¹ Kanshi Abiya epakuya lala ukwalala ifikolwe fyakwe, kabili bamushiikile mu musumba wakwa Davidi. Asa umwana wakwe umwaume ewamupyene pa bufumu elyo na mu nshiku shakwe icalo caikele mu cibote pa myaka ikumi limo. ² Asa acitile ifintu ifisuma kabili ifyalungama mu menso yakwa Yawe Lesa wakwe. ³ Elyo mu nshiku shakwe afumya ifibumbili fya malambo fya milungu ya benafyalo, ne ncende shakupepelamo isho bacindika, atobaula inceshi sha mabwe balepepelapo elyo atema ne nceshi sha mulungu Asher. ⁴ Akonkomeshe abena Yuda ukufwaya icinso cakwa Yawe, Lesa wa fikolwe fyabo, no kubaka amafunde ne fipope fyakwe ⁵ Afumyamo incende shakupepelamo isho bacindika elyo ne fibumbili fya malambo ifyakufutumwinapo ububani mu misumba yonse iya mu Yuda, elyo ne calo conse cakwata icibote mu nshiku shakwe. ⁶ Akuula imisumba iyacingililwako amalinga mu Yuda pa mulandu wakuti mu calo mwali icibote. Takwali nangu umo uwaishile mukumulwisha mu myaka yakwe iya pa bufumu pantu Yawe alimupeele ukutuusha. ⁷ Asa aebele abena Yuda ati, “Natukuule imisumba iyi, kabili tukuulilileko ne fibumba, tukuule ne mpungu ne mpongolo ishabapo inshimbi. Icalo cicili mu minwe yesu, pantu natusanga Yawe, Lesa wesu. Na panuma yakumusanga ena natupeela ukutuusha ku mbali shonse.” Kanshi efyo bakuulile no kupaalwa nganshi. ⁸ Asa akwete abashilika 300,000 abaume abafumine mu Yuda abaishiba ukubomfya inkwela ishikulu elyo na mafumo, kabili na bambi 280,000 ukufuma mu bena Benjamini abaishibe ukubomfya inkwela ishinono elyo ne mifwi. Bonse aba bali baume abashipa abacenjela nganshi kukulwa. ⁹ Inshita imo, Sera umwina Kushi aisa ima no kusansa icalo, ninshi ali no mulongo wa bashilika uukalamba elyo na maceleta imyanda itatu. ¹⁰ Elyo aisa palama, afika ku Maresha. Kanshi Asa epakwima ukuya mukumanya, na cila ibumba lyaikala mu cifulo caliko icakulwilamo mwishika lya Sefata mupepi na Maresha. ¹¹ Elyo Asa akuuta kuli Yawe Lesa wakwe no kusosa ati, “We Yawe takwaba umbi uwaba nga iwe uwingafwa abashakwata amaka ukulwisha abamaka. Utwafweko we Yawe Lesa wesu. Niwe twashintililako kabili ni mwishina lyobe tulelwishisha cinkupiti wa bashilika uyu. We Yawe niwe Lesa wesu. Wileka umuntufye eo acimfye iwe.” ¹² Yawe epakucimfya abena Kushi pa cinso cakwa Asa elyo na pa cinso ca bena Yuda. Abena Kushi bafulumuka ulubilo. ¹³ Elyo Asa na bashilika bakwe babakunkunika ukuya bafisha ku Gerari. Baipaya umulongo uukalamba nganshi uwa bena Kushi icakuti bafilwa no kushansha. Baonawilwe ku maka yakwa Yawe na bashilika bakwe. Abaume ba mu Yuda basenda ifitapwa ifingi nganshi. ¹⁴ Baonaula imishi yonse iyashingulwike Gerari pantu umwenso wakutiina Yawe wafikile pali bena. Batapa fyonse ifyali mu mishi yonse iyi, pantu mwali ubunonshi ubwingi. ¹⁵ Kabili basanshile ne nkambi sha bakacema elyo basenda imikuni ya mpaanga, imbushi ne ngamila. Elyo babwelela ku Yerusalemu.