, ashosha amenshi lwa ku masamba wa musumba wakwa Davidi. Kanshi ena muli conse ico acitile alisangilemo ukushuka. ³¹ Lelo ilyo intungulushi sha ku Babiloni shatumine inkombe kukwisa mwipusha pa cipeshamano cacitike mu calo, Lesa amulekelefye pakuti amone no kwishiba ifintu fyonse ifyaba mu mutima wakwe. ³² Palwa fintu fimbi ifyo Hesekia acitile pa bufumu bwakwe na pa mapepo apepele kuli Lesa, fyonse fyalilembwa mu fimonwa fyakwa Esaya kasesema mwana Amosi mu citabo calembwamo imfumu sha bena Yuda ne sha bena Israeli. ³³ Hesekia elyo afwile, aile lala ukwalala ifikolwe fyakwe, bamushiika pa lupili apaba inshinshi sha ba mu lupwa lwakwa Davidi. Ilyo afwile, abantu bonse abena Yuda na ba mu Yerusalemu balimucindike. Elyo umwana wakwe Manase amupyana pa bufumu.