¹ Umwana wakwe Yehoshafati umwaume ewamupyene pa bufumu elyo akosha na maka yakwe pa bena Israeli. ² Abika abashilika ba nkondo mu misumba yonse iya malinga iya mu Yuda elyo abika ne nkambi sha bashilika mu Yuda elyo na mu misumba yakwa Efulemu ilya Asa wishi apokolwele. ³ Yawe ali na Yehoshafati, pantu mu myaka yakwe iyakwambilapo aendele bwino mu nshila shaleendamo wishi Dabidi. ⁴ Talefwaya icinso ca milungu ba Baali, lelo ena afwaile Lesa wakwa wishi no kukonka amafunde yakwe ukucila imicitile yakwete abena Israeli. ⁵ Yawe akosha ubufumu ubwali mu minwe yakwe. Elyo abena Yuda batendeka ukuleta ifyabupe kuli Yehoshafati, icakuti akwata icuma icingi nganshi elyo no mucinshi. ⁶ Umutima wakwe waipeeleshe ku nshila shakwa Yawe, kabili afumyamo incende shonse ishakupepelamo isho bacindika elyo atema ne nceshi sha mulungu Ashera ukufuma mu Yuda. ⁷ Mu mwaka walenga itatu uwa pa bufumu bwakwe, atuma bacilolo bakwe Beni Haili, Obadia, Sakaria, Netaneli elyo na Mikaiya mukuya balesambilisha mu misumba ya mu Yuda. ⁸ Pakati kabo pali na bamo abena Levi aba, Shemaiya, Netaniya, Sebadiya, Asaeli, Shemiramoti, Yehonatani, Adoniya, Tobiya, Tobadoniya elyo na bashimapepo Elishama na Yehoramu. ⁹ Balasambilisha mu Yuda monse ninshi nabasenda icitabo ca mafunde yakwa Yawe. Baendawike mu misumba yonse iya mu Yuda, balesambilisha abantu. ¹⁰ Umwenso wakutiina Yawe waikete ishamfumu shonse ishashingulwike icalo ca Yuda, icakuti takwali uwakucita ulubuli na Yehoshafati. ¹¹ Bamo Abafilisiti baletela Yehoshafati ifyabupe elyo na silifa ngo mutuulo. Elyo Abaarabu bamuletela ifitekwa, basukusuku 7,700 elyo na basawe nabo 7,700. ¹² Yehoshafati alekoselakofye asuka akwatisha amaka. Akuula imisumba ya malinga ne ya matala mu Yuda, ¹³ elyo akwata ne fipe ifingi nganshi ifyo asunga mu misumba ya mu Yuda. Kabili asunga mu Yerusalemu abashilika abaishiba nganshi ukulwa. ¹⁴ 14Kabili ifi efyali ukupendwa kwabo umwabela indupwa shabo, Ukufuma mu Yuda, abakalamba ba fita 1,000. Adina umukalamba wa fita ali na bashilika 300,000 abaishiba ukulwa. ¹⁵ Uwakonkapo ni Yehohanani umukalamba wa fita ali na bashilika amakana imyanda ibili na makumi cine konse konse 280,000. ¹⁶ Uwakonkapo ni Amasiya mwana Sikiri uwaipeeleshefye umwine ku mulimo wakwa Yawe, ali na bashilika 200,000. ¹⁷ Ukufuma muli Benjamini ni aba: Eliada umushilika uwamaka, ali na bashilika amakana imyanda ibili 200,000 abalwila ku mata ne nkwela. ¹⁸ Uwakonkapo ni Yehosabadi, ali na bashilika amakana umwanda umo na makumi cine konse konse 180,000 abacenjela ukulwa inkondo. ¹⁹ Aba e bashilika abalelinda imfumu, ukwabula ukupenda abo yatekele mu misumba ya malinga mu calo conse ica bena Yuda.