¹ Abantu ba mu Yerusalemu babuulile Ahasia, kasuli wakwa Yehoramu, bamupyanika pa bufumu. Bacitile ifi pa mulandu wakuti abaishile pamo na Baarabu mu nkambi balishile baipaya abana abakalamba bonse. Kanshi efyo Ahasia mwana Yehoramu imfumu ya bena Yuda atendeke ukuteeka. ² Ahasia atendeke ukuteeka pa bufumu ninshi ali ne myaka amakumi yabili na ibili, kabili ateekele pa bufumu umwaka umo mu musumba wa Yerusalemu. Nyina ishina lyakwe ali ni Ataliya, umwishikulu wakwa Omiri. ³ Nao wine aisa yamba ukwenda mu mibeele ya ba mu ŋanda yakwa Ahabu pantu nyina ewalemukoselesha mukucita ifibi. ⁴ Acitile ifintu ifyabipa pa cinso cakwa Yawe, ngefyo aba mu ŋanda yakwa Ahabu bacitile pantu, ukutulafye apo wishi afwilile, ebashele baba bampandamano bakwe, ici ecamonawile. ⁵ Kabili ni bamo bene ebamupandile amano ilyo ena na Yoramu mwana Ahabu imfumu ya bena Israeli baile mukulwisha Hasaeli imfumu ya bena Aramu ku Ramoti Gileadi. Na muli ubu bulwi Yoramu balimucenene ku bena Aramu. ⁶ Kanshi efyo abweleleko aisa ku Yesireli mukutensha ifilonda bamucenene pa Ramoti mu nkondo bakwete na Hasaeli imfumu ya bena Aramu. Elyo Ahasia mwana Yehoramu imfumu ya bena Yuda aya ku Yesireli mukupempula Yoramu mwana Ahabu pantu alicenenwe ku bulwi. ⁷ Lelo ici cali cilubo icikalamba kuli Ahasia, pantu ninshi Lesa napingula kale ukumukanda. Eico ni muli iyi ine nshita yacipempu elyo Ahasia aimine na Yoramu mukuya lwisha Yehu mwana Nimushi, uyo nao ninshi Yawe namusonta ku mulimo wakulofya aba mu ŋanda yakwa Ahabu. ⁸ Cilya Yehu acili alebomba umulimo wakulofya aba mu ŋanda yakwa Ahabu, asangamo bacilolo ba mu Yuda elyo na bana aba mu lupwa lwakwa Ahasia, abo abalemubombela, nabo bene abepaya. ⁹ Kabili aima aya alefwaya ukwali Ahasia, mpaka ifita ali nafyo fyaya musanga uko abeleme mu Samaria no kumwikata. Elyo bamuleta kuli Yehu, nao amwipaya. Balimushiikile pantu batile, “Uyu ali ni mwana Yehoshafati, umuntu uwafwaile icinso cakwa Yawe no mutima wakwe onse.” Eico tamwashele nomba nangu umo uwa maka mu ŋanda yakwa Ahasia uwakwikala pa bufumu. ¹⁰ Ilyo Ataliya nyina wakwa Ahasia amona ukuti umwana wakwe bamwipaya, epakwima no kwamba ukulofya bonse aba mu ŋanda yakwa Yuda. ¹¹ Lelo Yehosheba, umwana mwanakashi wa mfumu Yehoramu, afyushapo Yoashi mwana Ahasia, amusenda ukufuma pa bana ba mfumu abo bali nokuti bepaye. Aya mufisa pamo no muleshi wakwe mu ŋanda yakwe ku muputule wakusendamako. Yehosheba umwana mwanakashi wa mfumu Yehoramu, kabili umukashi wakwa shimapepo Yehoiyada, ali ni nkashi yakwa Ahasia, ecalengele afise umwana kuli Ataliya pakuti emwipaya. ¹² Aikele ninshi balimufisa pa myaka mutanda mu ŋanda yakwa Lesa pa nshita yonse Ataliya ateekele icalo.