¹ Mu bena Benjamini mwali umuntu umo ishina lyakwe ni Kishi umwana mwaume wakwa Abieli, umwana mwaume wakwa Serori, umwana mwaume wakwa Bekorati, umwana mwaume wakwa Afia umwina Benjamini umukankala nganshi. ² Alikwete umwana umwaume uwe shina lya Saulo, umulumendo uwayemba bwino. Mu bena Israeli tamwali uwalingene nankwe ukuwama. Kabili tamwali nelyo umo uwalepele ukumucila, bonse balepelafye pa mabeya yakwe. ³ Nomba bapunda bakwa Kishi wishi wakwa Saulo balilubile. Elyo Kishi aeba umwana wakwe Saulo ati, “Senda umubomfi umo, muye nankwe no kuya mukufwaya bapunda.” ⁴ Kanshi nabo epakulalanya icalo ca mpili ica bena Efulemu elyo apulinkanya na mu calo ca Shalisha, no kubasanga iyoo. Kabili apulinkanya na mu calo ca Shalimu noko kwine tabaliko. Elyo atwalilila ukufwaya, alalanya icalo ca bena Benjamini, nako kwine tabaliko. ⁵ Ilyo bafikile ku Sufi, Saulo aeba umubomfi uo bali nankwe ati, “Tuleya tubwelelemo, pantu batata kuti baleka ukutontonkanya pali bapunda no kwamba ukusakamana pali ifwe.” ⁶ Elyo umubomfi amwasuka ati, “Moneni muli uno musumba mwaliba umuntu wakwa Lesa uwacindikwa nganshi, kabili conse ico asosa cilaba cacishinka. Kanshi natuleyako nomba, nalimo kuti atwebako inshila twingayamo.” ⁷ Elyo Saulo ayaswike umubomfi wakwe ati, “Nga cakuti twayako ni cinshi ico tuleya peela uyu muntu? Pantu ifilyo nafipwa mu mifuko yesu. Tatukwete icabupe icakutwala ku muntu wakwa Lesa. Bushe cinshi tukwetepo?” ⁸ Umubomfi abwekeshapo ukwasuka Saulo nakabili ati, “Moneni ine ninkwatapo akandalama kamo aka silifa, efyo ndeya peela ku muntu wakwa Lesa pakuti aye tulanga bwino inshila tuli nokuyamo.” ⁹ Mu nshita shakale mu Israeli umuntu nga aya kukwipusha fimo kuli Lesa, alesosa ati, “Iseni, tuleya kuli kamona.” Pantu ino nshita uwitwa kasesema, kale aleitwa ukuti ni kamona. ¹⁰ Saulo atile ku mubomfi wakwe, “Cawama walanda bwino, isa tuleya.” Epakwima baya na ku musumba ukwali umuntu wakwa Lesa. ¹¹ Ilyo baleninika ulupili pakuya ku musumba, bakumanya abakashana bamo abaleisa mukutapa amenshi, elyo babepusha abati, “Bushe kamona eko ali?” ¹² Nabo bayasuka abati, “Ee uyo ali ku ntanshi yenu. Angufyanyeni nombaline pantu lelo line elyo eshile muno musumba wesu. Kabili e bushiku abantu baletuula amalambo pa ncende iyakupepelapo. ¹³ Nga mwaingilafye mu musumba, mulemusanga ilyo talaya pamulu pa ncende yakupepelapo kukulya. Abantu tekuti batampe ukulya ilyo talafika. Pantu euli nokupaala ifya malambo, elyo abo bonse abetilwe bali nokwamba ukulya. Kabiyeni nineni pamulu nombaline, pa nshita ino kuti mwamusanga.” ¹⁴ Elyo baile ku musumba, kabili ilyo baleingila mu musumba bamwene Samwele nao ali mu nshila aleisa kuli bena, aleya ku ncende yakupepelapo. ¹⁵ Nomba mu bushiku bwa kunuma ilyo Saulo talaisa, Yawe alisokolwele ici kuli Samwele ati, ¹⁶ “Mailo pa nshita nga ino ine, nkakutumina umwaume umo ukufuma ku calo cakwa Benjamini. Ukamusube amafuta yakuba kateeka wa pa bantu bandi abena Israeli. Akapususha abantu bandi ukufuma ku kuboko kwa Bafilisiti, pantu nimona ukucula kwabo, no kulilishika kwabo nakufika kuli ine.” ¹⁷ Ilyo Samwele amwene Saulo, Yawe atile kuli wena, “Uyu e muntu nakwebele ukuti euli nokuba kateeka wa bantu bandi.” ¹⁸ Elyo Saulo apalamina kuli Samwele mukati ka mpongolo nokutila, “Shi napapata, nangeniko uko iŋanda yakwa kamona yabela?” ¹⁹ Elyo Samwele ayasuka Saulo ati, “Nine wine kamona. Tangila unine ku ncende yakupepelapo, pantu niwe ilelo tulelila pamo na ine. Elyo ulucelo nkaleka ukaleya kabili nkakweba fyonse ifili mu mutima obe. ²⁰ Lelo pa mulandu wa bapunda balya baluba pali ishi nshiku shitatu shapita, wiposako mano yobe, bonsefye nabamoneka. Kabili ni kuli nani ukukabila konse ukwa bena Israeli kuli nokuya, nga cakuti tekuli iwe na ku ba ŋanda ya bashinwe?” ²¹ Saulo ayasuka ati, “Bushe ine nshili umwina Benjamini, uwa mu luko ulwacepesha mu bena Israeli? Kabili no lupwa lwandi elwacepesha pa ndupwa shonse isha nko sha bena Benjamini. Nga cinshi wasosela icintu ici kuli ine?” ²² Elyo Samwele asenda Saulo no mubomfi wakwe mu ŋanda ya maliila, abateeka kuntashi ya balalikwe abali mu mpendwa nalimo amakumi yatatu. ²³ Samwele atile ku waleipika, “Leta icipande ca nama nacikupeela, ico nacitila ucibike ceka.” ²⁴ Uwaleipika nao abuula umwendo na fyonse ifyaliko no kufipalamika ku ntanshi yakwa Saulo. Elyo Samwele atile, “Ifi efyo bacikubikila, lya, pantu fyapeelwa pa nshita iyasontwa pakuti ulile pamo na bashimucindikwa.” Elyo Saulo alile pamo na Samwele pali bulya bushiku. ²⁵ Ilyo babwelele ukufuma ku ncende yakupepelapo ukwisa ku musumba, Samwele alanshenye na Saulo pa mulu wa ŋanda yakwe epo bamupekanishisha na pakusendama. ²⁶ Bonse babuka lucelocelo, elyo Samwele aitile Saulo uwali pa mutenge ati, “Ima uipekanye pakuti nkuleke uleya.” Ilyo Saulo aipekanya ena na Samwele bafumina panse bonse. ²⁷ Cilyafye bafika lwa ku mpela ya musumba, Samwele aeba Saulo ati, “Eba umubomfi obe atangile ku ntanshi yesu. Elyo nga atangila, iwe ubale ushaleko pano pene panono, pakuti nkwebe ishiwi ukufuma kuli Lesa.”