¹ Mu mwaka walenga cine lubali, Yehoiyada akoseshe amaka yakwe. Elyo acita icipangano ku bakalamba ba pa fita imyanda, Asariya mwana Yerohamu, Ishimaeli mwana Yehohanani, Asariya mwana Obedi, Maaseya mwana Adaiya elyo na Elishafati mwana Sikiri. ² Aba bantu bapitana mukati ka calo conse ica bena Yuda balelonganika abena Levi elyo ne ntungulushi sha mishobo mu misumba ya bena Yuda ukuti bakese ku Yerusalemu. ³ Bonse baisa longana pa ŋanda yakwa Lesa epo bapanga icipangano na Yoashi imfumu uwalifye umwaice. Yehoiyada abeba ati, “Umwana wa mfumu afwile ukwamba ukuteeka, ngefyo Yawe alaile ku ba mu bufyashi bwakwa Dabidi. ⁴ Nomba ifi efyo muli nokucita ilyo bashimapepo na bena Levi baisa ku milimo yabo pe Sabata. Impuka imo iyabutatu yakulalinda pa mpongolo. ⁵ Impuka na imbi iyabutatu ili nokuya mukubombela kwisano elyo ne mpuka yakulekelesha iyabutatu ili nokulabombela pa mpongolo iyitwa ‘Umufula.’ Elyo bonse abashala bali nokulaba mu lubansa lwa ŋanda yakwa Yawe. ⁶ Takuli nangu umo uufwile ukwingila mu ŋanda yakwa Yawe, kanofye bashimapepo elyo na bena Levi abali pa milimo. Bena kuti baingila pantu balituulwa, lelo abaume bambi bonse bafwile ukulonda ifyo Yawe abeba ukusunga. ⁷ Abena Levi bali nokwikala nabashinguluka imfumu, elyo cila muntu afwile ukwikata icanso mu minwe yakwe. Na onse uwapula ifunde no kwingila mu ŋanda yakwa Lesa mufwile ukumwipaya. Muleba mupepi nganshi ne mfumu konsefye uko yaya.” ⁸ Kanshi abena Levi na bantu bonse abena Yuda bacita fyonse ukulingana nefyo Yehoiyada shimapepo akonkomeshe. Cila muntu alonganika abantu bakwe abaleya ku ncito na balekomboka pa bushiku bwe Sabata pa mulandu wakuti ninshi Yehoiada talati asalanganye mpuka sha bashilika. ⁹ Yehoiyada abuula amafumo elyo ne nkwela ishikalamba ne shinono ishali sha mfumu Davidi ishali mu ŋanda yakwa Lesa, apeela ku bakalamba ba fita. ¹⁰ Ashingulusha abantu bonse abali ne fyanso mu minwe apaikele imfumu mupepi no bulambo elyo ne ŋanda yakwa Yawe, ukufuma ku kapinda ka ku kuso ukufika ku kapinda ka ku kulyo aka ŋanda. ¹¹ Elyo Yehoiyada na bana bakwe baya fumya umwana wa mfumu, baisa mufwika ne cisote cabufumu. Bamupeela na palembwa icipangano no kumubika pa bufumu. Panuma yakumusuba bapunda nokuti, “Kalebalika kanabesa we mfumu.” ¹² Ilyo Ataliya aumfwa icongo ca bantu uko balebutauka no kusekelela imfumu, aima ayako ku ŋanda yakwa Yawe ukwali abantu. ¹³ Cilya afika, amona imfumu naiminina pa ncende yaiko iyabufumu lwa pa luceshi lwa pa mwinshi wa ŋanda yakwa Lesa. Amona na bacilolo na bakulisha amapenga bali mupepi ne mfumu. Kabili amona nokuti abantu bonse abekalacalo baleyanga balelisha na mapenga elyo abakwimba ne filimba fyabo nabatangilila mu nyimbo sha malumbo. Elyo Ataliya alepaula ifyakufwala afwele no kupunda ati, “Bucisanguka! Bucisanguka.” ¹⁴ Yehoiyada shimapepo atuma abakalamba ba pa fita imyanda abatungulula abashilika abeba ukuti, “Mufumyeni panse, kabili mwipaye na onse uulefwaya ukumupususha.” Pantu shimapepo asosele ati, “Mwimwipaila pa ncende ya ŋanda yakwa Yawe.” ¹⁵ Bamuleka afika pa mwinshi wakwingililapo bakabalwe ku lubansa lwa kwisano epo bamwikatila no kumwipaya. ¹⁶ Elyo Yehoiyada apanga icipangano icakuti ena, abantu bonse pamo ne mfumu bali nokuba abantu bakwa Yawe. ¹⁷ Kabili abantu bonse baima baya ku ŋanda ya mulungu Baali baya ibongolola. Babongolola ifibumbili fya malambo no kutobaula utulubi. Elyo baipaya na Matani shimapepo wakwa Baali pa ntanshi ya ifibumbili fya malambo. ¹⁸ Panuma ya ifi, Yehoiyada abika imilimo ya mu ŋanda yakwa Yawe mu minwe ya bashimapepo abena Levi. Kuli aba eko Dabidi ashile alondolwela imilimo ya mu ŋanda yakwa Yawe, ifyakutuula amalambo yakoca kuli Yawe ngefyo calembwa mu mafunde yakwa Mose, pamo no kusekelela no kwimba ukulingana nefyo Dabidi ashile akonkomesha. ¹⁹ Abika abakulinda iminshi ya pa mpongolo ya ŋanda yakwa Yawe pakumona ukuti onse uwakowela tengilemo. ²⁰ Elyo asenda abakalamba ba pa fita imyanda, abacindami bakwe, intungulushi sha bantu elyo na bekalacalo bonse baya fumya imfumu mu ŋanda yakwa Yawe, baileta ku ŋanda ye sano ukupitila pa mpongolo ya pamulu no kwisa ibika pa cipuna cabufumu, ²¹ Elyo na bantu bonse mu calo basekelela. Kabili na mu musumba mwaba icibote, pa mulandu wakuti Ataliya bamwipaya ku lupanga.