¹ Panuma ya ifi, Abena Moabu na bena Amoni pamo na bamo abena Meuni baishile mukulwisha Yehoshafati. ² Elyo abantu bamo baisa kuli Yehoshafati bamweba abati, “Kwaisa umulongo wa bashilika uukalamba mukukulwisha ukufuma ku Edomu kwishilya lya bemba. Nefi fita nafifika mu Hasasoni Tama.” Emukutila Eni Gedi. ³ Yehoshafati aumfwa umwenso, apilibukila kukufwaya icinso cakwa Yawe, elyo abila ne mbila yakuleka ukulya mu calo conse ica Yuda. ⁴ Abekalacalo bonse aba mu Yuda epakulongana mukufwaya ubwafwilisho ukufuma kuli Yawe. Mu cine bafumine mu misumba yonse iya mu Yuda mukumufwaya. ⁵ Elyo Yehoshafati aiminina pakati ke bumba lya bena Yuda elyo na ba mu Yerusalemu pa ŋanda yakwa Yawe ku ntanshi ya lubansa ulupya, ⁶ no kulanda ati, “We Yawe, Lesa wa bashifwe, bushe teiwe Lesa uwaba mu mulu? Niwe uteeka pa shamfumu sha nko shonse. Amaka no bulamba fyaba mu minwe yobe elyo takwaba no wingakwansha. ⁷ Iye we Lesa wesu, bushe teiwe watamfishe abantu abaleikala muli cino calo pa mulandu wa bantu bobe abena Israeli, elyo wacipeela kuli bamwana Abrahamu cibusa obe pakuti cibe icalo cabo pe na pe? ⁸ Emo baikala muli ici calo elyo kabili balikuulila ishina lyobe icifulo camushilo, no kulanda abati, ⁹ ‘Nga cakuti ishamo lyatuponena, atemwa inkondo, icikuko nangu icipowe, tukesa iminina pa cinso cobe pa ntanshi ya ŋanda ino umwaba ishina lyobe no kulilila kuli iwe mu kucula kwesu, elyo na iwe uli nokutumfwa no kutupususha!’ ¹⁰ “Mona we Yawe abena Amoni, abena Moabu elyo na ba ku mpili sha ku Seiri, balya waleseshe abena Israeli ukubapoka ifyalo fyabo lintu bafumine mu Egupto, nefyo abena Israeli bafumineko baleka ukubalofya. ¹¹ Nomba umone bena ukutasha kwabo ifyo bemine mukwisa tutamfya ukufuma mu calo ico watupeela ukuba icacishilano. ¹² We Lesa wesu, bushe tawabapingule? Pantu ifwe tatukwete amaka ayakuti tulwishisheko uyu mulongo uukalamba uwa bashilika abeshile mukutusansa. Tatwishibe ifyakucita, lelo amenso yesu ifwe yalifye pali iwe.” ¹³ Abaume bonse aba mu Yuda, pamo na bakashi babo, abana babo elyo no twana utunono, baimininafye pa cinso cakwa Yawe. ¹⁴ Elyo Umupashi wakwa Yawe waisa pali Yahasieli mwana Sakaria, umwana wakwa Benaya mwana Yeli, mwana Matania, umwina Levi kabili uwa mu lupwa lwakwa Asafu, lintu acili eminine pebumba. ¹⁵ Asosa ati, “We mfumu Yehoshafati elyo na bonse mwe bekala mu Yuda na mu Yerusalemu, umfweni kuno! Ifi efyo Yawe alanda kuli imwe ukuti, ‘Mwitiina nangu ukutompoka pa mulandu wa uyu mulongo uukalamba uwa bashilika. Pantu ulu lubuli telwenu lelo lubuli lwakwa Lesa. ¹⁶ Mailo mukeme mukuya balwisha. Bakesa baleninika umulundu mu nshila yapitila ku Sisi, elyo imwe muli nokuya basanga lwa pa mpela ya mupokapoka wa mu matololo ya Yerueli. ¹⁷ Tamufwile ukulwa muli ulu ulubuli. Mukaye imininafye mu ncende shenu. Mukemininefye elyo mukamone ukulubula uko Yawe amukwatila mwe bena Yuda elyo na ba mu Yerusalemu. Mwikwata umwenso, nangu ukutompoka. Mukemefye no kuya bakumanya mailo, elyo Yawe akaba na imwe.’” ¹⁸ Yehoshafati epakukontamika umutwe, ashiba ne mpumi yakwe panshi, elyo na bantu bonse abena Yuda na ba mu Yerusalemu bakunkwila Yawe no kumupepa. ¹⁹ Kabili abena Levi bamo abena Koati elyo na bena Kora baiminina no kulumbanya Yawe, Lesa wa bena Israeli, mwishiwi ilikalamba nganshi. ²⁰ Lucelocelo ubushiku bwakonkelepo baima balungama ku matololo