¹ Elyo abantu bonse aba mu Yuda babuulile Usia umwana wakwa Amasiya ninshi alifye ne myaka ikumi limo na mutanda, eo bapyanika aba imfumu pa cifulo cakwa wishi. ² Ewaishile kuula cipya cipya umusumba wa Elati, aubwesesha na mu maka ya bena Yuda panuma ya mfwa yakwa Amasiya. ³ Usia ali ne myaka ikumi limo na mutanda ilyo atendeke ukuteeka pa bufumu kabili aikele pa bufumu mu musumba wa mu Yerusalemu pa myaka amakumi yasano na ibili. Nyina ali mwina Yerusalemu. Ishina lyakwe ali ni Yekoliya. ⁴ Ena acitile ifyalungama pa cinso cakwa Yawe filya fine wishi Amasiya acitile. ⁵ Mu nshiku shakwa shimapepo Sakaria, imfumu yatendeka ukufwaya Lesa, na Sakaria amusambilisha ifyakuba na katiina kuli Lesa. Na lyonse ilyo alomba kuli Yawe, Lesa alemupeela ukucimfya. ⁶ Aima aya mukulwisha Abafilisiti, kabili aya tobaula amalinga ya ku misumba ya Gati, Yabune elyo na Ashidodi. Elyo akuula cipya cipya imisumba iyali mupepi na Ashidodi elyo ne ncende shimbi isha mu Bafilisiti. ⁷ Lesa epakumwafwa mu nkondo shonse isho alwile na Bafilisiti elyo na Baarabu abaleikala mu Guri Baali kabili na pa bena Meuni. ⁸ Abena Amoni bayamba ukulapeela umusonko kuli Usia, no lulumbi lwakwe lwasalangana ukufikafye na ku mupaka wa bena Egupto, pa mulandu wakuti alishile kwata nganshi amaka. ⁹ Elyo mu musumba wa Yerusalemu akuulamo impungu, imo pa Mpongolo ya pa Cinshoko, imbi pa Mpongolo ya ku Mukonko elyo imbi pa ncende apo icibumba cali ne cifutu, elyo akuulako ne linga. ¹⁰ Elyo aya kuula impungu na shimbi mu matololo, aimbamo ne fishima fya menshi, pa mulandu wakuti alikwete ifitekwa ifingi mwisamba lya mpili elyo na mu mawanga. Alikwete abakubomba mu mabala elyo na mu myangashi iyali mwisamba lya mpili na mu ncende ishafunda pantu ali umuntu uwatemenwe ubulimi. ¹¹ Usia akwete abashilika ba nkondo abasambilishiwa bwino kabili abaishiba ukulwa. Lyonse bali abaiteyanya ukuya ku bulwi mu mabumba yabo umo batantikilwe, no walebakanya mu mabumba ni Yeiyeli uwali kalemba pamo na Maaseya nao uwali umukalamba wa bashilika. ¹² Uwaletungulula aba bonse ni Hanania uwali umo pali bacilolo ba kwisano. Impendwa yonse iya ntungulushi sha ndupwa sha bakulwa inkondo yali 2,600. ¹³ Aba ebaletungulula abashilika abasambilishiwa ukulwa abali 307,500. Bali abamaka nganshi abaleafwa imfumu ukulwisha abalwani abali bonse. ¹⁴ Kabili lyonse ilyo baleya ku nkondo, Usia alepeela abashilika bakwe bonse inkwela, amafumo, ifimpompo fyakufwala ku mutwe, amalaya ya fyela, amata elyo na mabwe ya mu malekeni. ¹⁵ Pa mpungu akuulile mu Yerusalemu elyo na pa fifutu fya finshoko, abomfya abantu abacenjela ukupangilapo bamashini abakulasa imifwi no kukunkulusha amabwe. Ululumbi lwakwe lwasalangana mpanga yonse na mu ncende shakutali pantu Lesa alimwafwile mpaka akwata amaka. ¹⁶ Lelo ilyo Usia amona ukuti akwata amaka, aingililwa ne cilumba icamulengele no kuwa. Aba umubifi kuli Yawe, Lesa wakwe, icakuti aya ingila mwi Tempele lyakwa Yawe no kuya oca ububani pa bulambo bwa bubani. ¹⁷ Elyo Asaria shimapepo na bambi bashimapepo bakwa Yawe abashipile baingila mukati umo ali. ¹⁸ Baya mukalipila no kumweba abati, “Tawakwata nsambu shakucita ifi ulecita, iwe Usia, ishakocela Yawe ububani. Iyi, milimo ya bashimapepo aba mu lupwa lwakwa Aroni, ebasuminishiwa umulimo wakoca ububani. Fumamo mu cifulo camushilo pantu naulufyanya, elyo na Yawe Lesa takucindikilepo pafyo ulecita.” ¹⁹ Nomba Usia afulwa ninshi acili naikata ne cakocelamo ububani mu minwe yakwe. Lelo lilya line acili nafulilwa bashimapepo apo baiminine pantanshi ya bulambo bwa bubani mu ŋanda yakwa Yawe, ifibashi fyaisa fuluma pa mpumi yakwe. ²⁰ Cilya Asariya shimapepo mukalamba elyo na bashimapepo bambi abali nankwe bamulolesha, bamona nokuti nakwata ifibashi pa mpumi, bwangu bwangu bamufumisha panse. Nao wine asumina bwangu bwangu ukufuma, pa mulandu wakuti Yawe amulwalika. ²¹ Kanshi imfumu Usia ali ne fibashi ukushintafye no bushiku afwile. Aikele uwapatulwa ku ŋanda yakwe ico ali ne fibashi, kabili balimutalwishe na ku ŋanda yakwa Yawe. Ilyo acili mu bulwele umwana wakwe Yotamu ewalebomba imilimo ya pa bufumu no kutungulula abantu bonse aba mu calo. ²² Palwa fintu fimbi ifya pa bufumu bwakwa Usia, ukufumafye ku kutendeka ukufika na ku mpela, fyonsefye kasesema Esaya mwana Amosi ewafilembele. ²³ Usia asuka afwa no kuya lala ukwalala ifikolwe fyakwe, kabili baya mushiika mupepi noko bashiikile ifikolwe fyakwe, mwibala lya shamfumu, pantu batile, “Uyu ali ne fibashi.” Elyo Yotamu umwana wakwe ewamupyene pa bufumu.