¹ Mu mwaka walenga amakumi yatatu na mutanda uwa pa bufumu bwakwa Asa, Baasha imfumu ya bena Israeli yaimya ulubuli na bena Yuda elyo yashingulusha ilinga ku musumba wa Rama pakulesha ukuti kwiba nangu umo uwakufuma nangu uwakwingila mu calo cakwa Asa imfumu ya bena Yuda. ² Elyo Asa abuula silifa na golide ukufuma mu cipao ca mu ŋanda yakwa Yawe elyo ne ya mu ŋanda yakwe iye sano, afituma kuli Beni Hadadi imfumu ya ku Aramu, uwaleteeka mu Damasiko. ³ Amweba ati, “Leka pabe icipangano pakati ka iwe na ine, nga filya caliko pakati ka batata elyo na bawiso. Mona, nakutumina silifa na golide. Eico pangulula icipangano ca pakati ka iwe na Baasha imfumu ya ku Israeli pakuti afume mu calo candi.” ⁴ Beni Hadadi asuminisha ifyasosa imfumu Asa elyo atuma abakalamba ba bashilika bakwe mu misumba ya bena Israeli. Baya cimfya imisumba ya Iyoni, Dani, Abeli Maimu elyo ne misumba yonse iya matala iyakwa Naftali. ⁵ Ilyo Baasha aumfwa ifi, aleka ukukuula Rama no kuleka ifyo alecita. ⁶ Elyo imfumu Asa aleta abaume bonse aba mu Yuda ukwisa senda amabwe yonse elyo ne mbao ukufuma ku Rama isho Baasha alebomfya. Kuli ifi fipe Asa afibomfya ukukuulilako imisumba ya Geba na Misipa. ⁷ Pa nshita ine ilya, Hanani kamona aisa kuli Asa imfumu ya bena Yuda elyo amweba ati, “Pa mulandu wakuti wacicetekela mu mfumu ya bena Aramu ukwabula ukuti ucetekele muli Yawe, Lesa obe, ecalenga ukuti abashilika ba mfumu ya ku Aramu bapusuke ukufuma mu minwe yobe. ⁸ Bushe Abena Kushi na bena Libya tabaali impuka ya bashilika abengi nganshi ninshi nabakwata amaceleta na bashilika ba pali bakabalwe? Nomba ilyo wakuutile peshina lyakwa Yawe, alibapeele mu minwe yobe. ⁹ Pantu amenso yakwa Yawe yalalolekesha mukati ke sonde lyonse no kukoselesha bonse abo imitima ili iyaipeelesha kuli ena. Iwe ucitile icintu icabulamo amano, eico nomba ukufuma lelo walatendeka ukulalwa inkondo.” ¹⁰ Asa epakufulilwa kamona pa mulandu wa aya mashiwi. Kanshi afulwa nganshi icakuti amuposa na mu cifungo. Kabili pa nshita imo ine atendeka ukucusha bamo abantu bakwe. ¹¹ Ifintu ifyacitike mu nshita ya bufumu bwakwa Asa ukufuma ku kutendeka ukufika ku mpela fyalembwa mu citabo ca shamfumu sha bena Yuda na bena Israeli. ¹² Mu mwaka walenga amakumi yatatu na pabula uwa pa bufumu, Asa alwala ubulwele mu makasa yakwe. Nangu cali cakuti ubulwele bwali ubukali, lelo na mukulwala kwakwe talombele ubwafwilisho ukufuma kuli Yawe, kanofye kuli bashiŋanga. ¹³ Elyo mu mwaka walenga amakumi yane na umo uwa pa bufumu bwakwe emo Asa afwile no kuya lala ukwalala ifikolwe fyakwe. ¹⁴ Baya mushiika na mu cilindi ico umwine afukwile mu musumba wakwa Dabidi. Bamulalika pa musengele uo babikilepo ifya cena cisuma elyo na mafuta ya cena icisuma ayalekana lekana. Elyo bakosha no mulilo uwingi nganshi uwakumucindikilapo.