ya ku Tekoa. Cilya baima, Yehoshafati aiminina no kusosa ati, “Umfweni kuli ine, mwe bena Yuda na bantu ba mu Yerusalemu. Mukwate icicetekelo muli Yawe Lesa wenu nao ali nokumukosha. Mukwate icicetekelo muli bakasesema bakwe elyo muli nokucimfya.” ²¹ Panuma yakulanshanya na bantu, imfumu Yehoshafati yasonta abakuya baleimba pa ntanshi ya bashilika, ukwimbila Yawe no kumulumbanya mu nsalu ishamushilo baletila, “Toteleni Yawe pantu ukutemwa kwakwe kwa pe na pe.” ²² Ilyo batendeka ukwimba no kulumbanya, Yawe abika abakulalilila abena Amoni, Abena Moabu elyo na ba ku lupili lwa ku Seiri abaingilile mukulwisha abena Yuda. ²³ Abashilika ba bena Amoni elyo na ba bena Moabu baimina abashilika ba ku lupili lwa ku Seiri, baonaulafye bonse. Panuma yakupwisha ukubepaya, epakwamba ukulwa abene, no kwipayana. ²⁴ Ilyo abashilika ba mu Yuda bafika pa ncende apo amatololo yalemoneka no kulolesha ukwali abalwani babo elyo bamonafye ifitumbi ifya bantu nafilambalala panshi. Tapali nelyo umo uwapuswike. ²⁵ Kanshi Yehoshafati na bantu bakwe epakuya mukusenda ifitapwa ku balwani babo, kabili baya sangamo ifipe ifingi nganshi, ifyakufwala elyo ne fintu ifyalekana lekana ifyamutengo ifyo ku bwingi fyacilile na pafyo bengakwanisha ukusenda. Pa mulandu wa bwingi bwa fipe casendele inshiku shitatu pakufisenda. ²⁶ Pa bushiku bwalenga shine baya longana mwishika lya ku Beraka, eko baya mukulumbanya Lesa. Ni pa mulandu wa ici betila ishika ili ukuti ni Beraka ukufika na nomba. ²⁷ Elyo bonse abaume ba mu Yuda na mu Yerusalemu babwelela ku Yerusalemu ne nsansa ishingi, ne mfumu Yehoshafati naitangila pantanshi pantu Yawe alibalengele ukusansamuka pakucimfya abalwani babo. ²⁸ Cilya baingila mu musumba wa Yerusalemu, bonse balungamafye ku ŋanda yakwa Yawe, balelisha amaseese, insango na mapenga. ²⁹ Ishamfumu shonse ishashingulwike shatendeka ukutiina Lesa ilyo baumfwa ifyo Yawe akandile abalwani ba bena Israeli. ³⁰ Kanshi no bufumu bwakwa Yehoshafati bwakwata icibote pa mulandu wakuti Lesa amupeela ukutuusha ku mbali shonse. ³¹ Yehoshafati ali ne myaka amakumi yatatu na isano ilyo atendeke ukuteeka. Aba imfumu ya calo ca bena Yuda kabili ateekele icalo mu musumba wa Yerusalemu pa myaka amakumi yabili na isano. Nyina ishina lyakwe ali ni Asuba, umwana mwanakashi wakwa Shili. ³² Yehoshafati aendele mu nshila shakwa wishi Asa, kabili tatalile afumamo. Acitile ifintu ifyalungama pa cinso cakwa Yawe. ³³ Lelo incende shakupepelamo isho bacindika shena alifililwe ukushonaula, elyo na bantu baali tabalapeela imitima yabo kuli Lesa wa fikolwe fyabo. ³⁴ Nomba ifintu ifyacitike pa nshita ya bufumu bwakwa Yehoshafati, ukufuma pa kutendeka ukufika pakulekelesha, fyonse fyalilembwa mu citabo camilandu icakwa Yehu mwana Hanani, ifyo ifyalembwa na mu citabo ca shamfumu sha bena Israeli. ³⁵ Panuma ya ifi, Yehoshafati imfumu ya bena Yuda yasuminishanya na Ahasia imfumu ya bena Israeli, uwali umuntu umubifi. ³⁶ Aumfwana nankwe ukuti bapange amato ayakalamba ayakubombelamo ifyamakwebo. Aya mato yapangilwe pa ncende iyo baleita ati Esioni Geberi. ³⁷ Elyo Eliese mwana Dodafau uwa ku Maresha asesema amashiwi aya pali Yehoshafati ayakuti, “Pantu iwe wasuminishanya na Ahasia pafyo mulefwaya ukucita, Yawe alaonaula ifyo fine fintu mupangile.” Kanshi ifimato epakonaika, takwali nokufyensha pa menshi ku fyamakwebo.