¹ Ilyo Yehoshafati afwile aile lala ukwalala ifikolwe fyakwe, bamushiikile uko bashika ifikolwe fyakwe mu musumba wakwa Davidi. ² Elyo Yehoramu umwana wakwe umwaume amupyana pa bufumu. Yehoramu alikwete bamunyina, abana bakwa Yehoshafati, na mashina yabo yali ni Asariya, Yehieli, Sakaria, Asariahu, Mikaeli elyo na Shefatiya. Bonse aba bali bana bakwa Yehoshafati imfumu ya bena Israeli. ³ Shibo alibapeele ifyabupe ifingi ifya silifa, golide elyo ne fipe fimbi ifyalekana lekana ifyamutengo. Alundilepo ne misumba iya malinga iya mu Yuda lelo ubufumu bwena apeele Yehoramu pantu ewali ibeli. ⁴ Lelo panuma yakwikala bwino pa bufumu, Yehoramu aimishe ulupanga no kwipaya bamunyina abaume bonse elyo na shimo shimo intungulushi sha bena Israeli. ⁵ Yehoramu akwete imyaka amakumi yatatu na ibili ilyo atendeke ukuteeka pa bufumu, kabili aikele pa bufumu mu Yerusalemu imyaka cine konse konse. ⁶ Lelo Yehoramu aendele mu nshila shaleendamo imfumu shonse isha bena Israeli ngefyo aba mu ŋanda yakwa Ahabu bacitile, pantu na mu kuupa kwakwe aupile umwana wakwa Ahabu. Mu bumi bwakwe Yehoramu acitile ifintu ifyabipa pa cinso cakwa Yawe. ⁷ Lelo nangu cali ifi, Yawe tafwaile ukonaula ubufyashi bwakwa Davidi, pa mulandu wa cipangano acitile nankwe, pantu alimulaile ukumusungila icengelo pamo na bana bakwe umushinsanshiku. ⁸ Mu nshiku shakwa Yehoramu isha pa bufumu, abena Edomu basangukile ubufumu bwa bena Yuda no kuikwatila imfumu yabo abene. ⁹ Ici ecalengele Yehoramu pamo na bashilika bakwe na maceleta yakwe ukwima no kuya sansa abena Edomu. Nomba abena Edomu baya mushinguluka pamo na bashilika ba maceleta yakwe, lelo mu nshita ya bushiku Yehoramu aima ailwishisha inshila yakupusukilamo. ¹⁰ Kanshi ukufika na kuli ino ine nshita, abena Edomu balisangukila abena Yuda. Kabili pa nshita imo ine, umusumba wa ku Libina nao walisanguka pa mulandu wakuti Yehoramu alifumine kuli Yawe, Lesa wa fikolwe fyakwe. ¹¹ Elyo na cimbi, alikuulile incende ishakupepelamo mu mpili isha mu Yuda no kulenga abekala mu Yerusalemu ukuikowesha no kufulunganya abena Yuda. ¹² Eliya kasesema epakulembela Yehoramu kalata umwali amashiwi yakuti, “Ifi efyo Lesa wakwa wiso Davidi asosa ifyakuti, ‘Iwe walifilwa ukuba ifyali wiso Yehoshafati nangu Asa imfumu ya bena Yuda. ¹³ Lelo waba ne mbela shakwete imfumu sha bena Israeli, elyo naulenga na bena Yuda elyo na bekala mu Yerusalemu ukuikowesha nga filya aba mu ŋanda yakwa Ahabu bacitile. Kabili naubuula na bamunonko bonse naubepaya, abantu aba mu ŋandafye yakwa wiso, kabili abantu abaweme ukukucila. ¹⁴ Eico nomba Yawe alaswa akande na maka ya bukali bwakwe abantu bobe, ukufuma pa bana abaume, abakashi bobe elyo na fyonse ifipe wakwata. ¹⁵ Nomba iwe uli nokulwala ubulwele ubukalabipilakofye inshiku shonse, ubwa mu mala ubo ubuli nokulenga amala yobe ukufumina kunse.’ ¹⁶ Elyo Yawe aimya imitima ya Bafilisiti na Baarabu abaikala mupepi na bena Kushi ukulwisha Yehoramu. ¹⁷ Baingilila icalo ca bena Yuda no kucisansa elyo bapokolola ne fipe fyonse ifyali kwisano, basenda abana bakwe elyo na bakashi bakwe. Basendafye bonse, bashapofye Ahasia uwali umwaice. ¹⁸ Panuma ya ifi fyonse, Yawe aponesha Yehoramu ubulwele ubwakukanapola ubwa mu mala. ¹⁹ Na mu kuya kwa nshita, ukufika pa mpela ya mwaka wacibili, ubulwele bwakosesha, na mala yafumina kunse elyo afwa ninshi alekalipwa nganshi. Abantu bakwe tabakoseshe no mulilo pa cililo ngo mucinshi ukulingana nefyo balecita kuli bashibo. ²⁰ Yehoramu akwete imyaka amakumi yatatu na ibili ilyo atendeke ukuteeka pa bufumu, kabili ateekele mu musumba wa Yerusalemu imyaka cine konse konse. Imfwa yakwe tayashile ubulanda ku muntu nelyo umo. Elyo bamushiikile mu musumba wakwa Davidi, lelo te mu nshinshi baleshikamo imfumu.